އަލްޖީރިއާގައި ކޮވިޑް-19 ޓެސްޓް ކިޓް އުފައްދަން ފަށައިފި

އަލްޖީރިއާއިން ކޮވިޑް-19ށް ޓެސްޓް ކުރާ ކިޓް އުފެއްދުމުގެ މަސައްކަތް ފަށައިފިއެވެ.

އެޤައުމުގެ ސަރުކާރާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކުރާ ގޮތުގައި އެޤައުމުން އުފައްދަނީ 15 މިނެޓް ތެރޭގައި ކޮވިޑް-19ގެ ސާމްޕަލް ގެ ނަތީޖާ ތަހުލީލު ކޮށްލެވޭ ފެންވަރުގެ ކިޓެކެވެ. އަދި ހަފުތާއެއްގެ މައްޗަށް 200،000 (ދުއިސައްތަ ހާސް) ކިޓު އުފެއްދުމުގެ ޤާބިލުކަން އެބަހުރި ކަމަށް ރިޕޯޓުކޮށްފައި ވެއެވެ.

އަލްޖީރިއާގެ ދައުލަތުގެ ޓީވީން ވަގުތުން ދުރަށް ދެއްކި އިންޓަވިއުއެއްގައި އެޤައުމުގެ ފާމަސޫޓިކަލް ކަންތައްތަކާއި ޙަވާލުވެ ހުންނެވި ޖޫނިއަރ މިނިސްޓަރ ލުވްތީ ބެންބާ އަހްމަދު ވިދާޅުވީ، "ރެޕިޑް ޓެސްތް ކިޓް" އުފައްދަނީ ކެނެޑާއާއި އުރުދުންގެ ފަންނީ އެހީތެރިކަމާއެކުގައި ކަމަށެވެ. އަދި ކިޓުތައް އުފައްދަނީ ވެރިރަށް އަލްޖިއަރސް ގެ ހުންނަ ލެބޯޓަރީއެއްގައި ކަމަށެވެ.

އުތުރު އެފްރިކާގެ ޤައުމެއް ކަމަށްވާ އަލްޖީރިއާގައި ކޮވިޑް-19 ފެތުރެން ފެށި ފަހުން މިހާތަނަށް، 100 މިލިއަން އެމެރިކާ ޑޮލަރަށް އަގު ކުރެވޭ ޞިއްޙީ އާލާތްތަކާއި، ފާމަސޫޓިކަލް އުފެއްދުންތައް އެހެން ޤައުމުތަކުން ގަނެ އެތެރެ ކޮށްފައިވެއެވެ. އަދި ފާއިިތުވެ ދިޔަ ދުވަސްތަކުގައި ޗައިނާ ސަރުކާރު އެޤައުމަށް މިފަދަ ތަކެތި ހަދިޔާކޮށްފައިވާ ކަމަށް ޖޫނިއަރ މިނިސްތަރ ވިދާޅުވެފައި ވެއެވެ.

އަލްޖީރިއާގައި ކޮވިޑް-19ގެ ނުރައްކާ ބޮޑުވެ، މުޅި ޤައުމުގައި ވަނީ ކާފިއުގެ ޢަމުރު އިޢުލާނު ކޮށްފައެވެ. އަދި ސިނާޢި، އިޤުތިޞާދީ ޙަރަކާތްތައް ހުއްޓުވާ ވިޔަފާރިތައްވަނީ ބަންދު ކޮށްފައެވެ. މީގެ އިތުރުން ޢާންމު ދަތުރުފަތުރުތައްވެސް ވަނީ ހުއްޓުވާފައެވެ. އެހެންނަމަވެސް ވަކި އުޞޫލެއްގެ ދަށުން ޒަރޫރީ ބާވަތްތައް ގަތުމަށް ޢާންމުންނަށް ފުރުޞަތުތައް ދަނީ ފަހިކޮށް ދެމުންނެވެ.

އަލްޖީރިއާގައި މިހާތަނަށް 5،891 (ފަސް ހާސް އަށް ސަތޭކަ ނުވަދިހަ އެކެއް) ޕޮޒިޓިވް ކޭސް ރިޕޯޓު ކޮށްފައި ވެއެވެ. އަދި 507 މީހުން ވަނީ މަރުވެފަ އެވެ.