މުޅި ދުނިޔެއަށް ކުރިމަތިވެފައިވާ ކޮވިޑް-19 ގެ ވަބާ އާއި ގުޅިގެން ޤައުމުތަކަށް ލިބެމުން މިދާ ގެއްލުންތަކަކީ، ދެވަނަ ބޮޑު ހަނގުރާމައަކާއި މުޅި ދުނިޔެ ކުރިމަތިލުމާއި އެއްވަރުގެ ކަމެއްކަމަށް ޔުނައިޓެޑް އަރަބް އެމިރޭޓްސް ގެ މިނިސްޓަރ އޮފް ކެބިނެޓް އެެފެއަރޒް އެންޑް ފިއުޗަރ މުޙައްމަދު ބިން ޢަބްދުﷲ އަލް-ގަރްގާވީ ވިދާޅުވެއްޖެއެވެ.

އޭނާ ވިދާޅުވީ ކޮވިޑް-19ގެ ޙާލަތާއި ގުޅިގެން މުޅި ދުނިޔެއަށް ތަހައްމަލު ކުރަން ޖެހިފައި މިވަނީ ދަތި އުނދަގޫ ދުވަސްތަކެއް ކަމަށެވެ. އަދި މުޅި ދުނިޔެއަށް އޭގެ ސަބަބުން އެކި ދާއިރާތަކުން ލިބެމުންދާ ގެއްލުންތަކަކީ ހަނގުރާމައަކަށް ފަހުވެސް ކުރިމަތި ލާންޖެހޭ ފަދަ ޙާލަތެއް ކަމަށެވެ. ސިނާޢީ ޙަރަކާތްތަކާއި، އިޤުތިޞާދީ ޙަރަކާތްތައް ހުއްޓި ވިޔަފާރިއާއި އުފެއްދުންތެރިކަން ދަށްވެ، ކާބޯތަކެތީގެ ރައްކާތެރިކަމާއި މެދު ސުވާލު އުފެދޭ ކަމަށް އޭނާ ވިދާޅުވިއެވެ.

ދުނިޔޭގެ އެކި ޞަރަޙައްދުތަކައް ކޮވިޑް-19ގެ އަސަރު އެކިވަރަށް ކުރަމުންދާ އިރު ޒަމާނީ ޓެކްނޯލޮޖީގެ އެހީގައި މިކަމަށް އެދެވޭ ރަނގަޅު ބަދަލެއް ގެންނަން މަސައްކަތް ކުރިނަމަވެސް އޭގެ ނަތީޖާ ތަފާތު ކަމަށެވެ. އަދި މި ހުރިހައި ކަމަކަށް ރިޢާޔަތް ކުރާނަމަ، މިއީ ތިން ވަނަ ބޮޑު ހަނގުރާމައަކަށް ފަހު ޤައުމުތަކުން ކުރިމަތިލާން ޖެހޭ ފަދަ ޙާލަތެއް ކަމަށާއި، ގެއްލުންވެސް ހަމަ އެއްފަދަ ކަމަށް އަލް-ގަރްގާވީ ވިދާޅުވިއެވެ.

ކޮވިޑް-19ން ލިބެމުންދާ ގެއްލުންތަކަށާއި، އެއަށް ފަހު ކުރާނެ އަސަރު އަންދާޒާކޮށް ޔޫއޭއީން ދަނީ އެކަމަށް ތައްޔާރު ވަމުންނެވެ. ހީވެސް ނުކުރާ ފަދަ ބޮޑެތި ގެއްލުންތަކާއި ކުރިމަތިލާން ޖެހިފައިވާއިރު، ޔޫއޭއިން ކޮވިޑް-19ން މިންޖުވުން ޤައުމު އޮންނާނެ ޙާލަަތައް ބަލާ ކާނާޔާއި، ޞިއްޙަތާއި، ވިޔަފާރި ރައްކާތެރިކޮށްދޭ ސްޓްރެޓެޖީއެއް މިހާރު ދަނީ އެކުލަވާލަމުންނެވެ. މީގައި މާލީ ގޮންޖެހުމުން އަރައިގަތުމަށް ކުރެވިދާނެ ކަންތައްތަކާއި، އިންޞާނީ ވަޞީލަތްތައް މިކަމުގައި ޙަރަކާތްތެރި ކުރުވާނޭ ގޮތްތައްވެސް ހިމަނާފައި ވެއެވެ. އަދި ރައްޔިތުންނަށް ތާހިރު ދިރިއުޅުމެއް ފަހިކޮށް ދިނުމަށްވެސް މީގައި މުހިންމުކަމެއް ދީފައި ވެއެވެ.

ޔޫއޭއިން ކޮވިޑް-19 އެންމެ ފުރަތަމަ ރިޕޯޓުކުރީ ޖެނުއަރީ މަހުގެ ތެރޭގައެވެ. މިހާތަނަށް 18،878 (އަށާރަހާސް އަށް ސަތޭކަ ހަތްދިހަ އަށެއް) މީހުން ވައިރަސްއަށް ޕޮޒިޓިވްވެ 201 މީހުން ވަނި މަރުވެފައެވެ.