ކޮވިޑް-19އާ ގުޅިގެން އައްޑޫސިޓީގައި ޓެސްޓް ކުރެވޭނެ ގޮތާއި، ރައްކާތެރި ކަމުގެ ވަޞީލަތްތަކާއި، ފަރުވާދެވޭނެ އެކަށީގެންވާ ނިޒާމެއް ޤާއިމުކުރެވިފައި ނުވާކަމަށް ބުނެ، ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް، ރައްޔިތުންގެ މަޖިލީހަށް ހުށަހެޅި ކުއްލި މައްސަލައާ މެދު ރައްޔިތުންގެ މަޖިލީހުގައި ހިމެނިވަޑައިގަންނަވާ އައްޑޫ ސިޓީގެ މެންބަރުން ކަންބޮޑުވުން ފާޅުކުރައްވައި ރައްދު ދެއްވައިފި އެވެ.

މިގޮތުން، މިމައްސަލައަށް އެންމެ ފުރަތަމަ ބަހުސް ކުރެއްވި، އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވީ އައްޑޫ ސިޓީގެ މެންބަރުން ތިއްބެވީ ނިދާފަ ނޫންކަމަށާއި، ކޮވިޑް19 ގެ ކަންކަމުގައި ސަރުކާރުން އެކަށީގެންވާ މަސައްކަތްތަކެއް ކޮށްފައިވާ ކަމަށެވެ.

މި ކުއްލި މައްސަލައަށް ވާހަކަ ދައްކަވަމުން، އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ އައްޑޫގެ މެންބަރުން ކެނޑިނޭޅި މިކަމުގައި މަސައްކަތް ކުރަމުން އަންނަ ކަމަށެވެ. އަދި ކަމާބެހޭ ފަރާތްތަކާއެކު ވާހަކަދެކެވި މަޝްވަރާތައް ކުރެވެމުންދާކަން ވެސް ރޮޒެއިނާ ވަނީ ފާހަގަކުރައްވާފަ އެވެ. އަދި އައްޑޫގައި ވެސް ޓެސްޓް ކުރުމަށް މެޝިން އެބަހުރިކަން ފާހަގަކުރައްވައި ރޮޒައިނާ ވިދާޅުވީ އެ މެޝިނުން ކޮވިޑް-19 ޓެސްޓް ކުރުމަށް ބޭނުންވާ ކާރޓްރިޖް މިމަހުގެ ތެރޭގައި ލިބޭނެކަމަށް ސަރުކާރުން ބުނެފައިވާ ކަމަށެވެ. އެހެންކަމުން ކާޓްރިޖް ލިބުމުން އައްޑޫ ސިޓީގައި ވެސް ކޮވިޑް-19 އަށް ޓެސްޓް ކުރެވޭނެ އިންތިޒާމު ހަމަޖެހިގެންދާނެ ކަމަށްވެސް ރޮޒައިނާ ވިދާޅުވި އެވެ.

އައްޑޫ ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވީ، ޝިޔާމު ހުށަހެޅުއްވީ ކުއްލި މައްސަލައެއް ކަމެއް ސާފުނުވާ ކަމަށާއި، މިމައްސަލާގައި ސަރުކާރަށާއި މަޖިލިސް މެންބަރުންނަށް އަދި އައްޑޫ ސިޓީގެ ރައްޔިތުންނަށް ނޭނގޭ އާ ވަހަކައެއް ނެތްކަމަށެވެ. އަދި ޕީޕީއީ އާއި ހޭންޑް ސެނަޓައިޒަރާއި މާސްކް ފަދަ ފަމަސޫޓިކަލް ވަސީލަތްތައް ވެސް އައްޑޫ ސިޓީގައި އެބަހުރިކަމަށާއި، އެތަކެތި ނެތް ކަމަށް ޝިޔާމު އެވިދާޅުވާ ވާހަކައަކީ ދޮގެއް ކަމަށް ވެސް އިލްޔާސް ލަބީބް ވިދާޅުވި އެވެ.

ހިތަދޫ ދެކުނު ދާއިރާގެ މެންބަރު އިބްރާހީމް ނާޒިމް ވިދާޅުވީ، ރައްޔިތުންގެ މަޖިލީހުގައި ހިމެނޭ އައްޑޫ ސިޓީގެ ހުރިހާ މެންބަރުން އައްޑޫ ސިޓީގެ ރައްޔިތުންގެ ސަލާމަތާ ރައްކާތެރިކަމަށް އިސްކަން ދެއްވާކަމަށާއި، އެގޮތުން އައްޑޫ ސިޓީގެ 7 މެންބަރުން އެކުގައި ކޮވިޑް-19 އިން ރައްޔިތުން ރައްކާތެރިކުރުމަށްޓަކައި ކުރަންޖެހޭ މަސައްކަތްތައް ކުރަމުންދާއިރު، ކަމާބެހޭ ފަރާތްތަކާއެކު މަޝްވަރާކުރަމުންދާ ކަމަށްވެސް ނާޒިލް ވިދާޅުވި އެވެ. ނާޒިލް ވިދާޅުވީ ޝިޔާމް ހުށަހެޅުއްވި ކުއްލި މައްސަލާގައި ހަގީގަތާ ހިލާފު ވާހަކަތައް އެބަހުރި ކަމަށެވެ. އަދި މިފަދަ ރައްޔިތުންނާ ގުޅުން ހުރި މައްސަލައެއް މަޖިލީހަށް ހުށަހަޅާއިރު ރަނގަޅަށް ބަލާ މައުލޫމާތު ހޯދުމަށްފަހު ހުށަހެޅުން ރަނގަޅުވާނެ ކަމަށްވެސް ނާޒިލް ވިދާޅުވި އެވެ.

ހިތަދޫ މެދުދާއިރާގެ މެންބަރު އަހުމަދު ރަޝީދު ވިދާޅުވީ، އައްޑޫ ސީޓީގައި ފެންވަރު ރަނގަޅު ސިއްހީ ޚިދުމަތް ފޯރުކޮށްދޭން މި ސަރުކާރުން މަސައްކަތް ކުރަމުންދާ ކަމަށާއި، ކޮވިޑް-19 ރޯގާ އާއި ގުޅިގެން އެބަލިން ރައްކާތެރިވުމަށް ބޭނުންކުރާ ވަސީލަތްތަކާއި ޓެސްޓް ކުރުމަށް ބޭނުންވާ ލެބޯޓަރީ ސާމާނުތަކަކީ ދުނިޔޭގެ ހުރިހާ ގައުމުތަކަށް ލިބުމުގައި ދަތިތަކެއް އުޅޭ ކަމެއް ކަމަށެވެ. އެގޮތުން ރާއްޖެއަށް ވެސް އެކަން ދިމާނުވެ ނުދާނެ ކަމަށް އަހުމަދު ރަޝީދު ވިދާޅުވި އެވެ. ނަމަވެސް މިވަގުތަށް އެކަށީގެވާ އަދަދަކަށް ޕީޕީއީ އައްޑޫ ސިޓީގައި އެބަހުރި ކަމަށްވެސް އަހުމަދު ރަޝީދު ވިދާޅުވި އެވެ.

ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވީ، މި މައްސަލައަކީ އެއްގޮތަކަށްވެސް ކުއްލި މައްސަލައެއް ނޫން ކަމަށާއި މިއީ ކުއްލި ނުރައްކަލުގެ ހާލަތެއް، ނުވަތަ ކުއްލި ބަޣާވާތެއް ކުރުމަށް ރާވަމުންދާކަމުގެ އިޝާރާތެއް ކަމަށެވެ. މިފަދަ ކިތަންމެ ކަމެއް މިގައުމުގައި ހިނގަމުން އެބަދާ ކަމަށްވެސް ނިހާދު ވިދާޅުވި އެވެ. ކަންކަން އޮޅުވާލާ، ރޭވުމަށްޓަކައި އައްޑޫ ސިޓީގެ ރައްޔިތުންނަށް އޮޅުވާލުމާއި އައްޑޫ ރައްޔިތުންނަށް ނުބައި މަންޒަރުތަކެއް ދައްކާ، ސަރުކާރާ ދެކޮޅަށް ރައްޔިތުން ނެރުމަށްޓަކައި "ހިތުން އައްޑޫ ރައްޔިތުން ގަޅި ހައްދަންވެގެން" އިދިކޮޅު މެންބަރުން މަޖިލީހަށް ހުށަހެޅި މައްސަލައެއް ކަމަށްވެސް ނިހާދު ވިދާޅުވި އެވެ.

ޕާސަނަލް ޕްރޮޓެކްޓިވް އިކުއިޕްމަންޓް (ޕީޕީއީ) ނެތްކަމަށާއި، ރައްކާތެރި ކަމުގެ ވަޞީލަތްތަކާއި، ފަރުވާދެވޭނެ އެކަށީގެންވާ ނިޒާމެއް ޤާއިމުކުރެވިފައި ނުވާކަމަށްބުނެ، ޝިޔާމު ވިދާޅުވި ވާހަކަތައް އައްޑޫ ސިޓީގެ މެންބަރުން ވަނީ ދޮގު ކުރައްވައި ޝިޔާމުގެ ވާހަކަތަކަށް ރައްދު ދެއްވާފަ އެވެ.

ހުރިހާ މެންބަރުންގެ ވެސް ވިދާޅުވިގޮތުގައި، އައްޑޫ ސިޓީގެ އިތުރުން މުޅި ރާއްޖޭގައި ވެސް ސިއްހީ ނިޒާމު އިތުރަށް ހަރުދަނާކޮށް، ރަނގަޅު ކުރަންޖެހޭ ބައިވަރު ކަންކަން އެބަހުރި ކަމަށެވެ. ރާއްޖޭގެ ސިއްހީ ނިޒާމު މިއަދު އޮންނަންޖެހޭނީ މިއައްވުރެ ފެންވަރު ރަނގަޅު ނިޒާމެއް ކަމަށާއި އަދި ރާއްޖޭގެ ހުރިހާ ރަށެއްގައި ފެންވަރު ރަނގަޅު ހޮސްޕިޓަލްތައް ގާއިމު ނުކުރިޔަސް، ސަރަހައްދުތަކަކަށް ބަހާލައިގެން ވިޔަސް ހޮސްޕިޓަލުތައް ގާއިމުކޮށް، ފަސޭހައިން ރައްޔިތުންނަށް ސިއްހީ ޚިދުމަތް ލިބޭނެ ރަނގަޅު އިންތިޒާމެއް ހަމަޖެހިފައި އޮންނަން ޖެހޭނެކަމަށް މެންބަރުން ވިދާޅުވި އެވެ. މިއީ މިސަރުކާރުގެ މައްސަލައެއް ނޫންކަމަށާއި މިސަރުކާރުން ސިއްހީ ނިޒާމު ހަރުދަނާ ކުރުމަށް މަސައްކަތްތަކެއް ކުރަމުންދާކަން ވެސް މެންބަރުން ވަނީ ވިދާޅުވެފަ އެވެ.

ޝިޔާމު ހުށަހެޅުއްވި ކުއްލި މައްސަލާގައި އައްޑޫ ސިޓީގެ މެންބަރުންގެ ތެރެއިން ބަހުޘް ނުކުރައްވަނީ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެކަންޏެވެ. މީގެކުރީގެ ޖަލްސާތަކުގައި އަސްލަމް ބައިވެރިވެވަޑައިގެންނެވި ނަމަވެސް އަންގާރަ ދުވަހުގެ ޖަލްސާގައި އަސްލަމް ބައިވެރިވަޑައިގެންނެވިކަން ސާފެއް ނުވެއެވެ.