މޮނިޓަރިންގެ ހާލުތުގައި ނެތް ރަށްރަށުގައި ތިބި މީހުން މާކުރަތަށް އައުމުގެ ހުއްދަ ދެނީ

މޮނިޓަރިންގެ ހާލުތުގައި ނެތް ރަށްރަށުގައި ތިބި މީހުން އަނބުރާ ރަށަށް އައުމުގެ ހުއްދަ މާކުރަތު ކައުންސިލުން ދިނުމަށް ނިންމައިފި އެވެ.

މާކުރަތު ކައުންސިލުން ބުނީ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކާތެރިކަމަށްޓަކައި، ޢާންމު ޞިއްޙަތު ރައްކާތެރިކަމުގެ ޤާނޫނުގެ ދަށުން އަޅަންޖެހޭ ޚާއްޞަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، މި ޤާނޫނުގެ 33 ވަނަ މާއްދާގެ ދަށުން، އާންމު ޞިއްޙަތުގެ ކުއްލި ނުރައްކަލުގެ ހާލަތެއްވަނީ އިޢުލާން ކޮށްފައިވާ ކަމަށެވެ.

އަދި މިހާލަތު ދިގުދެމިގެން ދިއުމުގެ ސަބަބުން މާކުރަތަށް ދަތުރު ނުކުރެވި ރާއްޖޭގެ ރަށް ރަށުގައި ތިބި މާކުރަތު މީހުން ރަށަށް އައުމަށް އެދެމުންދާތީ އެފަދަ ފަރާތްތަކަށް ރަށަށް އައުމުގެ ހުއްދަ ދިނުމަށް ހަމަޖެހިފައިވާ ކަމަށެވެ. އަދި މިހުއްދަ ދެވޭނީ މޮނީޓަރިންގ ހާލަތުގައި ނެތް ރަށްރަށުގައި ތިބި މާކުރަތު މީހުންނާއި އެމީހުންގެ އަނބި/ފިރިންނާއި ދަރިންނަށް ކަމަށް ވެސް މާކަރަތު ކައުންސިލުން ބުނެއެވެ.

އެ ރަށު ކައުންސިލުން ބުނީ މާކުރަތަށް އަންނަން ބޭނުންވާ ފަރާތްތަކުން 9138782 ނަންބަރަށް ގުޅާ ވީ އެންމެ އަވަހަކަށް މަޢުލޫމާތު ހިއްސާ ކުރުމަށް އެދޭ ކަމަށެވެ.

ރަށުން ބޭރުން ރަށަށް އަންނަ މީހުން ސަމާލުކަން ދޭންޖެހޭ ކަންކަން ވެސް އެ ކައުންސިލުން ވަނީ އަންގާފައެވެ. އެގޮތުން ރަށުން ބޭރުން އަންނަ މީހުން އެހެން މީހުންނާއި އެކަހެރިކޮށް ވަކިން ތަނެއްގައި ތިބުމާއި، ގޭގައި މީހުން އުޅޭކަމުގައިވާނަމަ ވަކިން ކޮޓަރިއެއްގައި ހުރުން އަދި ރަށުން ބޭރުން އައި މީހާއާއި އެމީހާ ހުންނަގޭ މީހުން 14 ދުވަސްވަންދެން އެކަހެރިވުން ހިމެނެ އެވެ.

މީގެ އިތުރުން ބަލިން ރައްކާތެރިވުމަށާއި، ބަލި ފެތުރުން ކޮންޓްރޯލް ކުރުމަށް ކަމާބެހޭ އިދާރާތަކުން ދީފައިވާ އިރުޝާދުތަކާ އެއްގޮތަށް ހުރިހާ ވަގުތެއްގައިވެސް ޢަމަލު ކުރުމާއި، ކޮވިޑް-19 އަށް ޝައްކުވާ އަލާމާތެއް ފެނިއްޖެނަމަ ލަސްނުކޮށް ހެލްތް ޕްރޮކްޝަން އެޖެންސީއަށް އެންގުމަށް ވަނީ އެދިފަ އެވެ.