"ކޯން ބަނޭގާ ކަރޯރްޕަތީ"ގެ 12 ވަނަ ސީޒަންގައި ރަޖިސްޓަރީވުމަށް ހުޅުވާލައިފި

"ހޫ ވޯންޓްސް ޓު ބީ އަ މިލިއަނަރ"ގެ ނަމުގައި ހިންގަމުން އަންނަ ޝޯވ "ކޯން ބަނޭގާ ކަރޯރްޕަތީ" (ކޭބީސީ) ގެ ނަމުގައި އިންޑިއާގެ ސޮނީ ޓީވީއިން ދައްކަމުން އަންނަ ސުވާލު ޕްރޮގުރާމުގެ އައު ސީޒަނަށް ރަޖިސްޓްރީވުމަށް ހޮނިހިރު ދުވަހުގެރޭ ހުޅުވާލައިފިއެވެ.

މި ޝޯވއަކީ މިލިއަނަރަކަށް ވުމުގެ ނަސީބު އިންޑިއާގެ އެތައް ބަޔަކަށް ލިބިގެންދާ ފޯރިގަދަ ޝޯއެކެވެ. މިއީ މި ޝޯވ ގެ 12 ވަނަ ސީޒަންއެވެ.

ޝޯވ ގައި ރަޖިސްޓްރީވުމަށް ސޮނީ ޓީވީން މެއި ނުވަ ވަނަ ދުވަހުން ފެޝިގެން ބާވީސް ވަނަ ދުވަހުގެ ނިޔަލަށް ކޮންމެ ދުވަހަކު ދައްކަމުންދާ ސުވާލަށް ޖަވާބު އެސްއެމްއެސް އެއް މެދުވެރިކޮށް ފޮނުވުމަށް ވަނީ ބުނެފައެވެ. ޗެނަލް ގޭގައި ތިބެގެން ނުފެންނަ ފަރާތްތަކަށް ސޮނީ ލިވް އެޕް މެދުވެރިކޮށްވެސް ސުވާލުތައް ފެންނަން ހުންނާނެއެވެ. އެޕް މެދުވެރިކޮށް ޖަވާބުވެސް ދެވޭގޮތް ވަނީ ހަމަޖައްސާފައެވެ.

އިންޑިއާގެ ގިނަ ބައެއްގެ ތަރުހީބު ލިބިފައިވާ މި ޝޯވ އަކީ މަޝްހޫރު ތަރި އަމީތާބް ބައްޗަން ހުށަހަޅައިދެމުން އަންނަ ޝޯވ އެކެވެ. އަމީތާބުގެ އިތުރުން ޝާހްރުކް ޚާން ވެސް ވަނީ މި ޝޯވގެ ސީޒަނެއް ހުށަހަޅައިދީފައެވެ.

"ކޯން ބަނޭގާ ކްރޯރްޕަތީ" (ކޭބީސީ) ގެ ބާރަ ވަނަ ސީޒަންގެ ފުރަތަމަ ޕްރޯމޯ އަމީތާބު ވަނީ އޭނާގެ ގޭގައި ހުރެގެން އަމިއްލައަށް ޝޫޓްކޮށްފައެވެ. މި ޕްރޮމޯ މެއި މަހުގެ ނުވަވަނަ ދުވަހުން ފެށިގެން 22ވަނަ ދުވަހުގެ ނިޔަލަށް ޝޯވ ޓެލެކާސްޓްކުރާ ސޮނީ ޓީވީން ދައްކަމުންދާނެއެވެ. މި ދެ ހަފުތާތެރޭ ކޮންމެ ދުވަހަކުވެސް އަމީތާބުގެ ސުވާލެއް ބެލުންތެރިންނަށް ހުށަހަޅާނެއެވެ.

އޮޑިޝަން ބަހާލާފައިވަނީ މައިގަނޑު ހަތަރު ބަޔަކަށެވެ. އެއީ ރެޖިސްޓްރޭޝަން، ސްކްރީނިންގ، އޮންލައިން އޮޑިޝަން އަދި އިންޓަވިއުއެވެ. ފުރަތަމަ ދެ ހަފުތާގައި ކުރާ ސުވާލުތަކުން ރަނގަޅު ޖަވާބުދޭ ފަރާތްތައް ޝޯޓް ލިސްޓުކޮށް ދެވަނަ އެފަރާތްތަކަށް ގުޅުމަށްފަހު ދެވަނަ ބުރަކަށް ހޮވޭނެއެވެ. އަދި އޮންލައިން އޮޑިޝަން ކުރިއަށް ގެންދާނީ ޖީކޭ ޓެސްޓާއި އޮންލައިން ސަބްމިޝަންމިޝަން އަކާއި ވެސް އެކު "ސޮނީ ލިވް" އެޕް މެދުވެރިކޮށެވެ. މިއީ މި ޝޯވ ގެ އޮޑިޝަނެއް ޑިޖިޓަލް ކޮށް ބާއްވާ ފުރަތަމަ ފަހަރުކަން ވެސް ފާހަނގަކޮށްލެވެއެވެ. އެއަށްފަހު ހޮވޭ ފަރާތްތަކަށް ވީޑިއޯ ކޯލް މެދުވެރިކޮށް ގުޅަމުންދާނެއެވެ. މި ފަރާތްތަކުގެ ތެރެއިން ހޮވާލެވޭ ފަރާތްތަކަކަށް އަމީތާބާއެކު ސްޓޭޖާއި ހަމައަށް ދެވޭނެއެވެ. ކޮވިޑް 19ގެ މި ބަލިމަޑުކަމުގެ ދުވަސްވަރުގައި ކޭބީސީގެ ޕްރޮމޯޝަން ވެސް ގުޅުވާލާފައިވަނީ މިކަމާއެވެ. އެހެންކަމުން ޝޯވގެ މިފަހަރުގެ ޓެގްލައިނަކީ "ކޮންމެ އެއްޗެއް ވެސް ހުއްޓުމަކަށް ގެނެވިދާނެ ކަމެވެ. ހުވަފެނަކަށް ހުއްޓުމެއް ނާންނާނެ ކަމެވެ."

ކޭބީސީގެ ސަބަބުން ވަރަށް ފަގީރު މީހުންވެސް މިލިއަނަރުންނަށްވެފައި ހުރިކަން ފާހަނގަކޮށްލެވެއެވެ.