ކޮވިޑް-19 ގެ ނުރައްކަލާއި ގުޅިގެން ޖަރުމަންވިލާތު ސަރުކާރުން އިޢުލާނުކޮށްފައިވާ ފުރަބަންދުގެ ޙާލަތު ލުއިކުރަން ނިންމައިފިއެވެ.

ބުދަ ދުވަހު ބޭއްވި އެޤައުމުގެ ވަޒީރުންގެ މަޖިލީހުގެ ބައްދަލުވުމުގައި އެޤައުމުގެ ޗާންސެލަރ އެންގެލާ މަރކެލް ވަނީ ފުރަބަންދަށް ލުޔެއް ދިނުމަށް އެކި ފިޔަވަހިތަކައް ބަހާލައިގެން ތަންފީޒުކުރުމަށް ނިންމަވާފައިވަ ފިޔަވަޅުތައް އިޢުލާނުކުރައްވާފައެވެ. މިހުރިހައި ފިޔަވަޅުތަކަކީ އެޤައުމުގެ ފެޑެރަލް ސަރުކާރުތަކުގެ 16 ވެރިންގެވެސް ރުހުމާއެކު ނިންމަވާފައިވާ ނިންމެވުމެއް ކަމަށް މަރކެލް ވިދާޅުވެފައިވެއެވެ.

ކެބިނެޓް ބައްދަލުވުމުގައި މަރކެލް ވިދާޅުވީ ކޮވިޑް-19 ގެ އުދަނގޫ ނުވަތަ ނުވަތަ ނުރައްކާ ބޮޑު ދުވަސްވަރު ކަޑައްތުކުރެވިފައިވާކަމަށާއި، އެހެންނަމަވެސް އަދިވެސް ކުރިމަތިލާންޖެހޭ ކަންތައްތައް ގިނަ ކަމަށެވެ.

ކެބިނެޓް ބައްދަލުވުމަށްފަހު، ވެރިރަށް ބަރލިންގައި ބޭއްވި ނޫސްވެރިންގެ ބައްދަލުވުމެއްގައި މަރކެލް ވިދާޅުވީ މި ދަނޑިވަޅުގައި ސަރުކާރުން އެންމެ އިސްކަމެއް ދެނީ ނުވަތަ ސަރުކަރުގެ ޢަމާޒަކީ ވައިރަސް ފެތުރޭ މިންވަރު މަދުކުރުން ކަަމަށެވެ. އަދި އެ ޢަމާޒަށް ވާޞިލުވެފައިވާކަަން ބަޔާންކުރައްވާ މަރކެލް ވިދާޅުވީ ތަޖުރިބާ ކުރެއްވުނު ކަންތައްތަކުގެ ތެރެއިން ޞިއްޙީ ނިޒާމުވެސް ހަރުދަނާކުރެވިފައިވާކަމަށެވެ. އަދި މިކަމަށް ރިޢާޔަތްކޮށް އިޢުލާނުކޮށްފައިވާ ފުރަބަންދުގެ ޙާލާތައް ލުޔެއް ގެންނަން މައި އަދި ފެޑެރަލް ސަރުކާރުގެ އިސް މަސްއޫލުވެރިން އެއްބަސްވެވަޑައިގެންފައިވާކަމަށެވެ.

އޭނާ ވިދާޅުވީ ފުރަބަންދަށް ގެނައި ލުއި ތަކުގެ ތެރޭގައި ކޮންމެ ގޭބިސީއަކުން ދެމީހުންނަށް ގެއިން ބޭއްރަށް ބައްދަލުވުންތަކައް ދާން ނިކުތުމުގެ ފުރުޞަތު ދޭނެކަމަށެވެ. އަދި ގިނަ ފިހާރަތައް ހުޅުވަން ހުއްދަ ދެއްވާނެކަމަށެވެ. އަދި ޢާންމު ދަތުރުފަތުރުތައް ހުޅުވާލުމަށްވެސް ވަނީ ނިންމަވާފައިވާކަމަށެވެ. އެހެންނަމަވެސް ހުރިހައި އެންމެންވެސް ޢާންމު ސާފުތާހިރުކަމާއި، ޚިދުމަތް ހޯދާއިރުއައި ބޭރުގައި ދިރިއުޅޭއިރު ދެމީހުންގެ ދޭތެރޭގައި 1.5 މީޓަރުގެ ދުރުމިނެއް ބެހެއްޓުމާއި، އަނގަޔާއި ނޭފަތް ނިވާވާހެން މާސްކް އެޅުން ލާޒިމުވާކަމަށެވެ.

ޖަރުމަންވިލާތުގެ ސަރުކާރުން ފުރަބަންދުކުރިކަން އިޢުލާނުކުރީ މަރޗްމަހުގެ 17 ވަނަ ދުވަހުއެވެ. މިއަދުގެ ކެބިނެޓް ބައްދަލުވުމުގައި ނިންމި ނިންމުންތަކާއި ގުޅިގެން ފިހާރަތައް ވަނީ ހުޅުވާފައެވެ. އަދި ކުރިޔަށް އޮތްތާގައި ހުރިހައި ސްކޫލެއް ހުޅުވާ، ކުޅިވަރު ޙަރަކާތްތައް ވެސް ފަށަން ވަނީ ނިންމާފައެވެ.

ޖަރުމަންވިލާތުގައި މިހާތަނަށް އާއިރު، 167,372 މީހުން ކޮވިޑް-19އަށް ޕޮޒިޓިވްވެ، 6,993 ވަނީ މަރުވެފައެވެ. ފަރުވަދީންގެން 137,400 މީހުން ރަނގަޅުކުރެވިފައިވާއިރު، އަދިވެސް 22,979 މީހަކަށް ދަނީ ފަރުވާ ދެމުންނެވެ. މީގެތެރެއިން 1,937 މީހުންގެ ޙަލަތު ސީރިއަސްއެވެ. ޖަރުމަންވިލާތަކީ ވިލާތު އިއްތިހާދުގެ ޤައުމުތަކުގެ ތެރެއިން ހަތަރުވަނަޔަށް އެންމެ ގިނަ ކޭސް ރިޕޯޓުކުރި ޤައުމެވެ.