އީޔޫ އިން ސޫދާނަށް 124 މިލިއަން ޑޮލަރުގެ އެހީ ދެނީ
25 އޮކްޓޯބަރު 2017 | ބުދަ 18:33ސޫދާނުގައި ހިނގަމުންދާ ދާހިލީ ހަނގުރާމައިގެ ސަބަބުން އެތައްހާސް ބަޔަކު ވަނީ ހާލުގައި ޖެހިފައި
ސޫދާނުގެ ހާލުގައި ޖެހިފައިވާ ބައެއް
އިންސާނީ އެހީއަށާއި އަދި ތަރައްގީގެ އެކި ކަންކަމަށް ޔޫރަޕިއަން ޔޫނިއަން (އީޔޫ) އިން ސޫދާނަށް 124 މިލިއަން ޑޮލަރު ދޭން ނިންމައިފިއެވެ.
އީޔޫ އިން ސުދާނަށް ދޭން ނިންމި އެހީހާ ގުޅޭގޮތުން އީޔޫ ކޮމިޝަނުން ހޯމަ ދުވަހު ބުނެފައި ވަނީ، ސޫދާނަށް ދޭން ނިންމާފައިވާ ފައިސާ ޚަރަދު ކުރެވޭނީ މިހާރު މިހާރަށް ފޯރުކޮށްދޭން ކާބޯތަކެއްޗާއި، ފެނާއި، ނަރުދަމާގެ ނިޒާމު ގާއިމު ކުރުމަށާއި، ތައުލީމާއި އަދި ސިއްހީ އެކި ކަންކަމަށް ކަމަށެވެ. އަދި ގެދޮރު ދޫކޮށް ދާން ޖެހިފައިވާ ފަރާތްތައް ބަލަހައްޓަމުންދާ އާންމުންނަށް ވެސް މި ފައިސާ އިން އެހީ ލިބިގެން ދާނެ ކަމަށް ރިޕޯޓުތައް ބުނެއެވެ.
އީޔޫގެ ހިއުމެނިޓޭރިއަން އެއިޑް އެންޑް ކްރައިސިސް މެނޭޖްމަންޓް ކޮމިޝަނާ ކްރިސްޓޮސް ސްޓައިލިއަނައިޑް ވިދާޅުވީ އޭނާ ދެކުނު ދާރްފޫރް ކުރެއްވި ދަތުރުފުޅެއްގައި ގެދޮރު ދޫކޮށްދާން ޖެހިފައިވާ މީހުންނަށް ކޮންމެހެންވެސް އެހީ ލިބެން ޖެހޭނެ ކަން އެނގިވަޑައިގެންނެވި ކަމަށާ އަދި ދެކުނު ސޫދާނުން އަންނަ ރެފިއުޖީންނަށްވެސް އެހީބޭނުންވާ ކަން އެގިވަޑައިގެންނެވި ކަމަަށެވެ.
އދ އިން ހާމަ ކުރާ ގޮތުން އިންސާނީ އެހީ ބޭނުންވާ 4.8 މިލިއަން މީހުން ސޫދާނުގައި އެބަތިއްބެވެ. އޭގެތެރެއިން ގިނަ މީހުން ތިބީ ދާރްފޫެރް ސަރަހައްދުގައި ކަމަށްވެސް އދ އިން ބުނެއެވެ.
