މާލެ ޞަރަޙައްދުތަގައި ކޮންސްޓްރަކްޝަންގެ މަސައްކަތް ކުރާ އެކިއެކި ސައިޓްތަކުގައި ބިދޭސީން ދިރިއުޅޭ ކަމަށާއި، އެ މައްސަލަ ވެސް ޙައްލު ކުރާނެކަމަށް ސަރުކާރުން ބުނެފިއެވެ.

ކޮވިޑް-19 އާއި ގުޅިގެން ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އެ ސެންޓަރުގެ ތަރުޖަމާނު މަބްރޫކް ޢަޒީޒު ވިދާޅުވީ ކޮންސްޓްރަކްޝަން ސައިޓްތަކުގައި ބިދޭސީން ތިބި ތަންތަން ވެސް އެބަހުރި ކަމަށާއި، އަދި ކުދި 2-3 ރޫމް އެޕާޓްމަންޓްގައި، އެތަންތަނަށް ނުކަތާ ވަރަށްވުރެ ގިނަ މީހުން ދިރިއުޅެމުން އަންނަ ތަންތަނާއި ލޭބަރ ކުއާޓަރުތައް ވެސް ސަރވައިލެންސްގެ ދަށުން ފާހަގަ ކުރެވިފައިވާ ކަމަށެވެ.

ނަމަވެސް މިކަމުގައި އެންމެ ބޮޑަށް ބަލަންޖެހޭ ތަންތަން ދެނެގަނެ، މިހާރު އެންމެ ގިނަ މީހުން ތޮއްޖެހިފައި ތިބި ތަންތަން ޗެކް ކުރަމުންދާ ކަމަށާއި، މިއީ އާދައިގެ މަތިން ކުރިޔަށްގެންދާ ކަމެއްކަމަށް މަބްރޫކް ވިދާޅުވިއެވެ. އަދި މިކަމުގައި ވަރަށް ގިނަ އެފަދަ ތަންތަން ފާހަގަވެފައިވާ އިރު، އެ ހުރިހާތަނަކަށް މަޑުމަޑުން ބަލަމުންދާނެ ކަމަށާއި، ފުރަތަމަ އިސްކަމެއްދީގެން ދީގެން ބަލަމުން ދަނީ އެންމެ ނުރައްކާބޮޑުކަމަށް ފާހަގަ ކުރެވޭ 23 ތަނެއް ކަމަށް މަބްރޫކް ވިދާޅުވިއެވެ.

މީގެ އިތުރުން މާލޭގެ ބައެއް ތަންތަނުގައި ކޮންސްޓްރަކްޝަން މަސައްކަތް ކުރަމުން އަންނަ ކަން ފާހަގަ ކުރައްވާ މަބްރޫކް ވިދާޅުވީ އެފަދަ ތަންތަން ބެލުމުގައި ފުލުހުންގެ ފަރާތުން ޙަރަކާތްތެރިވެ، ބައެއް ތަންތަނުގެ މަސައްކަތް ހުއްޓުވާފައިވާ ކަމަށެވެ. އަދި އެތަންތަނަކީ އެއްވެސް ހުއްދައަކާ ނުލާ މަސައްކަތްކުރަމުން ދިޔަ ތަންތަންކަން މަބްރޫކް ފާހަގަކުރެއްވިއެވެ.

މަބްރޫކް ވިދާޅުވީ މާލެ ސިޓީ ކައުންސިލުން މަސައްކަތް ކުރާ ބައެއް ސައިޓްތަކަށް ހުއްދަދޭ ކަމަށާއި، އެއީ ފައުންޑޭޝަން އެޅުމަށް ކޮނެފައި އޮންނަ ތަނެއް، ކޮނެފައި އޮންނަތާ ގިނަ ދުވަސްވުމުގެ ސަބަބުން ވިއްސާރަވެ ފެން ހެދޭކަމުގައިވާނަމަ ޖެހިގެން ހުންނަ ޢިމާރާތްތަކަށް ނުރައްކަލަކަށްވެއެވެ، އެތަންތާ އަޑީގައި ހުންނަ ވެލިގަނޑު ދަމައިގަތުމުން ޢިމާރާތް އަރިއަޅާލުން، ރެނދުލުން އަދި ވެއްޓި ދާނެތީ ކަމަށެވެ. އަދި ހުއްދަ ދީގެން މަސައްކަތް ކުރި ނަމަވެސް އެތަންތަނުގައި މަސައްކަތްދާގޮތް ބަލަމުންދާނެ ކަމަށާއި، މަސައްކަތް ކުރަނީ ކިތައް މީހުންކަންވެސް ސިޓީ ކައުންސިލުން ބަލަމުންދާނެ ކަމަށެވެ.