ލާމަރުކަޒީ ބިލުގެ މައްސަލަ އިދިކޮޅުން ސުޕްރީމް ކޯޓަށް ވައްދަނީ
ބިލް ހުށައެޅުއްވީ މެމްބަރު ހަސަން ލަތީފް
އިދިކޮޅު ޕީޕީއެމް/ޕީއެންސީ ގައި ހިމެނި ވަޑައިގަންނަވާ މަޖިލީހުގެ މެމްބަރުން
ރައްޔިތުންގެ މަޖިލީހަށް ހުށަހެޅިފައިވާ ދިވެހިރާއްޖޭގެ އިދާރީ ދާއިރާތައް ލާމަރުކަޒުން ހިންގުން ކަށަވަރު ކުރުމުގެ ބިލަކީ ގާނޫނު އަސާސީއާ ހިލާފުބިލެއް ކަމުގައި ކަނޑައެޅުމަށް އެ މައްސަލަ ސުޕްރީމް ކޯޓަށް ހުށަހެޅުމުގެ މަސައްކަތް ފަށާފައިވާ ކަމަށް އިދިކޮޅު ޕީޕިއެމް/ޕީއެންސީން ބުނެފިއެވެ.
ސަރުކާރުގެ ފަރާތުން އެ ބިލު މަޖިލީހަށް ހުށައަޅާފައިވަނީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއެވެ. ބިލް ފާސްކޮށްފައިވަނީ ހޯމަ ދުވަހު ބޭއްވި ޖަލްސާގައި މަޖިލީހުގެ 53 މެމްބަރުންގެ ވޯޓާއި އެކުއެވެ. އެ ބިލަކީ މިހާރު ތިބި ކައުންސިލްތަކުގެ ދައުރު ހަމަވިނަމަވެސް، އިންތިހާބު ބޭއްވެންދެން މިހާރު ތިބި ކައުންސިލަރުން ބޭތިއްބުމަށް ރައްޔިތުންގެ މަޖިލީހަށް ހުށަހަޅާފައިވާ ބިލެކެވެ.
ޕްރޮގްރެސިވް ކޯލިޝަނުން ނެރެފައިވާ ބަޔާނެއްގައި ބުނީ، އެ ބިލަކީ ގާނޫނުއަސާސީ އާއި ކަނޑައެޅިގެން ހިލާފަށް މަޖިލީހުން ފާސްކުރުމަށް ހުށަހަޅާފައިވާ ބިލެއް ކަމަށެވެ. އަދި ގާނޫނުއަސާސީ ގައި ލޯކަލް ކައުންސިލްތަކުގެ ދައުރު ކަނޑައެޅި ބަޔާންވެފައި ވަނިކޮށް މަޖިލީހުންފާސް ކުރާ އެހެން ޤާނޫނަކުން ޤަނޫނުއަސާސީގެ މާއްދާއެއް ބާޠިލެއް ނުކުރެވޭނެ ކަމަށެވެ.
އަދި ޤާނޫނުއަސާސީ އާއި ހިލާފަށް ފާސްކުރާ ކޮންމެ ގާނުނަކީ ބާތިލު ގާނޫނެއް ކަމަށް ގާނޫނުއަސާސީގައި ކަނޑައެޅި ބަޔާންކޮށްފައިވާއިރު، ގާނޫނުއަސާސީގައި ބަޔާންވެފައިވާ ކަމެއް ކުރުމަށް ހުރަސްއެޅޭ ފަދަ ކަމެއް ދިމާވެ، އެކަމުގެ ހައްލު ގާނޫނު އަސާސީން ނުލިބޭނަމަ އެކަމުގެ ފަރުވާ ހޯދަން ޖެހޭ ތަނަކީ ސުޕްރީމް ކޯޓުކަމަށްވެސް ގާނޫނުއަސާސީގައި ބަޔާންކޮށްފައިވާ ކަމަށެވެ. އެހެން ކަމުން އެމައްސަލަ ސުޕްރީމް ކޯޓަށް ހުށަހެޅުމުގެ ކަންކަން އެ ކޯލިޝަނުން ކުރަމުން ގެންދާ ކަމަށް ޕީޕީއެމް/ޕީއެންސީން ބުންޏެވެ.
އިދިކޮޅުން ބުނީ އެ ބިލަކީ ގާނޫނުއަސާސީއަށް ގޮންޖަހާ މަޖިލީހުގައި އެމްޑީޕީއަށް އޮތް މެޖޯރިޓީގެ ނާޖާއިޒް ފައިދާ ނަގައި، ބޭނުންވާ ގޮތަކަށް އިންތިޚާބުތަކާއި ކުޅުމުގެ ދޮރު ހުޅުވުމުގެ ފުރުސަތު ހޯދުމަށް އެމްޑީޕީން ކުރަމުން ގެންދާ މަސައްކަތެއްކަމުގައި ކަމަށެވެ.
ގާނޫނުއަސާސީއަށް ގޮންޖައްސަވަން މަޖިލީހުގެ ރައިސް އިސްވެ ހުންނަވައިގެން ކުރައްވަމުން ގެންދަވާ މަސައްކަތްތައް މިހާރުން މިހާރަށް ހުއްޓާލުމަށް އިދިކޮޅުން ވަނީ ގޮވާލާފައެވެ.
