"ދަތިތަކާ އެކުގައިވެސް މިދުވަސްކޮޅު ގޭގައި މަޑުކޮށްލަދެއްވާ"
ޞިއްޙީ ޚިދުމަތްތެރިން، އަވަދިނެތި މަސައްކަތް ކުރައްވަނީ، އެންމެންގެ ރައްކަލަކަށްޓަކައި
ލޮކްޑައުންއާއެކު މާލޭގެ ފިހާރައެއްގައި މީހުން އެއްޗެހި ގަންގަން ކިއުގައި ޖެހިގެން - ދަތިތަކާއެކު ވެސް ގޭގައި މަޑުކޮށްދެއްވުމަށް ރައީސް ވަނީ އެދިވަޑައިގެންފައި
މިހާރު ކުރިމަތިވެފައިވާ ދަތިތަކާ އެކުގައިވެސް، ތިޔަ ބޭފުޅުން މިދުވަސްކޮޅު ގޭގައި މަޑުކޮށްލަދެއްވުމަށް ރައީސް އިބްރާހިމް މުހައްމަދު ސޯލިހު ދިވެހި ރައްޔިތުންގެ ކިބައިން އެދިވަޑައިގެންފިއެވެ.
ކޮވިޑް-19 އާއި ގުޅިގެން ގައުމާ މުހާތަބު ކުރައްވާ ރައީސް ވިދާޅުވީ ޞިއްޙީ ޚިދުމަތްތެރިން، އަވަދިނެތި މަސައްކަތް ކުރައްވަނީ، އެންމެންގެ ރައްކަލަކަށްޓަކައި ކަމަށެވެ. އަދި ސަރުކާރުން މަސައްކަތް ކުރަމުން އަންނަނީ، ޢާންމު ބޭނުންތަކަށް ބޭނުންވާ ތަކެތި، އެއްވެސް ދަތިކަމެއް ނެތި ލިބޭނެ ގޮތް ހައްދަވައި ދެއްވުމަށް ކަމަށް ރައީސް ވިދާޅުވިއެވެ.
މުޅި ރާއްޖެ ލޮކްޑައުންގެ ޙާލަތުގައި އޮތަސް، ދައުލަތެއްގެ ގޮތުގައި ކުރަންޖެހޭ ވަރަށް ގިނަ ކަންތައް އެބަހުރި ކަމަށާއި، ދޭންޖެހޭ ޚިދުމަތްތައް ވެސް އެބަހުރި ކަމަށް ރައީސް ވިދާޅުވިއެވެ.
ރައީސް ވަނީ ހުރިހާ ފަރާތްތަކަށް، ދިވެހި ރައްޔިތުންގެ ނަމުގައި ޝުކުރު ދަންނަވާފައެވެ. އަދި ރާއްޖޭގެ ވަރަށް ދީލަތި ބޭފުޅުންކޮޅެއްގެ ފަރާތުންވެސް، މިކަމުގައި ވަރަށް އަގުހުރި އެހީތަކެއް ލިބެމުން އަންނަކަން ފާހަގަ ކުރައްވާ އެ ހުރިހާ ބޭފުޅުންނަށްވެސް ރައީސް ޝުކުރު އަދާކުރެއްވިއެވެ.
