ޔޫއޭއީން، އިންޑިއާއަށް ހަތް މެޓްރިކް ޓަނުގެ ޞިއްޙީ އެހީގެތަކެތި ހަދިޔާކޮށްފި

ޔުނައިޓެޑް އަރަބް އެމިރޭޓްސް(ޔޫއޭއީ) އިން އިންޑިއާއަށް ހަތް މެޓްރިކް ޓަނުގެ ޞިއްޙީ އެހީގެތަކެތި ހަދިޔާކޮށްފިއެވެ.

މިއީ، އިންޑިއާއިން ކޮވިޑް-19އާއި ދެކޮޅަށް ކުރަމުންދާ ހަނގުރާމައަށް އެހީތެރިވުމުގެ ގޮތުން ޔޫއޭއީންވީ އެހީއެކެވެ.

ޔުއޭއީ ސަރުކާރުން އިންތިޒާމު ކުރި ޚާއްޞަ ފްލައިޓަކުން މިތަކެތި އިންޑިއާއަށް ގެންދިޔައިރު، އެ ފްލައިޓުގައި ޞިއްޙީ މާހިރުންގެ 7،000 ބޭފުޅުންވެސް އިންޑިއާއަށް ދަތުރުކުރެއްވިކަމަށް އިންޑިއާގައި ހުންނަ ޔޫއޭއީ އެމްބަސީން ބުނެއެވެ. ޔޫއޭއީން އިންޑިއާއަށް ކަނޑައަޅުއްވާފައި ހުންނަވާ ސަފީރު އަޙްމަދު އަބްދުއްރަޙްމާން އަލް-ބައްނާ ވިދާޅުވީ މި އެހީއަކީ ދެޤައުމުގެ އަޚުވަތްތެރިކަމުގެ ގުޅުމުގެތެރެއިން ވެދިން އެހީއެއްކަމަށެވެ.

ކޮވިޑް-19 އާއި ހަނގުރާމަކުރުމަކީ މުޅި ދުނިޔެއަށް މިހާރު ކުރިމަތިވެފައިވާ އޮތް އެންމެ ބޮޑު ގޮންޖެހުން ކަމަށާއި، އެންމެ އިސްކަމެއް ދެނީ ވައިރަސް ކޮންޓްރޯލް ކުރުމަށް ކުރަމުންދާ މަސައްކަތް ވަރުގަދަކުރުމަށް ކަމަށް ސަފީރު ވިދާޅުވިއެވެ.

ކޮވިޑް-19ގެ ބަލިމަޑުކަމުގެތެރޭގައި ޔޫއޭއީންދަނީ ގިނަ ޤައުމުތަކަކަށް އެހީތެރިވެދެމުންނެެވެ. އެގޮތުން، މިހާތަނަށް 34 ޤައުމަކަށް 348 ޓަނުގެ ޞިއްޙީ އެހީގެތަކެތި ވަނީ ފޯރުކޮށްދީފައެވެ. އަދި 3،48،000 ޞިއްޙީ މާހިރުންވެސް ވަނީ ފަރުވާދިނުމުގައި ޙަރަކާތްތެރިވުމަށް ފޮނުވާފައެވެ.