ކ. މާފުއްޓަށް ދިޔަ މީހަކު ރަށަށް ނޭރުވި މައްސަލައިގައި އެލްޖިއޭއިން އެރަށު ކައުންސިލަށް ނަސޭހަތްތެރިވެއްޖެ

ކަރަންޓީން މުއްދަތު ހަމަކުރުމަށްފަހު ކ.މާފުއްޓަށް ދިޔަ މީހަކު ރަށަށް ނޭރުވި މައްސަލައިގައި ލޯކަލް ގަވަރމެންތް އޮތޯރިޓީން މާފުށީ ކައުންސިލަށް ނަސޭހަތްތެރިވެއްޖެއެވެ.

ލޯކަލް ގަވަމަންޓް އޮތޯރިޓީން މާފުށީ ކައުންސިލަށް ނަސޭހަތްތެރިވެފައިވާ ކަމަށް މި މައްސަލަ އެލްޖީއޭއަށް ހުށަހެޅި ފަރާތަށް ފޮނުވި ސިޓީގައި ބުނެފައިވަނީ ޤާނޫނާ ޤަވާއިދާ ޚިލާފަށް އެއްވެސް ކަމެއް ނުކުރުމަށާއި ކައުންސިލުން ކަންކަން ނިންމާއިރު އެކަމަކާ ގުޅޭ ފުރިހަމަ މަޢުލޫމާތު ކަށަވަރުކުރެވިފައި ނުވާނަމަ ނުވަތަ ސުވާލު އުފެދޭފަދަކަމެއް އޮތްނަމަ އެކަމެއްގައި އަތޮޅު ކައުންސިލާއި އެލްޖީއޭގެ ލަފާ ހޯދުމަށް އަންގާ އެ އޮތޯރިޓީން މާފުށީ ކައުންސިލަށް ނަސޭހަތްތެރި ވެފައިވާ ކަމަށެވެ.

އިންޑިއާއިން އައުމަށްފަހު ކަރަންޓީންގައި 14 ދުވަސް ހަމަކުރުމަށްފަހު ކޮވިޑް-19 ގެ ޓެސްޓް ނެގެޓިވް ވުމުން މާފުއްޓަށް ދިޔަ އަންހެނަކު ރަށަށް ނާރުވާ އެރަށު ކައުންސިލުން އިންޒާރު ދީފައިވަނީ ހުކުރު ދުވަހުއެވެ.

މި މައްސަލައާއި ގުޅިގެން އެ އާއިލާއިން ބުނެފައިވަނީ މާފުއްޓަށް ނާރުވާ އިންޒާރު ދީފައިވާ މީހާއަކީ އިންޑިއާއިން އައިސް މަޑިވަރުގައި ކަރަންޓީން ފުރިހަމަކޮށް ކޮވިޑް-19 އަށް ނެގެޓިވްވީމަ ދޫކޮށްލާފައިވާ ފަރާތެއް ކަމަށެވެ. އަދި އެ މީހާ ބޭނުންވީ ކުދިން ކައިރިއަށް ކ. މާފުއްޓަށް ދިއުމަށް ކަމަށާއި، ކޮވިޑް-19 ގެ ނެގެޓިވްވި ނަތީޖާ ކައުންސިލް ރައީސް އުސްމާން ރަޝީދު އަށް ފޮނުވާފައިވާނެ ކަމަށެވެ.

އަދި އެމްއެންޑީއެފް، އެންއީއޯސީ އަދި އެޗްޕީއޭއިން ހުއްދަ ދިނުމުން އެމްއެންޑީއެފް ލޯންޗްގައި މާފުއްޓަށް ދިއުމުން އެމްއެންޑިއެފް ލޯންޗް ކައިރި ކުރިޔަ ނުދީ ކައުންސިލް ރައީސް އުސްމާން ރަޝީދު އިސްވެ ހުރެ ހަޑި ހުތުރު ބަހުން މުއާލަމާތްކޮށް ރަށަށް އަރައިފިނަމަ ފައި ބިންދާލާފަ މޫދަށް އެއްލާލާނެ ކަމުގެ އިންޒާރު ދިން ކަމަށެވެ.

ރާއްޖޭގައި ކޮވިޑް-19 ހަލުވިކަމާއެކު ފެތުރެމުން އަންނަ އިރު ޑިރެކްޓަރ ޖެނެރަލް ޕަބްލިކް ހެލްތް މައިމޫނާ އަބޫބަކުރު ނެރުއްވާފައިވާ އަމުރާ ހިލާފަށް ބައެއް ކައުންސިލްތަކުން ހަރުކަށިކޮށް އަމަލުކުރަމުންދާ ކަމަށް އޭނާ ވަނީ މީގެ ކުރިން ވިދާޅުވެފައެވެ. އަދި އެކަން އެގޮތަށް ނުކުރުމަށް ޑިރެކްޓަރ ޖެނެރަލް އޮފް ޕަބްލިކް ވަނީ އަންގަވާފައެވެ.