މެދުކަނޑާލާފައިވާ އިނގިރޭސި ޕްރިމިއާ ލީގުގެ ބާކީ ހުރި މެޗުތައް ނުކުޅެ، ލީގު ނިންމާލުމަށް ލިވަޕޫލްގެ މޭޔަރު ޖޯ އެންޑާސަން ގޮވާލައިފި އެވެ.

މާޗު މަހުގެ 13 ވަނަ ދުވަހު ޕްރިމިއާ ލީގު ކުޅުން ހުއްޓާލިއިރު، ޕްރިމިއާ ލީގުގެ މެޗުތައް ސަޕޯޓަރުން ނުވައްދާ ކުޅޭ ގޮތަށް ޖޫން މަހުގެ 8 ވަނަ ދުވަހު ފަށައި ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަޝްވަރާ ކުރަމުންނެވެ. ލީގު މެދުކަނޑާލިއިރު އެއްވަނައިގައި 82 ޕޮއިންޓާއެކު ލިވަޕޫލް އޮތީ 25 ޕޮއިންޓުގެ ލީޑަކާ އެކު އެވެ. 30 އަހަރަށްފަހު ލީގު ޗެމްޕިއަންކަން ހޯދަން ލިވަޕޫލަށް ބޭނުންވަނީ އެންމެ 6 ޕޮއިންޓެވެ.

އެންޑަސަން ވިދާޅުވީ ލީގު މެޗުތައް ސަޕޯޓަރުން ނުވައްދައި ކުޅުނު ނަމަވެސް، ދަނޑު ބޭރަށް މީހުން އެއްވާނެ ކަމަށެވެ. އެހެން ކަމުން މި ދަނޑިވަޅުގައި ލީގު ކުރިއަށް ގެންދިއުމަކީ ގެއްލުންތަކެއް ވެދާނެ ކަމެއް ކަމަށް ވުމުން ލީގު ކެންސަލް ކުރަން އޭނާ ވަނީ ގޮވާލައްވާފައެވެ.

އެކަމަކު އެންޑަސަން ދެއްކެވި ވާހަކަތަކަށް ލިވަޕޫލުން ވަނީ ރައްދު ދީފައެވެ. އެގޮތުން ލިވަޕޫލުން ބުނީ މޭޔަރުގެ ބަސްތަކުން ކަންބޮޑުވާ ކަމަށާއި ދާދި ފަހުންވެސް މޭޔަރާއެކު ލީގު އަލުން ފެށުމާ ގުޅޭ ގޮތުން މަޝްވަރާ ކޮށްފައިވާނެ ކަމަށެވެ. އަދި މިފަދަ ދަނޑިވަޅެއްގައި ލީގު ކެންސަލް ކުރަން ގޮވާލުމަކީ ހިތާމަކުރާ ކަމެއް ކަމަށްވެސް ވަނީ ބުނެފައެވެ.

ޕްރިމިއާ ލީގު އަލުން ފަށަން މަސައްކަތް ކުރަމުން އަންނައިރު، މީގެ ކުރިން ފްރެންޗު ލީގާއި ނެދަލެންޑްސް ލީގު ވަނީ ކެންސަލް ކޮށްފައެވެ. ދެން ޔޫރަޕުން ލީގުތައް ކެންސަލް ކުރަން މަސައްކަތް ކުރަމުން އަންނަނީ ބެލްޖިއަމް އާއި ސްކޮޓްލެންޑުންނެވެ.