އެގްރޯ ނެޝެނަލް ކޯޕަރޭޝަންގެ އެމްޑީއަކަށް ހާރޫން ރަޝީދު
އެމްޑީގެ މަގާމަށް އައްޔަން ކުރީ މީގެ 2 ހަފްތާ ކުރިން
އެގްރޯ ނެޝެނަލް ކޯޕަރޭޝަންގެ އެމްޑީއަކަށް އައްޔަން ކުރެވުނު ހާރޫން ރަޝީދު (މ)
ދަނޑުވެރިކަމުގެ ސިނާއަތު ކުރިއެރުވުމަށް އުފެއްދި ކުންފުނި، އެގްރޯ ނެޝެނަލް ކޯޕަރޭޝަންގެ މެނޭޖިން ޑިރެކްޓަރަކަށް ހާރޫން ރަޝީދު އައްޔަނުކޮށްފިއެވެ.
ހާރޫން ރަޝީދަކީ ގއ. ވިލިނގިއްޔަށް ނިސްބަތްވެވަޑައިގަންނަވާ ފަރާތެކެވެ. މި ކުންފުންޏަކީ ސަރުކާރު ހިއްސާވާގޮތަށް މޯލްޑިވްސް ފައިނޭންސް ކޯޕަރޭޝަން މެނޭޖްމަންޓްގެ ސަބްސިޑަރީއެއްގެ ގޮތުގައި ހިންގާ ކުންފުންޏެވެ.
ހާރޫން މި މަގާމަށް އައްޔަންކޮށްފައިވަނީ މީގެ ދެ ހަފްތާ ކުރިންނެވެ. މިވަގުތު ކުންފުނިން ކުރަމުންދަނީ އެތަނަށް ބޭނުންވާ މުވައްޒަފުން ނެގުމުގެ މަސައްކަތެވެ. ނަމަވެސް މުވައްޒަފުން ނަގަންދެން ފިޝަރީޒް އެންޑް އެގްރިކަލްޗަރ، އިކޮނޮމިކް މިނިސްޓްރީގެ އިތުރުން ރޯޑް ޑިވެލޮޕްމަންޓް ކޯޕަރޭޝަންގެ މުވައްޒަފުން ވަގުތީގޮތުން އެ ކުންފުނީގައި މަސައްކަތް ކުރާ ގޮތަށް ވަނީ ހަމަޖެހިފައެވެ.
މި ކުންފުނިން ކުރާ މަސައްކަތުގެ ތެރޭގައި ރާއްޖޭގައި ދަނޑުވެރިން ހައްދާ ބާވަތްތައް ރަށު ކައުންސިލްތަކާއި ގުޅިގެން ގަތުމުގެ މަސައްކަތް ކުރަމުންދާނެއެވެ. އަދި އެތަކެތި ބާޒާރަށް ނެރެ ސަޕްލައި ކުރުމަކީ މި ކުންފުނިން ކުރަމުންދާނެ މަސައްކަތެކެވެ.
