ސެޕްޓެމްބަރުގެ ނިޔަލަށް އެއްވެސް ކުޅިވަރު ހަރަކާތެއް ފްރާންސްގައި ނުބޭއްވުމަށް އެންގުމުން، ފްރެންޗު ލީގު ކެންސަލް ކުރަން ޖެއްހިޖެ އެވެ.

އަންގާރަ ދުވަހުގެ ވަގުތެއްގައި ފްރާންސްގެ ބޮޑުވަޒީރު އެޑޮއާޑް ފިލިޕް ވަނީ ސެޕްޓެމްބަރުގެ ނިޔަލަށް އެއްވެސް ކުޅިވަރު ހަރަކާތެއް އެގައުމުގައި ނުބޭއްވުމަށް އަންގާފައެވެ.

އެހެކްންކަމުން ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ފްރާންސްގެ ލީގު 1 އާއި ލީގު 2 ގެ ކެންސަލް ކުރަން ވަނީ ޖެހިފައެވެ.

ރިޕޯޓުތައް ބުނާ ގޮތުން ފްރާންސްގެ ޕްރޮފެޝަނަލް ފުޓްބޯލް ލީގު (އެލްއެފްޕީ) އާއި ފްރެންޗް ފުޓްބޯލް ފެޑެރޭޝަނުން މެއި މަހުގެ ކުރީކޮޅު ލީގާ މެދި ވަކި ގޮތެއް ނިންމުމަށް ބައްދަލުކުރާނެ އެވެ. އެގޮތުން ޗެމްޕިއަންކަން ލިބޭ ޓީމާއި ރެލިގޭޓްވާ ޓީމުތައް ކަނޑައަޅާނީ މި ބައްދަލުވުމުގައެވެ.

ބޮޑަށް ބެލެވޭ ގޮތުގައި ލީގު ކެންސަލްކޮށް، ޗެމްޕިއަންކަން ދޭނީ އެއްވަނައިގައި އޮތް ޕީއެސްޖީ އަށެވެ. އެޓީމު އެއްވަނައިގައި އޮތީ 12 ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 68 ޕޮއިންޓު ލިބިފައިވާއިރު، ދެވަނައިގައި އޮތް އޮލިމްޕިކް މާސޭ އަށް ލިބިފައިވަނީ 56 ޕޮއިންޓެވެ.

ކޮވިޑް-19 އާ ގުޅިގެން ފްރެންޗް ލީގު ކެންސަލް ކުރަން ޖެހުނުއިރު، މީގެ ކުރިން ނެދަލެންޑްސް ފުޓްބޯޅަ ލީގު ވަނީ ޗެމްޕިއަނެއް ކަނޑަނާޅައި ކެންސަލް ކޮށްފައެވެ. ދެން ލީގުތައް ކެންސަލް ކުރަން މަސައްކަތް ކުރަމުން އަންނަނީ ބެލްޖިއަމް އާއި ސްކޮޓްލެންޑުންނެވެ.