މެދުކަނޑާލާފައި އޮތް ބެލްޖިއަން ޕްރޯ ލީގު މި ހިސާބުން ކެންސަލްކުރުމަށް، ކްލަބުތަކުގެ މެދުގައި ވޯޓު ނެގުން ފަސްކޮށްފި އެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ބެލްޖިއަން ޕްރޯ ލީގު މެދުކަނޑާލާފައިވާއިރު، ލީގުގެ އެއްވަނައިގައި އޮތް ކްލަބު ބްރޫޖަށް ތަށި ދޭން އެ ގައުމުގެ ފުޓްބޯޅަ ލީގުގެ ބޯޑުން މި މަހުގެ ކުރީކޮޅު ވަނީ ނިންމާފައެވެ. ލީގުގެ އެއްވަނައިގައި ބްރޫޖް އޮތީ 15 ޕޮއިންޓުގެ ލީޑަކާއެކުއެވެ. ލީގު ހުއްޓާލިއިރު، ފުރަތަމަ ބުރުގެ ބާކީ އޮތީ އެންމެ މެޗެކެވެ. ލީގު ރޭވިފައިވާ ގޮތުން ފުރަތަމަ ބުރުގައި 16 ޓީމު ކުޅޭއިރު، ދެވަނަ ބުރަށް ދަތުރުކުރާނީ ގަދަ 6 ޓީމެވެ.

ދާދި ފަހުން ޔުއެފާ އިން ވަނީ ހާލަތު ތަން ނުދޭނަމަ ލީގުތައް ކެންސަލް ކުރަން ހުއްދަ ދީފައެވެ. އެއާއެކު ބެލްޖިއަމް ލީގު ކެންސަލް ކުރުމަށް 24 ކްލަބުގެ މެދުގައި ވޯޓު ނެގުމަށް ވަނީ ނިންމާފައެވެ. އެކަމަކު ލީގު އަލުން ފެށުމަށް ފުރުސަތު ލިބިދާނެތީ، ކްލަބުތަކުގެ މެދުގައި ވޯޓު ނެގުން މިހާރު ވަނީ އަންނަ މެއި މަހުގެ ހަތަރުވަނަ ދުވަހަށް ފަސްކޮށްފައެވެ.

ލީގުތައް ކެންސަލް ކުރުމުގެ ހުއްދަ ދިން ނަމަވެސް، ޔުއެފާ އިން ވަނީ ޔޫރަޕްގެ މަގާމުތަކަށް ހޮވޭ ޓީމުތައް ކަނޑައަޅަން ޝަރުތުކޮށްފައެވެ.

މިހާތަނަށް ކޮވިޑް-19 އާ ގުޅިގެން ކެންސަލް ކޮށްފައިވަނީ ނެދަލެންޑްސް ފުޓްބޯޅަ ލީގެވެ. އެ ލީގު ކެންސަލް ކޮށްފައިވަނީ ޗެމްޕިއަނެއް ކަނޑަނާޅައެވެ. ދެން ލީގު ކެންސަލް ކުރަން މަސައްކަތް ކުރަމުން އަންނަނީ ސްކޮޓްލެންޑުންނެވެ.