މިސްކިތްތައް ހުޅުވާލުމުގެ ވިސްނުމެއް އަދި ނެތް: ސައުދީ ސަރުކާރު

ކޮވިޑް-19 ކޮންޓްރޯލް ކުރުމުގެ ގޮތުން ސައުދީ އަރަބިއްޔާގެ މިސްކިތްތައް ބަންދު ކުރުމަށް ނިންމާފައި ނިންމުމަށް ބަދަލު ގެންނަން އަދި ނުވިސްނާ ކަމަށް އެ ގައުމުގެ މިނިސްޓްރީ އޮފް އިސްލާމިކް އެފެއަރޒް، ކޯލް އެންޑް ގައިޑެންސް އިން ބުނެފިއެވެ.

ސައުދީ އަރަބިއްޔާގެ އިސްލާމިކް އެފެއަރޒް އިން މިކަން ހާމަ ކުރީ ހުކުރު ނަމާދަށާއި، ޖަމާއަތުގެ ނަމާދުތަކަށް މިސްކިތްތައް އަލުން ހުޅުވާލުމަށް ސައުދީ ސަރުކާރުން އުޅޭ ކަމަށް ސޯޝަލް މީޑީއާގައި ފެތެރެމުން ދިޔަ ވާހަކަތަކަށް ރައްދު ދިނުމުގެ ގޮތުންނެވެ.

ކޮރޯނާވައިރަސް ފެތުރުން ކޮންޓްރޯލް ކުރުމުގެ ގޮތުން ޖަމާއަތުގައި ނަމާދު ކުރުން ސައުދީ އަރަބިއްޔާގައި މެދުކަނޑާލީ ހުސްވި މަހުގެ ތެރޭގައެވެ. މިސްކިތްތައް ހުޅުވުމުގެ ހުއްދަ ދީފައިވަނީ ހަމައެކަނި ނަމާދަށް ބަންގި ގޮވުމަށް އެކަންޏެވެ.

ސައުދީ އަރަބިއްޔާގެ ހުރިހާ މިސްކިތެއްގައި ނަމާދު ކުރުން ވަގުތީ ގޮތުން މެދުކަނޑާލާފައި ވާއިރު، މަދު ބަޔަކާ އެކު މަސްޖިދުލް ހަރާމް އާއި މަސްޖިދުއް ނަބަވީ ގައި ހުކުރު ނަމާދު ކުރުމުގެ ހުއްދަ ސައުދީ ރަސްގެފާނު ވަނީ ދެއްވާފައެވެ. މި ދެ މިސްކިތުގައި ހުކުރު ނަމާދުގައި ބައިވެރިވަނީ މައިގަނޑު ގޮތެއްގައި އެ ދެ މިސްކިތް ބެލެހެއްޓުމުގައި އުޅޭ މުވައްޒަފުންނާއި މިސްކިތް ސާފު ކުރާ މީހުންނެވެ.

ޖަމާއަތުގައި ނަމާދު ކުރުމަށް މިސްކިތްތައް ބަންދު ވެފައި ވުމާއެކު ސައުދީ އަރަބިއްޔާގެ އާއްމުންގެ ގޭގޭގެ ސިޓިންގ ރޫމްތައް އާއިލާ އެކުގައި ނަމާދު ކުރާ ތަނުގެ ގޮތުގައި ވަނީ ހަދާފައެވެ. އަދި އާއިލާގެ އެކި މެމްބަރުން އެކި ނަމާދު އިމާމުވެ ކުރާ ފޮޓޯތައް އާއިލާތަކުން ސޯޝަލް މީޑިއާގައި ހާމަ ކޮށްފައިވެއެވެ.