ކޮވިޑް-19 ގެ އިތުރު ކޭސްތަކެއް މާލެއިން ފެނިފައިވާ އިރު، މިހާތަނަށް ފެނުނު އެންމެ ބޮޑު ކްލަސްޓަރ އޮތީ މާލޭގެ ބާޒާރުމައްޗާއި ގުޅިފަައިކަމަށް ޓުއަރިޒަމް މިނިސްޓަރު ޢަލީ ވަހީދު ވިދާޅުވެއްޖެއެވެ.
ނެޝަނަލް އިމަރޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ޢަލީ ވަހީދު ވިދާޅުވީ ބާޒާރުމަތީގެ ކްލަސްޓަރއަކީ އެންމެ ގިނަ ޢަދަދެއްގެ މީހުން ހިމެނޭ ކްލަސްޓަރ ކަމަށާއި، ކުރިޔަށް އޮތް ހަފުތާއެއްގެ ތެރޭގައި އިތުރު ފެސިލިޓީސްތައް މާލެއިން ބޭރުން ޤާއިމުކޮށް މިޞަރަޙައްދުތަކުގައި މަސައްކަތްކުރާ ބިދޭސީން ބަދަލުކުރުމުގެ މަސައްކަތް ފަށައިގެން ކުރިއަށްދާނެ ކަމަށެވެ.
ޢަލީ ވަހީދު ވިދާޅުވީ ބާޒާރުމަތީގައި މަސައްކަތްކުރާ ބިދޭސީން ނިދަނީ ކޮންތަނެއްގައި ކަންވެސް ކުންފުނިތަކަށްވެސް ނޭނގޭ ބިދޭސީން އެބަތިބި ކަމަށާއި، މި ބޭދީސީންނަށް ޢާންމު ޙާލަތެއް ހޯދާ އަދި މާލެ މިކަމުން ސަލާމަތްކުރުމަށްޓަކައި ކުރެވެން ހުރިކަމެއް ސަރުކާރުން ކުރައްވާނެ ކަމަށެވެ.
އަދި ގުޅީ ފަޅުގަޔާއި ވިލިވަރުގައި އަދި ހުޅުމާލޭގައި ޤާއިމުކުރާ އިތުރު ކަރަންޓީނު ފެސިލިޓީތައް ޑޮކްޓަރުންގެ ލަފަޔަކާއެކު ގައިދުރުކަން ބެހެއްޓުމަށްފަހު ބިދޭސީން މާލެއިން މިޞަރަޙައްދުތަކުން ސިފައިންނާއި ފުުލުހުންނާއި އެހެން މިނިސްޓްރީ ގުޅިގެން ބޭރު ކުރުމުގެ މަސައްކަތްކުރާނެ ކަމަށެވެ.
މީގެ އިތުރުން މި މަސައްކަތުގައި އެމީހުންގެ އިންސާނީ ޙައްޤުތައް ކަށަވަރުވޭތޯ ޔަޤީންކުރައްވާނެ ކަމަށާއި، އެމީހުން ދިރިއުޅޭ ޙާލަތަށްވުރެ ރަގަނޅު ޙާލަތުގައި ކަންކަންކުރެވޭތޯ މަސައްކަތްކުރައްވާނެކަމަށް މިނިސްޓަރު ވިދާޅުވިއެވެ.
ބާޒާރު މަތިން ފެނުނު ކްލަސްޓަރގައި މިހާތަނަށް 40 މީހަކު ވަނީ ޕޮޒިޓިވްވެފައެވެ. އަދި އިތުރު އެތައްސަތޭކަ މީހަކު ކޮންޓެކްޓްސްގެ ތެރޭގައި ފާހަގަ ކުރެވިފައިވެއެވެ.
