އަވަހަށް ލީގު ފަށަން ސްޕެއިން ސަރުކާރު ދެކޮޅު

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ސްޕެނިޝް ލީގުގެ ކުޅުން ކައިރި މުސްތަގުބަލެއްގައި ފަށަން ހުއްދަ ދޭން ސްޕެއިންގެ ސަރުކާރުން ދެކޮޅު ހަދައިފި އެވެ.

ކޮވިޑް-19 ގެ ނުރައްކާ ޔޫރަޕަށް ބޮޑުވާން ފެށުމާއެކު، އޭގެ އަސަރު އެންމެ ބޮޑަށް ކުރަމުން އަންނަ އެއް ގައުމަކީ ސްޕެއިނެވެ. ސްޕެއިންގައި މިހާތަނަށް ކޮވިޑް-19 އަށް ދެ ލައްކަ އަށް ވުރެން ގިނަ މީހުން ޕޮޒިޓިވްވެފައިވާއިރު، އެ ގައުމުން 23،000 އަށް ވުރެން ގިނަ މީހުން ވަނީ މި ވައިރަސް ޖެހިގެން މަރުވެފަ އެވެ.

ކޮވިޑް-19 އާ ގުޅިގެން ސްޕެނިޝް ލީގު މުއްދަތެއް ނެތް ގޮތަށް މެދުކަނޑާލާފައިވާއިރު، ސްޕެނިޝް ލީގު މެއި މަހު ފަހުކޮޅު ފަށަން މަސައްކަތް ކުރަމުން އަންނަ ކަމަށް ލަލީގާގެ ރައީސް ހަވިއޭ ޓެބާސް މީގެ ކުރިން ވަނީ ވިދާޅުވެފައެވެ. އެކަމަކު އެކަމަށް ސްޕެއިންގެ ސަރުކާރުން ދެކޮޅެވެ.

ސްޕެއިނުގެ ސަރުކާރުގެ ތަރުޖަމާނާ ހަވާލާދީ ސްޕެއިނުގެ ބައެއް މީޑިއާތަކުން ރިޕޯޓްކުރާ ގޮތުގައި އަވަހަށް ލީގު ފެށޭނެ ފުރުސަތެއް އަދި ނެތެވެ. އަދި މިހާރު އޮތް ހާލަތުން މީހުން އެއްވެ އުޅޭ އެއްވެސް ހަރަކާތެއް ބޭއްވުމަށް ހުއްދަ ނުދެވޭނެ ކަމަށާއި، އެކަންކަމާ މެދު ވިސްނާނާނީ ހާލަތު ރަނގަޅުވުމުން ކަމަށް ތަރުޖަމާނާ ހަވާލާދީ ސްޕެއިން މީޑިއާތަކުން ވަނީ ރިޕޯޓުކޮށްފައެވެ.

އެކަމަކު ދާދި ފަހިން ސްޕެނިޝް ލީގުގެ ކްލަބުތަކަށް ވަނީ ފަރިތަކުރުންތައް ކުރިއަށް ގެންދިޔުމުގެ ހުއްދަ ދޭން ލަލީގާ އާއި ރޯޔަލް ސްޕެނިޝް ފުޓްބޯލް ފެޑެރޭޝަނުން އެއްބަސްވެފައެވެ. އަދި މި ހުއްދަ ދިނީ، އެ ގައުމުގެ ހެލްތު މިނިސްޓްރީން ކަނޑއަޅާފައިވާ ގަވާއިދުތަކުގެ ދަށުން ފަރިތަކުރުންތަކުގައި އަމަލުކުރުމަށް އިލްތިމާސް ކުރުމަށްފަހު އެވެ. އެގޮތުން ފަރިތަކުރުންތަކުގައިވެސް ކުޅުންތެރިން ހަރަކާތްތެރުވާން ޖެހޭނީ އިޖުތިމާއީ ގައިދުރުކަމުގެ ގަވާއިދުތަކާ އެއްގޮތްވާ ގޮތުގެ މަތިންނެވެ.

އަވަހަށް ލީގު ފަށަން ސްޕެއިން ސަރުކާރު ދެކޮޅު ނަމަވެސް، ސްޕެއިންގެ މީޑިއާ ރިޕޯޓްތައް ބުނާ ގޮތުން ސްޕެނިޝް ފުޓްބޯލް ފެޑެރޭޝަންގެ ވިސްނުން ހުރީ ފުޓްބޯޅަ ސީޒަން ފުރިހަމަކުރާށެވެ. އަދި ސީޒަން ފުރިހަމަ ކުރަން ހުރިހާ މަސައްކަތެއް ކުރާނެ ކަމުގެ ޔަގީންކަން އެލްއެފްޕީން ވަނީ ޔުއެފާ އަށް ދީފަ އެވެ.