ކަރަންޓީނު ފެސިލިޓީތަކުން ކާންލިބޭ ތަކެތީގެ ބަހުސްގެ ތެރެއަށް ރައްޔިތުންގެ މަޖިލީހުގެ ރައީސް

ކޮވިޑް-19 ރާއްޖެއިން މަރޗް މަހުގެ 7 ވަނަ ދުވަހު ފެނުމާއެކު ކަރަންޓީނު ފެސިލިޓީތަކުގެ ވާހަކަތައް ފެންމަތިވި އެވެ. އަވަސްކަމާއެކު ފެތުރެމުންދާ ބައްޔަށް ޝައްކުކުރެވޭ ފަދަ އަލާމާތްތައް ހުންނަ މީހުންނާއި އެވައިރަސްއަށް ހުށަހެޅިފައި ހުރެދާނެ ކަމަށް ގަބޫލު ކުރެވޭފަދަ ހާލަތެއްގައި ތިބި އެންމެން ކަރަންޓީނު ފެސިލިޓީތަކަށް ގެންދަން ޖެހޭއިރު އެކަން ކުރެވޭނެ ތަނެއް ނެތެވެ. އެއާއެކު ސަރުކާރުން އަވަސްވެ ގަތީ އާންމު ރައްޔިތުން ދިރިނޫޅޭ ތާކު ކަރަންޓީނު ފެސިލިޓީތައް ގާއިމުކުރާށެވެ.

އެންމެ ފުރަތަމަ ކަރަންޓީނު ފެސިލިޓީ ގާއިމުކުރުމަށް މަޝްވަރާކުރި އެއްތަނެއްގެ ގޮތުގައި ހެލްތު މިނިސްޓަރ އަބްދުﷲ އަމީން ވިދާޅުވެ ފައިވަނީ މާލެ ކުރިމަތިން މިއޮތް އެސްޓިއޯގެ ތެޔޮ ރައްކާ ކުރާ ރަށް ފުނަދޫ އެވެ. މީގެއިތުރުން ހުޅުމާލޭގެ މަރުކަޒަކާއި ރިޔާސީ ރަށް ކ. އާރަށްވެސް ކަރަންޓީނު ފެސިލިޓީތަކުގެ ގޮތުގައި ބޭނުންކުރުމަށް ނިންމިއެވެ. ނަމަވެސް އެންމެ ފަހުން ރާއްޖޭގެ ރިސޯޓްތައް ކަރަންޓީނު ފެސިލިޓީތަކުގެ ގޮތުގައި ބޭނުންކުރެވި އެވާހަކަ ދުނިޔޭގެ ހެޑްލައިންތަކުންވެސް ޖާގަ ހޯދިއެވެ.

ނަމަވެސް އޭރުވެސް ކަރަންޓީނު ފެސިލިޓީތަކުގައި ތިބޭ މީހުން ދައްކަމުންދިޔަ ވާހަކަ އެއް އޮތެވެ. އެއީ އެތަނުން ލިބޭ ކާއެއްޗެހީގެ ވާހަކަ އެވެ. އެކަމާމެދު ހިތްހަމަ ނުޖެހި އެތަންތަނުގައި ތިބި ބައެއް މީހުން ސޯޝަލް މީޑިޔާއަށް ޝުއޫރުތައް ބަންޑުން ކޮށްލަމުން ދިޔައިރު އާންމުންގެ ގިނަ މީހުން ބުނާ އެއް ވާހަކައަކީ އެވަރުވެސް ލިބޭކަމަށް ޝުކުރުނުކުރަނީ ކީއްވެ ހެއްޔެވެ؟ ގޭގައި ކާންހުންނަނީ ހަމަ އެފެންވަރުގެ ކާތަކެތި ހެއްޔެވެ؟ އޭގެ ޖަވާބުގައި މިކަމާއި ދެކޮޅަށް ވާހަކަ ދައްކާ މީހުންގެ އޮންނަނީ ވަރަށް ސީދާ ޖަވާބެކެވެ. އެޖަވާބަކީ ކަރަންޓީނު ފެސިލިޓީތަކުގައި ހުރި ރޫމްތައް ސަރުކާރުން ނަގާފައި އެވަނީ ރޫމަކަށް ދުވާލަކު 750 ރުފިޔާގެ ރޭޓުންނެވެ. އެހެންކަމަށްވާނަމަ ލިބޭ ކާބޯތަކެތިވެސް ރަނގަޅުވާން ވާނެއެވެ.

މިވާހަކަތަކުގެ އަޑު ރަމަޟާން މަސް ފެށުމާއެކު އަނެއްކާވެސް މިވަނީ ގަދަވެފަ އެވެ. ހާރުކާށާއި ރޯދަ ވީއްލަން ކަރަންޓީނު ފެސިލިޓީތަކުގައި ތިބި ބައެއް މީހުންނަށް ގެނައި ކާއެއްޗިއްސާމެދު އެމީހުން ހިތްހަމަ ނުޖެހިގެން ސޯޝަލް މީޑިޔާއަށް ޕޯސްޓްތައް ބަންޑުންކޮށްލި އެވެ. ކަންދިމާކުރި ގޮތުން މިވަގުތަކީ މާލޭގައި ކޮވިޑް-19 ފެތުރެމުންދާތީ މާލެ ސިޓީ ސަރަހައްދު ލޮކްޑައުންކޮށް ރާއްޖޭގެ ހުރިހާ ރަށަކުން އަރާ ފޭބުން މަނާކޮށްފައިވާ ދުވަސްވަރެކެވެ. އެހެންކަމުން އެންމެންކަހަލަ ގޮތަކަށް މިދުވަސްވަރު އުޅެނީ ރަމަޟާން މަހު ކާންބޭނުންވާ ތަކެތި ނުލިބިގެންނެވެ. އެޔާއެކު މިމައުޟޫގައި ދެކެވޭ ވާހަކަތައް ވަނީ ވަރަށްވެސް ފުޅާވެ، އަޑު ބާރުވެފަ އެވެ.

މިފަދަ އެތައް ޕޯސްޓްތަކަކުން ސޯޝަލް މީޑިޔާގެ ފީޑްތައް މިދެދުވަހު ފުރާލަމުން ދާއިރު ރައްޔިތުން ކުރަމުންދާ މިބަހުސްގެ ތެރެއަށް އެންމެ ފަހުން ވަދެ ވަޑައިގަންފައި މިވަނީ ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދެވެ. އާދިއްތަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވަނީ ބައެއް ކަރަންޓީނު ފެސިލިޓީތަކުގައި ހޮނިހިރު ދުވަހު ހުރި މެނޫތައް ހާމަކުރައްވާފަ އެވެ.

ރައީސް ނަޝީދު އިތުރަށް ވިދާޅުވީ ކަރަންޓީނު ފެސިލިޓީތަކުގައި ރޯދަ ވީއްލުމުގެ ކަންކަން ރަނގަޅަށް ގެންދިޔުމަށް ސަރުކާރުން ކުރެވެން ހުރި ހުރިހާ މަސައްކަތެއް ކުރަމުން ގެންދަވާކަމަށާއި އެކަމުގައި ހުރިހާ ވަޒީރުންވެސް އަވަދިނެތި އުޅުއްވާކަމަށެވެ. އަދި ކަރަންޓީނު ފެސިލިޓީތަކުގެ ކަންކަން ހަމަޖައްސާ ޓޫރިޒަމް މިނިސްޓްރީގެ ވަޒީރުގެ ހާލަތުވެސް ރައީސް ނަޝީދު ސާފުކޮށް ދެއްވި އެވެ.

ކޮންމެއަކަސް ރާއްޖޭގައި ހުރި ކަރަންޓީނު ފެސިލިޓީތަކުގެ ހާލަތު ރަނގަޅުވާނެ ކަމުގެ ޔަގީންކަން ރައްޔިތުންގެ މަޖިލީހުގެ ރައީސް މިވަނީ ދެއްވާފަ އެވެ. އެހެންނަމަވެސް ހުރިހާ އެންމެން އެންމެ ހިތްހަމަޖެހޭ ގޮތަށް ހުރިހާ ކަމެއް ނުދާނެ ކަމީ ޔަގީންކަމެކެވެ.

ހެލްތު ޕްރޮޓެކްޝަން އެޖެންސީން ހޮނިހިރު ދުވަހުގެ ރޭ ގަނޑު 21:30 ގައި ހާމަކޮށްފައިވާ މައުލޫމާތުތަކަށް ބަލާއިރު ރާއްޖޭގެ އެކި ކަރަންޓީނު ފެސިލިޓީތަކުގައި 1371 މީހުން އެބަތިއްބެވެ. މީގެތެރޭގައި ރާއްޖެއިން ބޭރުން އައި ގިނަ އަދަދެއްގެ ދިވެހިންވެސް ހިމެނެ އެވެ. މިއިން ކޮންމެ މީހަކުވެސް ކަރަންޓީނު ފެސިލިޓީތަކުން ދޫކޮށްލަނީ 14 ދުވަހުގެ މުއްދަތު ފުރިހަމަ ކުރުމަށްފަހު އެވެ.