ގިނަ އަދަދެއްގެ މީހުން ދިރިއުޅޭ ތަންތަން ފާހަގަކޮށް އެތަންތަން ޗެކްކޮށް ޓެސްޓް ކުރަނީ
ގިނައިން މީހުން އުޅޭ ތަންތަން ޗެކް ކުރުމުގައި ބިދޭސީއެއް ދޭސީއެއް ނުބަލާނެ
މަލޭގައި ގަވާއިދާ ހިލާފަށް އުޅޭ ބިދޭސީންތަކެއް
މާލޭގައި ކޮވިޑް-19 ހަލުވިކަމާއެކު ފެތުރެމުންދާތީ ބިދޭސީންނާއި, ދިވެހިން ގިނައިން ދިރިއުޅޭ ތަންތަން ޢާންމުކޮށް ޗެކްކުރަމުންދާނެކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.
ހޮނިހިރު ދުވަހު އެންއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ޓެގް ޓީމްގައި ހިމެނިވަޑައިގަންނަވާ ޑރ. ޢަލީ ލަޠީފް ވިދާޅުވީ ކޮވިޑް-19 އަށް ޕޮޒިޓިވްވާ މީހުންގެ ނިޞްބަތް އިތުރުވަމުން އަންނަ އިރު ކޮންޓެކްޓްސް ގިނަވަމުންދާ ކަމަށެވެ.
ޑރ. ޢަލީ ލަޠީފް ވިދާޅުވީ ޕޮޒިޓިވްވާ މީހުން ގިނަވާންޖެހޭ ދެ ސަބަބެއްވާ ކަމަށެވެ. އޭގެ ތެރެއިން ފުރަތަމަ ސަބަބަކީ ޓެސްޓް ހަދާ މިންވަރު އިތުރުވުމުން ޕޮޒިޓިވްވާގޮތް އިތުރުވުން ކަމަށެވެ. މީގެ 3 ވަރަކަށް ދުވަސް ކުރިން ޕޮޒިޓިވްވި މީހުންގެ ޢަދަދު މަދުވިކަން ފާހަގަކުރެއްވިއެވެ. އަދި ޓެސްޓް ކިޓު މަދުވުމާއި ގުޅިގެން ހައި ރިސްކް މީހުންގެ ތެރެއިން ހަމައެކަނި ސިމްޕްޓަމެޓިކް މީހުންގެ ޓެސްޓް ހަދަން ނިންމާފައިވާކަމަށް ޑޮކްޓަރު ވިދާޅުވިއެވެ.
ޑޮކްޓަރު ވިދާޅުވީ ގިނަ ޢަދަދެއްގެ ކޭސްތައް އަންނަން ފެށުމުން މިހާރު ނިންމާފައިވަނީ ގިނަ މީހުން ދިރިއުޅޭ ތަންތަން އެކްޓިވްކޮށް، މީހުންގެ ޓެސްޓް ހެދުން ކަމަށެވެ. އަދި އެންމެ ފަހުން ވެސް ގިނަ ޢަދަދެއްގެ މީހުން ޕޮޒިޓިވްވީ އެއްތަނެއްގައި ގިނަ ބަޔަކު ތިބުމުން ކަމަށް ޑރ. ޢަލީ ލަޠީފް ވިދާޅުވިއެވެ.
ޑޮކްޓަރު ވިދާޅުވީ މިހާރު ގަސްދުކޮށްފައި ވަނީ ރިސްކް ބޮޑު ތަންތަން ވެއްޖެއްޔާ އެތަންތަން އެކްޓިވްކޮށް، އެތަންތަނަށް ގޮސް ޓެސްޓް ހެދުން ކަމަށެވެ. އަދި ހަމަ އެގޮތަށް ދިވެހިން ވެސް ގިނައިން އުޅޭ ތަންތަން އެނގޭނަމަ އެތަންތަނަށް ގޮސް ޓެސްޓް ކުރާނެކަމަށެވެ.
މީގެ އިތުރުން މީހުން ގިނައިން އުޅޭ ތަނަކަށްވެފައި، އެތަނެއްގެ ތެރޭގައި އެއްވެސް މީހެއްގެ ބަލީގެ އަލާމާތެއް ހުރެއްޖެނަމަ އަވަހަށް އެޗްޕީއޭއަށް އެންގުމަށް ޑރ. ޢަލީ ލަޠީފް ވަނީ އިލްތިމާސްކުރައްވާފައެވެ. އަދި ޓީމެއް ފޮނުވާ ޓެސްޓް ހެދުމަށްފަހު ކަރަންޓީން ކުރަން ޖެހިއްޖެ ޙާލަތެއްގައި ކަރަންޓީންކޮށް އަދި އައިސޮލޭޓްކުރަން ޖެހިއްޖެ ޙާލަތެއްގައި އައިސޮލޭޓް ކުރެވޭނެ ކަމަށް ޑރ. ޢަލީ ލަޠީފް ވިދާޅުވިއެވެ. އަދި ރޯގާގެ އަސަރު ހުންނަކަމުގައިވާ ނަމަ އެޗްޕީއޭއަށް އެންގުން މުހިންމުކަމަށް ޑޮކްޓަރ ވިދާޅުވިއެވެ.
