ބޭރުގައި ތިބި އެކި ފަރާތްތަކަށް އެހީތެރިކަން ފޯރުކޮށްދޭނެ އުސޫލުތަކެއް ކަނޑައަޅައިފި

ރާއްޖެއިން ބޭރުގައި ތިބި ދިވެހިންނަށް އެހީތެރިކަން ފޯރުކޮށްދިނުމަށް އިންތިޒާމެއްގެ ތެރެއިން ރޭވިގެން ވަކިގޮތަކަށް ކުރުމަށް ނިންމާފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.

ބުރާސްފަތި ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ މި އުސޫކުގެ ދަށުން ރާއްޖެއިން ބޭރަށް ކުރު ދަތުރެއްގައި (ޓުއަރިސްޓް ވިސާގައި) ގޮސް ތިބި ފަރާތްތަކުގެ ތެރެއިން ނާދެވި ތާށިވެފައި ތިބި ފަރާތްތަކާއި، ބޭސްފަރުވާއަށް ގޮސް ނާދެވި ތިބި ފަރާތްތަކަށް ދޭނެ އެހީ ތެރިކަން ހަމަޖައްސާފައިވާ ކަމަށެވެ. މީގެއިތުރުން ބޭރުގައި ދިރިއުޅޭ ފަރާތްތަކުގެ ތެރެއިން ކޮވިޑް-19 އާއި ގުޅިގެން އެމީހަކު ހުރި ގައުމަކުން ލިބެމުން އައި އާމްދަނީއެއް ހުއްޓިފައިވާނަމަ އެ ފަރާތްތަކާއި، ރާއްޖެއިން ބޭރުގައި ކިޔަވަން ތިބި ދިވެހި ދަރިވަރުންނަށް އެހީތެރިކަން ފޯރުކޮށްދިނުމަށް އުސޫލުތަކެއް ކަނޑައެޅިފައިވާ ކަމަށް މަބްރޫކް ވިދާޅުވި އެވެ

އެހީތެރިކަން ދޭނެ ގޮތުގެ ތަފްސީލުތަކަށް ބަލާއިރު، ބޭސްފަރުވާއަށް ގޮސްތިބި ފަރާތްތަކަށް އެހީތެރިކަން ފޯރުކޮށްދިނުން އެންސްޕާގެ ފަރާތުން ކުރިއެކޭ އެއްގޮތަށް ކުރިއަށްގެންދާނެކަމަށް މަބްރޫކް ވިދާޅުވިއެވެ. އަދި ދަތުރުމަތީގައި ތާށިވެފައި ތިބި މީހުން އަދި ބޭރުގައުމުގަތަކުގައި ދިރިއުޅޭ ދިވެހިންގެ ތެރެއިން އެމީހުންނަށް ލިބެމުން އައި އާމްދަނީ މެދުކެނޑިފައިވާ މީހުންނަށް ދޭންޖެހޭ އެހީތެރިކަން ފޮރިން މިނިސްޓްރީގެ ފަރާތުން އިންތިޒާމްކުރުމަށް ހަމަޖެހިފައިވާކަމަށް މަބްރޫކް ވިދާޅުވިއެވެ.

ރާއްޖެއިން ބޭރުގައި ތިބި ކިޔަވާ ކުދިންނަށް ފޯރުކޮށްދޭންޖެހޭ އެހީތެރިކަން ހަޔަރ އެޑިއުކޭޝަން މިނިސްޓްރީން އިސްނަގައިގެން ކުރިއަށް ގެންދިއުމަށް ހަމަޖެހިފައިވާ ކަމަށް ވެސް މަބްރޫކް ވިދާޅުވިއެވެ.

މީގެ އިތުރުން މާލޭގެ ލޮކްޑައުންއާއި ގުޅިގެން ޖެންޑަރ މިނިސްޓްރީއާއި ސޯޝަލް ކައުންސިލުން ކުރަމުން އަންނަ މަސައްކަތްތަކުގެ ތެރެއިން 124 މީހަކަށް އެހީތެރިކަން ފޯރުކޮށްދީފައިވާ ކަމަށް މަބްރޫކް ވިދާޅުވިއެވެ.

މީގެ އިތުރުން ލޮކްޑައުންއާއި ގުޅިގެން ކާބޯތަކެތީގެ ދަތިކަން ދިމާވި 60 މީހަކަށް ކާބޯތަކެތި ފޯރުކޮށްދިނުމުގެ މަސައްކަތްވެސް ކޮށްފައިވާކަމަށް މަބްރޫކް ވިދާޅުވިއެވެ.

ސޯޝަލް ކައުންސިލުން މިހާރު ތައްޔާރުވެފައި އޮތީ ރަމަޟާން މަސް ކުރިމަތީގައި އޮތްއިރު މިފަދަ މައްސަލަތައް ދިމާވާނެ މީހުންނަށް އެހީތެރިކަން ފޯރުކޮށްދިނުމުގެ ފުރުސަތު ދިނުމަށް ތައްޔާރު ކަމަށް ވެސް މަބްރޫކް ވިދާޅުވިއެވެ. އަދި އެގޮތުން ރެޑްކްރެސެންޓާއި ގުޅިގެން ބިދޭސީން ދިރިއުޅެމުން އަންނަ ކެއްކެން ހުންނަ ލޭބާ ކުއާޓާތައް ހުންނަ ތަންތަނަށް ހަނޑޫ ހަކުރު ފުށް ފޯރުކޮށްދިނުމުގެ މަސައްކަތް ކޮށްފައިވާ ކަމަށާއި، މާލޭގައި ތިބި މީހުންގެ ތެރެއިން ދަތި ދިމާވާ މީހުންނަށް ކާބޯތަކެތި ފޯރުކޮށްދެވޭނެ ގޮތްތަކެއް ވެސް ހަމަޖެއްސުމުގެ އިންތިޒާމް ހަމަޖެހިފައިވާ ކަމަށް މަބްރޫކް ވިދާޅުވިއެވެ.