ރަށްރަށުގެ ކައުންސިލްތަކުން އަންގާ އެންގުންތަކަށް އަމަލުކުރުމަށް އިލްތިމާސްކޮށްފި
23 އެޕްރީލު 2020 | ބުރާސްފަތި 12:56ވިޔަފާރިކުރާ ތަންތަން ހުޅުވާފައި ބެހެއްޓޭނެ ގަޑިތައް ކަނޑައަޅާފައިވޭ
ކޮވިޑް-19އާ ގުޅިގެން ކުޅުދުއްފުށި ސިޓީގައި ގިނަ ފިޔަވަޅުތަކެއް އަޅާފައިވޭ
ކޮވިޑް-19 ފެތުރެމުންދާ މިދަނޑިވަޅުގައި ޒަރޫރީ ބޭނުންތައް ފުއްދުމަށް ގޭބިސީތަކުން ބޭރަށް ނުކުމެ ވިޔަފާރިކުރާއިރު، ކައުންސިލުން ނެރޭ އެންގުމާ އެއްގޮތަށް އަމަލުކުރުމަށް އިކޮނޮމިކް މިނިސްޓްރީން އިލްތިމާސްކޮށްފިއެވެ.
އިކޮނޮމިކް މިނިސްޓްރީން ބުނީ މާލެ ސިޓީ ފިޔަވައި، މީހުން ދިރިއުޅޭ ރަށްތަކުގައި، ޒަރޫރީ ބޭނުންތައް ފުއްދުމަށްށާއި، ގޭބިސީތަކުން ބޭރަށް ނުކުމެ ވިޔަފާރިކުރުމަށް ވިޔަފާރިކުރާ ތަންތަން ހުޅުވާފައި ބެހެއްޓޭނެ ގަޑިތަކާއި އަމަލުކުރަންވީ ގޮތުގެ އުސޫލެއް ކައުންސިލްތަކުން ކަނޑައަޅާފައިވާ ކަމަށެވެ.
މިނިސްޓްރީން ބުނީ އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކުރުމާ ގުޅިގެން، މާލެ ސިޓީ (މާލެ، ހުޅުމާލެ އަދި ވިލިމާލެ) ފިޔަވައި މީހުން ދިރިއުޅޭ ރަށްތަކުގައި، ޒަރޫރީ ބޭނުންތައް ފުއްދުމަށް ގޭބިސީތަކުން ބޭރަށް ނުކުމެ ވިޔަފާރިކުރުމަށް ވިޔަފާރިކުރާ ތަންތަން ހުޅުވާފައި ބެހެއްޓޭނެ ގަޑިތަކާއި ވިޔަފާރިކުރާ ތަނާއި ވިޔަފާރިކުރަންދާ ފަރާތުން އަމަލުކުރަންވީ ގޮތުގެ އިރުޝާދު ކަނޑައަޅާފައިވާ ކަމަށެވެ.
މިއުސޫލުތައް ކަނޑައަޅާފައިވަނީ އެއިރެއްގެ ހާލަތަށް ރިއާޔަތްކޮށް، ސިޓީއެއްގައިނަމަ، ސިޓީ ކައުންސިލުން ނުވަތަ ރަށެއްގައިނަމަ، ރަށު ކައުންސިލުން ކަމަށް އިކޮނޮމިކް މިނިސްޓްރީން ބުނެއެވެ.
އެގޮތުން ޒަރޫރީ ބޭނުންތައް ފުއްދުމަށް ގޭބިސީތަކުން ބޭރަށް ނުކުމެ ވިޔަފާރިކުރާއިރު، ސިޓީއެއްގައިނަމަ، ސިޓީ ކައުންސިލުން ނުވަތަ ރަށެއްގައިނަމަ، ރަށު ކައުންސިލުން ނެރޭ އެންގުމާ އެއްގޮތަށް އަމަލުކުރުމަށް މިނިސްޓްރީން އިލްތިމާސްކޮށްފައިވެއެވެ.
އިކޮނޮމިކް މިނިސްޓްރީން މި އިލްތިމާސްކުރި ނަމަވެސް ބައެއް ރަށްރަށުގައި ކައުންސިލްތައް އަންގާ އެންގުންތަކަށް އަމަލުނުކުރާކަމުގެ މައްސަލަތައް ފެންމަތިވެފައިވެއެވެ.
