ކޮވިޑް-19 އުފެދުނު ގޮތާއި ފެތުރެން ދިމާވި ސަބަބުތައް ހޯދުމަށް އޮސްޓްރޭލިއާއިން އެކުލަވާލާފައިވާ މިނިވަން އިންކިޔުރީ އަކީ ސިޔާސީ ގޭމެއް ކަމަށާއި މިކަމުގެ ސަބަބުން ބައިނަލްއަގްވާމީ މުޖުތަމައުން މިވައިރަސް އިން ރައްކާތެރިވުމަށް ކުރަންޖެހޭ ކަންކަމާއި ކޮންޓްރޯލްވުމަށް ކުރަންޖެހޭ ކަންކަން މަޑުޖެހެމުންދާ ކަމަށް ޗައިނާއިން ބުނެފި އެވެ.

ޗައިނާގެ ފޮރިން މިނިސްޓްރީން ބުނެފައިވަނީ ކޮވިޑް-19 ފެތުރެން ފެށުމާއެކު އެކަމުގެ މައުލޫމާތުތައް ހާމަކުރަމުންދާ ކަމަށާއި އަދި މިކަމުގައި އެހެން ގައުމުތަކާއެކު އެއްބާރުލުން ދެމުން ގެންދާކަމަށެވެ. އަދި ހުޅުވާލެވިފައިވާ ދެ ފުށް ފެންނަ ގޮތެއްގައި މައުލޫމާތުތައް ފޯރުކޮށްދޭއިރު ބައިނަލްއަގްވާމީ މުޖުތަމަޢުން ވައިރަސް ކޮންޓްރޯލް ކުރުމަށް ކުރަމުންދާ މަސައްކަތުގައި ޗައިނާއިން އެހީތެރިވަމުން ދާ ކަމަށްވެސް އެގައުމުން ބުނެއެވެ. މިކަމުގައި ބައިނަލްއަގްވާމީ މުޖުތަމައުއިން ތައުރީފްވެސް ލިބިފައިވާކަމަށް ޗައިނާގެ ފޮރިން މިނިސްޓްރީގެ ސްޕޯކްސް ޕާސަން ގެންގް ޝުއާންގް ބުރާސްފަތު ދުވަހު ބޭއްވި ނޫސްވެރިންގެ ބައްދަލުވުމުގައި ބުނެފައިވެ އެވެ.

މިވައިރަސް ހަލުވިކަމާއެކު ދުނިޔޭގައި ފެތުރެމުންދާއިރު މިވަގުތު ދުނިޔޭގެ ސަމާލުކަން އެންމެ ބޮޑަށް ހުއްޓިފައި ހުންނަންވާނީ ވައިރަސް ކޮންޓްރޯލްކޮށް މީހުންގެ ފުރާނަ ސަލާމަތްކުރުމަށް ކަމަށް ގެންގް ބުނެއެވެ. އަދި މިފަދަ ނާޒުކު ވަގުތެއްގައި ސިޔާސީ ސަބަބުތަކަށްޓަކައި މިފަދަ ކަންކަމުގައި ސުވާލު އުފެއްދުމަކީ ޒިންމާދާރުކަން ކުޑަކަމެއް ކަމަށް ގެންގް ބުނެ އެވެ.

އެހެންކަމުން އޮސްޓްރޭލިއާ އިން މިދަނޑިވަޅުގައި މިއިންކުޔަރީގެ ކަންކަމުގައި ނޫޅެ އެގައުމުގެ ރައްޔިތުންގެ ސަލާމަތާއި ރައްކާތެރިކަމަށް މަސައްކަތްކުރުމަށް ގެންގް ބުންޏެވެ.

އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވަނީ ވައިރަސް ފެތުރެން ދިމާވި ސަބަބުތައް ދެނެގަތުމަށް ކުރިޔަށްގެންދާ މިނިވަން އިންކިޔުރީގައި ޑަބްލިޔުއެޗްއޯގެ މެމްބަރ ހުރިހާ ގައުމަކުންވެސް އެއްބާރުލުންދީ ބައިވެރިވުމަށް އެދިވަޑައިގަންފަ އެވެ.

މިދިޔަ އަހަރުގެ ޑިސެމްބަރ މަހުގެ ފަހުކޮޅު ޗައިނާގެ ވުހާން އިން ފެނުނު ކޮވިޑް-19 މިހާތަނަށް އާއިރު ދެ މިލިއަނަށް ވުރެ ގިނަ މީހުންނަށް ވަނީ ޖެހިފަ އެވެ. އަދި ވައިރަސް ޖެހިގެން މަރުވި މީހުންގެ އަދަދު އެއްލައްކަ އަށްޑިހަ ހާހަށްވުރެ މައްޗަށް އަރައެވެ.