އުފަންވި ހޮސްޕިޓަލަށް ބޭލްގެ ދީލަތި އެހީއެއް

އުފަންވި ހޮސްޕިޓަލަށް އެހީގެ ގޮތުގައި ފަސް ލައްކަ ޕައުންޑް، ވޭލްސް އާއި ރެއާލް މެޑްރިޑްގެ ތަރި ގަރެތު ބޭލް ދީފި އެވެ.

މުޅި ދުނިޔޭގައި ހަލިވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ އަސަރު ވޭލްސްއަށްވެސް ކޮށްފައިވާއިރު، ކޮވިޑް-19 އިން ސަލާމަތްވުމަށް ވޭލްސް އިން ކުރަމުންގެންދާ މަސައްކަތްތަކަށް އެއްބާރުލުން ދިނުމުގެ ގޮތުން ބޭލް އާއި އޭނާގެ އަންހެނުން ވަނީ އޭނާ އުފަންވި ހޮސްޕިޓަލް ކަމަށްވާ ޔުނިވާސިޓީ ހޮސްޕިޓަލް އޮފް ވޭލްސް އަށް ފަސް ލައްކަ ޕައުންޑް ހަދިޔާކޮށްފައެވެ.

ސޯޝަލް މީޑިއާގައި އާންމުކުރި ވީޑިއޯއެއްގައި ބޭލް ބުނީ ކޮވިޑް-19 ގެ އުނދަގޫ ހާލަތުގައި ސިއްހީ ދާއިރާގެ މަސައްކަތްތެރިން ކުރާ ބުރަ މަސައްކަތަށް ޝުކުރުއަދާކުރާ ކަމަށާއި، އޭނާ އާއި އޭނާގެ އާއިލާއިން ސިއްހީ މަސައްކަތްތެރިންގެ ޚިދުމަތް އުފަލާއެކު ބަލައިގަންނަ ކަމަށެވެ.

ވޭލްސްގެ ހޮސްޕިޓަލަކަށް ބޭލް ދީލަތި އެހީއެއްވިއިރު، މީގެ ކުރިން ޔުވެންޓަސް އަށް ކުޅެމުން އަންނަ ވޭލްސްގެ މިޑްފީލްޑަރު އާރޮން ރަމްސީ ވަނީ ކޮވިޑް-19 އިން ސަލާމަތްވުމަށް ވޭލްސް އިން ކުރަމުންގެންދާ މަސައްކަތްތަކަށް އެހީވުމުގެ ގޮތުން 10،000 ޕައުންޑް ހަދިޔާކޮށްފައެވެ. ރަމްސީ ހަދިޔާކުރި ފައިސާގެ ތެރެއިން އެއްބައި ވަނީ އޭނާ އުފަންވި ވޭލްސްގެ ކާފިލީ ސަރަހައްދަށް ހަދިޔާކޮށްފަ އެވެ.

ކޮވިޑް-19 އާ ގުޅިގެން ވޭލްސްގައިވެސް ފުޓްބޯޅަ ހަރަކާތްތައް ހުއްޓާލާފައިވާއިރު، އެ ގައުމުން މިހާތަނަށް 5،600 ށްވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފައެވެ.