ސައުދީއަރަބިއްޔާގައި ކޮވިޑް-19 ރޯގާއާއި ގުޅިގެން ތާށިވި އެކި ޤައުމުތަކުގެ މީހުން އަނބުރާ އެމީހުންގެ ޤައުމަށް ފޮނުވުމުގެ މަސައްކަތް ސައުދީ ސަރުކާރުން ފަށައިފިއެވެ.

ސައުދީގެ ދައުލަތުގެ މީޑިއާއިން ރިޕޯޓުކުރާގޮތުގައި، އެޤައުމުގެ މިނިސްޓްރީ އޮފް ޙައްޖު އެންޑް އުމްރާގައި ރަޖިސްޓަރީކޮށްފައިވާ އެހެނިހެން ޤައުމުތަކުގެ މީހުން އަނބުރާ ޤައުމަށް ފޮނުވުމުގެ އަމަލީ މަސައްކަތް މިއަދު ވަނީ ފަށާފައެވެ. އެމިނިސްޓްރީގެ ޑެޕިއުޓީ މިނިސްޓަރ ޑރ. އަބްދުލް ފައްތާހު ބިން ސުލައިމާން މަޝާތު ވިދާޅުވެފައިވަނީ ސައުދީ އަރަބިއްޔާގައި ކޮވިޑް-19 ފެތުރުމާއި ގުޅިގެން ތާށިވި 1،200 މީހުންގެ ތެރެއިން 1،000 މީހުން މިއަދު ފޮނުވާލާފައިވާކަަމަށެވެ. އަދި ބާކީ ތިބި މީހުން ފޮނުވުމުގެ އިންތިޒާމް ހަމަޖައްސަމުންދާކަމަށެވެ.

ޑރ . މަޝާތު ވިދާޅުވީ، އުމުރާގެ އަޅުކަމަށް ސައުދީއަށް އައި މީހުންގެ ތެރެއިން ތާށިވީ މަދުބައެއް ކަމަށާއި، އެމީހުން ފޮނުވާލުމަށް ހުރަސް އެޅުނީ އެޤައުމުގެ އެއްގަމު ބޯޑަރުތައް ބަންދުކޮށްފައިވާތީ ކަމަށެވެ. އޭނާ ވިދާޅުވީ މިއަދު އެކަނިވެސް މިޞްރުގެ 12 މީހުން ފުރުވާލާފައިވާކަމަށެވެ. އަދި ބާކީ ތިބި މިޞްރު މީހުންނާއި، ޕާކިސްތާނު މީހުން ފުރުވާލުމަށް ބޭނުންވާ އޭވިއޭޝަން ހުއްދަތައް ނެގުމުގެ މަސައްކަތް މިހާރު ކުރަމުން އަންނަކަމަށެވެ.

ޕާކިސްތާނުގެ އިސް މަސްއޫލުވެރިން ވިދާޅުވާގޮތުގައި އެޤައުމުގައި ކޮވިޑް-19 ފެތުރުނީ އުމުރާވެރިންގެ ފުށުންނެވެ. އެމީހުން ރަނގަޅަށް ސްކްރީން ނުކުރެވި ދޫކޮށްލެވުމުންނެވެ. މިޞްރަކީ އެފްރިކާ ބައްރުގެ ޤައުމުތަކުން ކޮވިޑް-19 އެންމެ ކުރިން ރިޕޯޓުކުރި ޤައުމެވެ. ފުރަތަމަ ކޭސްއަށް ފަހު އެޤައުމުން ވަނީ އެއްގަމާއި، ވަޔާއި ކަނޑުގެ ބޯޑަރުތައް ބަންދުކޮށްފައެވެ.