"އިޓާލިއަން ލީގު ކެންސަލް ނުކޮށް ފުރިހަމަ ކުރާނަން"

އިޓާލިއަން ލީގު އަލުން ފަށަން ހަތް ކްލަބަކުން ދެކޮޅު ކަމަށް ރިޕޯޓުތައް ބުނި ނަމަވެސް، ލީގު ކެންސަލް ނުކޮށް ފުރިހަމަކުރާނެ ކަމަށް ލެގާ ސެރިއޭ ކައުންސިލުން ބުނެފި އެވެ.

މީޑިއާ ރިޕޯޓުތައް ބުނާ ގޮތުގައި ބްރެޝިއާ، ޓޮރިނޯ، ސަމްޕްޑޯރިއާ، އުދިނޭޒީ، ސްޕާލް، ޖެނޯއާ އަދި ކަލިއާރީން ލީގު އަލުން ފަށަން ބޭނުމެއް ނުވެއެވެ. އެކަމަކު އިޓާލިއަން ލީގުން ނެރުނު ބަޔާނެއްގައި ބުނީ ސަރުކާރުން ހުއްދަދޭ ނަމަ، ލީގު ފުރިހަމަކުރަން ރުހުން ލެގާ ސެރިއޭ ކައުންސިލުން ދީފައިވާ ކަމަށެވެ. އެކަމަކު އަލުން ލީގު ފަށާނީ ފީފާ އާއި ޔުއެފާ އިން ކަނޑައަޅާފައިވާ އުސޫލުގެ މަތިން ކަމަށް ވެސް ވަނީ ބުނެފައެވެ.

އިޓާލިއަން ލީގު އަލުން ފަށަން ބައެއް ކްލަބުތަކުން ދެކޮޅު ހެދި ނަމަވެސް، ޔުއެފާއިން މީގެ ކުރިން ވަނީ އެ އިދާރާގެ ހިއްދަ ނުހޯދައި އެއްވެސް ލީގެއް ކެންސަލް ނުކުރަން އަންގާފައެވެ.

މީގެ ކުރިން އިޓާލިއަން ފުޓްބޯލް ފެޑަރޭޝަނުގެ ރައީސް ގެބްރިއަލީ ގްރަވީނާ ވެސް ވަނީ އިޓާލިއަން ލީގުގެ މެޗުތައް ކެންސަލް ނުކޮށް، ހާލަތު ތަންދިނުމުން ކުރިޔަށް ގެންދާނެ ކަމަށް ވިދާޅުވެފައެވެ. ގްރަވީނާ ވިދާޅުވީ އިޓާލިއަން ލީގުގެ މެޗުތައް ކުޅުމަށް ހާލަތު ތަންދިންހާ އަވަހަށް ލީގު ފަށާނެ ކަމަށާއި، ލީގު މެދުކެނޑިފައި މިއޮތް ވަގުތު އެއްވެސް ކްލަބަކުން އެކަމުގެ ފައިދާ ނެގިޔަނުދޭނެ ކަމަށެވެ.

ކޮރޯނާވައިރަސް (ކޮވިޑް-19) އާ ގުޅިގެން މުއްދަތެއް ނެތް ގޮތަށް އިޓާލިއަން ލީގު މެދު ކަނޑާލާފައި ވާއިރު، އިޓަލީގެ ސަރުކާރުން ވަނީ މެއި މަހުގެ 3 ގެ ނިޔަލަށް އެއްވެސް ކުޅިވަރު ހަރަކާތެއް އެ ގައުމުގައި ބޭއްވުން މަނާ ކޮށްފައެވެ.

އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކު އެވެ. ދެވަނައިގައި އޮތް ލާޒިއޯއަށް 26 މެޗުން ވަނީ 62 ޕޮއިންޓު ލިބިފައެވެ.