މާލެއިން އިތުރު ދިވެއްސެއް ކޮވިޑް-19ށް ޕޮޒިޓިވްވެއްޖެއެވެ.

އަންގާރަ ދުވަހު ނެޝަނަލް އެމަރޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި މަބްރޫކް އަޒީޒު ވިދާޅުވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމަށްފަހު, އަންގާރަ ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމާ ހަމައަށް 17 މީހަކު ޕޮޒިޓިވްވެފައިވާ ކަމަށެވެ. އެޗްޕީއޭއިން އަމަލު ކުރަމުން އަންނަ ގޮތުން ޕޮޒިޓިވްވާ ފަރާތްތައް އައިސޮލޭޝަނަށް ވަގުތުން ގެންދިއުމުގެ މަސައްކަތް ކުރާނެއެވެ.

17 ވަނަ މީހަކު އަންގަރަ ދުވަހު ޕޮޒިޓިވްވެއްޖެ ކަމަށް މަބްރޫކް ވިދާޅުވި ނަމަވެސް އެމީހާގެ އިތުރު އެއްވެސް މައުލޫމާތެއް ހާމައެއް ނުކުރެއެވެ. ހަމައެކަނި މަބްރޫކް ވިދާޅުވީ އެއީ ދިވެއްސެއް ކަމަށެވެ.

މިއާއެކު ރާއްޖޭގައި ޕޮޒިޓިވްވި މީހުންގެ އަދަދު ވަނީ 84ށް އަރާފައެވެ. އަދި މާލޭގައި ޕޮޒިޓިވްވި މީހުންގެ އަދަދު ވަނީ 64ށް އަރާފައެވެ.

ރާއްޖެއިން ކޮމިއުނިޓީ ސްޕްރެޑް ކޭސްއެއް އެންމެ ފުރަތަމަ ފެނިފައިވަނީ މިހިނގާ އޭޕްރީލް މަހުގެ 15 ވަނަ ދުވަހުއެވެ. އޭގެ ފަހުން މިހާތަނަށް އައިއިރު ދުވާލެއްގެ މައްޗަށް ގިނަ ޕޮޒިޓިވް ކޭސްތަކެއް ދަނީ ފެންނަމުންނެވެ. އަދި އެ ކޭސްތަކާއި ގުޅިގެން ކޮންޓެކްޓް ޓްރޭސިންގއާ ސާމްޕަލް ނެގުމުގެ މަސައްކަތް މިހާރުވެސް ކުރިއަށްދާއިރު، މާލެ ސަރަޙައްދު ވަނީ ލޮކްޑައުންވެސް ކޮށްފައެވެ.

ކޮމިއުނިޓީ ސްޕްރެޑް ފެނުނު ފަހުން މިހާތަނަށް ފެނުނު ކޭސްތައް

އޭޕްރީލް 15: 1 ކޭސް

އޭޕްރީލް 16: 2 ކޭސް

އޭޕްރީލް 17: 5 ކޭސް

އޭޕްރީލް 18: 7 ކޭސް

އޭޕްރީލް 19: 17 ކޭސް

އޭޕްރީލް 20: 15 ކޭސް

އޭގެ އިތުރުން، ހޯމަ ދުވަހުގެ ރޭ ދަންވަރު ޕޮޒިޓިވްވި 2 މީހުންނާއި، އަންގާރަ ދުވަހުގެ ހެނދުނު ޕޮޒިޓިވްވި 13 މީހުންނާއި، މެންދުރު ޕޮޒިޓިވް 1 މީހަކާއި، ހަވީރު ޕޮޒިޓިވްވި 1 އާއެކު އަންގާރަ ދުވަހު ޕޮޒިޓިވްވި މީހުންގެ އަދަދު ވަނީ 17ށް އަރާފައެވެ.

ހޯމަ ދުވަހު އެކަނި 15 މީހަކު ކޮވިޑް-19 އަށް ޕޮޒިޓިވްވެފައިވާ އިރު، އާދީއްތަ ދުވަހު ޕޮޒިޓިވްވި މީހުންގެ އަދަދު އުޅެނީ 17 ގައެވެ.