މުގުރާ ޕެޕަރސްޕްރޭ ދޫކޮށް ޑެލިވަރީ ކޮތަޅުތައް އަތަށް މަހާލައިފި!

2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ނުފޫޒް ގަދަ ސިޔާސީ ބަޔަކު އަޑީގައި ތިބެ، ސިފައިންނާ ފުލުހުން މަގުފުރައްދައި، އޭރު ގައުމުގެ ވެރިޔަކަށް ހުންނެވި ރައީސް މުހައްމަދު ނަޝީދުގެ ސަރުކާރާއި ދެކޮޅަށް ބަޣާވާތްކޮށް، ވެރިކަން ވައްޓާލިއެވެ. އެދުވަހު ސިފައިންނާ ފުލުހުންނަށް ހެދުނު ގޯހުގެ ފައިދާ ނެންގެވީ 2013 ވަނައަހަރުން ފެށިގެން ސިޔާސީ ބޭފުޅުންނެވެ.

މި ވެރިކަމުގެ ފަސް އަހަރު ދިވެހި ފުލުހުންނާ ސިފައިން ލައްވާ ބޮޑެތި ގޯސްތަކެއް ހެދިއެވެ. އާންމުންނަށް އެތަކެއް އަނިޔާއެއް ދިނެވެ. މީގެ ސަބަބުން ދިވެހިންގެ ގިނަބަޔަކު ފުލުހުންނާ ސިފައިންނަށް ކުރަމުންދިޔަ އިޙްތިރާމާއި އިތުބާރު ގެއްލި ނަފްރަތު ކުރަމުން ދިޔައެވެ. އެދުވަހު މި ދެ މުއައްސަސާ އޮތީ ނުފޫޒް ގަދަ ވެރިއެއްގެ މަޅީގައި ޖެހިފައެވެ. އެދުވަހު ހިގަމުންދިޔަ ޖަރީމާތަކާ އިދިކޮޅަށް ބަސް ބުނާ ފުލުހުންނާ ސިފައިންނަށް ބޮޑެތި އަދަބުދީ ހައްޔަރުކޮށް، ވަޒީފާއިން ވަކިކުރަމުން ދިޔައެވެ. ނަމަވެސް ރައްޔިތުންގެ ބާރުދައްކަން ލިބުނު ދުވަހު މިވަނީ އެ ބާރުވެރިކަން ނިކަން ރަގަޅަށް ދައްކާލައިފައެވެ.

2018 ވަނައަހަރުގެ ނޮވެންބަރް 16 ވަނަދުވަހު މިރާއްޖެ ޞާލިހު މަގަށް ގެންދިއުމަށް އިބްރާހިމް މުހައްމަދު ސޯލިހަށް، މިގައުމުގެ ވެރިކަން ހަވާލު ކުރެވުނެވެ. އެދުވަހަށްފަހު ދިވެހި ފުލުހުންނާއި ސިފައިންނަށް ގެއްލިފައިވީ ރައްޔިތުންގެ އިތުބާރާއި ލޯބި އަނބުރާ ހޯދައިދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވެވި މަސައްކަތް ވަރަށް ކާމިޔާބެވެ. މިއަދު މިފެންނަނީ މުގުރާ ޕެޕަރސްޕްރޭ ދޫކޮށްލައި އެ އަތްތަކަށް ޑެލިވަރީ ކޮތަޅުތައް މަހާލާފައިވާ މަންޒަރެވެ. ރައްޔިތުންގެ ގެތަކަށް ބޭނުންވާ ފެނާ ގެއަށް ބޭނުންވާ ސާމާނު އުފުލުމުގެ މަސައްކަތް ކުރަމުންދާ މަންޒަރެވެ. އަމިއްލަ ވެހިކަލްތަކުގައި ސާމާނުތައް އުފުލަމުން އެދަނީ މިގައުމުގައި ދިރިއުޅޭ ކޮންމެ ފަރުދެއްގެ ރައްކާތެރިކަން ކަށަވަރު ކުރުމުގެ މާތް މަޤްސަދުގައެވެ. ތިމާގެ އަމިއްލަ ފުރާނަ އަތްމައްޗަށް ލައިގެން ރައްޔިތުމީހާ ގެއަށް ވެއްދުމުގެ މަސައްކަތް ކުރަމުންދާ ތަނެވެ.

މިއަދު މިފެންނަނީ އެ ފުލުހުންނާ ސިފައިންގެ ހަގީގީ ބޭނުން ހިފަމުންދާ މަންޒަރެވެ. ސިޔާސީ ފިކުރުތަކުން އެއްކިބާވެ ރައްޔިތުންގެ ޙައްޤުގައި މަސައްކަތްކުރާ މަންޒަރެވެ. ކޮވިޑް-19އާ އެންމެ ގަދައަށް ހަނގުރާމަ ކުރަމުންދާ ޑޮކްޓަރުންނާއި ނަރުހުންގެ ނިވާފަތް ގަޑެއްގެ ގޮތުގައި، މިއަދު ފެންނަމުން މިދަނީ ދިވެހި ސިފައިންނާ ފުލުހުންނެވެ. މިބަލިމަޑުކަން ފެތުރުނަނުދީ 24 ގަޑިއިރު މަގުތައް މަތީ އެ ހޭދަކުރަމުން އެދަނީ ދިވެހި ފުލުހުންނާ ސިފައިންނެވެ.

މި ބިރުވެރި ވަގުތުގައި އަނބިދަރިންނާއި އާއިލާއާ ދުރުގައި، އެ ހޭދަ ކުރަމުންދާ ކޮންމެ ސިކުންތެއް ދިވެހި ކޮންމެ ރައްޔިތެއް، ފަހުރުވެރި ކަމާއެކު ބަލައިގަންނާނެއެވެ. މިއަދު އޯގާތެރިކަމާއެކު އެ ދެއްވާ މެސެޖަކީ ހުރިހާ ރައްޔިތުންމެ ގެއަށް ވެންނެވުމަށެވެ. ތަންފީޒީ އިދާރާތަކުން އެ އަންގާ އެންގުންތަކަށް ދިވެހިރައްޔިތުން ބޯލަނބައި ކިޔަމަން އެވަނީ ހިތުން ރުހުމުންނެވެ. އެދުވަހު ކަރުނަގޭހުން ރޮއްވާލި ލޯތައް މިއަދު ތެންމާ އެލަނީ ސިފައިންނާއި ފުލުހުންގެ އޯގާތެރިކަންފެނިފައެވެ. އުފާވެރި ކަރުނައިންނެވެ.