ޓްރާންސްޕޯޓަބަލް 6 ވެންޓިލޭޓަރ އާދިއްތަ ދުވަހު ރާއްޖެ ގެނެސްފި
19 އެޕްރީލު 2020 | އާދީއްތަ 14:22މިވަގުތު ރާއްޖޭގައި 97 ވެންޓިލޭޓަރ އަދި 77 އައިސީޔޫ ބެޑް އެބަހުރި
ފަރުކޮޅުފުށީގައި ގާއިމުކޮށްފައިވާ ކަރަންޓީނު ފެސިލިޓީ
ރާއްޖެ ގެނައުމަށް ހަމަޖެހިފައިވާ ވެންޓިލޭޓަރ ތަކުގެ ތެރެއިން އާދިއްތަ ދުވަހު ޓްރާންސްޕޯޓަބަލް 6 ވެންޓިލޭޓަރ ގެނެސްފައިވާކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ މިވަގުތު ރާއްޖޭގައި 97 ވެންޓިލޭޓަރ އަދި 77 އައިސީޔޫ ބެޑް އެބަހުރިކަމަށެވެ.
އޭނާ ވިދާޅުވީ، 135 އައިސީޔޫ ވެންޓިލޭޓަރާއި ޓްރާންސްޕޯޓަބަލް 14 ވެންޓިލޭޓަރ އިތުރަށް ހޯދުމުގެ މަސައްކަތް ކުރިއަށްދާ ކަމަށެވެ. މީގެތެރެއިން 6 ވެންޓިލޭޓަރ އާދިއްތަ ދުވަހު ރާއްޖެ ގެނެސްފައިވާއިރު މިހާރު މިމަހުގެ 21 އަދި 22 ހިސާބުގައި ބާކީ ހުރި ވެންޓިލޭޓަރ ތައް ގެންނާނެކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ ކޮވިޑް-19 ޖެހިގެން ހާލުބޮޑުވާ ބަލި މީހުންނަށް މިހާރު ރާއްޖޭގައި ހުރި ވެންޓިލޭޓަރުތައް ބޭނުންކުރާނެ ކަމަށާއި އަދި އެހެން ބަލިތަކުގެ މީހުންނަށް ބޭނުންނުކުރާ ވެންޓިލޭޓަރުތައްވެސް ޚާއްސަ ކުރާނީ ކޮވިޑް-19 ޖެހޭ މީހުންނަށް ކަމަށެވެ.
މީގެކުރިން ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ބައިނަލްއަގްވާމީ ހަތަރު ޖަމިއްޔާއަކުން ރާއްޖެއަށް ވެންޓިލޭޓަރު ހަދިޔާކުރަން ނިންމާފައިވާކަަމަށެވެ. ޔުނައިޓެޑް ނޭޝަން ޗިލްޑްރެން އެމެޖެންސީ ފަންޑު (ޔުނިސެފް) ގެ ފަރާތުން ދެ ޓްރާންސްޕޯޑަބަލް ވެންޓިލޭޓަރާއި، ވޯލްޑް ބޭންކުގެ ފަރާތުން 18 ވެންޓިލޭޓަރަކާއި، އޭޝިއަން ޑިވޮލޮޕްމެންޓް ބޭންކް (އޭޑީބީ) އިން ހަތަރު ވެންޓިލޭޓަރެއްގެ އިތުރުން އިސްލާމިކް ޑިވޮލޮޕްމެންޓް ބޭންކު (އައިޑީބީ) އިން ތިން ވެންޓިލޭޓަރެއް ރާއްޖެއަށް ހަދިޔާ ކުރަން ނިންމާފައިވާ ކަމަށެވެ.
މީގެއިތުރުން މަބްރޫކް ވަނީ ސަރުކާރުން ގެނައުމަށް މަސައްކަތް ކުރައްވާ ވެންޓިލޭޓަރތަކުގެ މައުލޫމާތުވެސް ހިއްސާކުރައްވާފަ އެވެ. އެގޮތުން 26 ވެންޓިލޭޓަރު ގެނައުމަށް 8.3 މިލިއަން ރުފިޔާ ދައްކާގޮތަށް ނާޑް ނަމަކަށް ކިޔާ ކުންފުންޏަކާއި އެކު އެގްރީމެންޓް ހަދާފައިވާއިރު 50 ވެންޓިލޭޓަރު ގެނައުމަށް 14.4 މިލިއަން ރުފިޔާ ހޭދަކުރުމަށް މެޑްޓެކް ކުންފުންޏާއެކު އެގްރީމެންޓް ކުރެވިފައިވާކަމަށް މަބްރޫކް ވިދާޅުވި އެވެ.
34 މިލިއަން ރުފިޔާ ހޭދަކޮށްގެން ދުނިޔޭގެ ސިއްހަތު ޖަމިއްޔާ މެދުވެރިކޮށް ވެންޓިލޭޓަރުތަކެއް ގެނައުމަށް ހަމަޖެހިފައިވާ ކަމަށްވެސް މަބްރޫކް ވިދާޅުވިއެވެ. އެގޭ ތެރޭގައި ހިމެނެނީ އައިސީޔޫގައި ބަހައްޓާ 65 ސްޓޭޝަނަރީ ވެންޓިލޭޓަރާއި ދަތުރުމަތީގައި ބޭނުންކުރާ 10 ވެންޓިލޭޓަރެވެ. އެ ވެންޓިލޭޓަރުތައް ގެނައުމަށް އެގްރީމެންޓް ކުރެވިފައިވަނީ ދުބާއީގެ އެކްޒިކިއުޓާސް ޖެނެރަލް ޓްރޭޑިން ކުންފުންޏަކާ ކަމަށް މަބްރޫކް ވިދާޅުވި އެވެ.
