އައްޑޫއާއި ފުވައްމުލަކުގައި ޖަމާއަތުގައި ނަމާދުކުރުން މެދުކަނޑާލަން އަންގައިފި

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން، އައްޑޫ ސިޓީއާއި ފުވައްމުލަކު ސިޓީގައި ޖަމާއަތުގައި ނަމާދުކުރުން ވަގުތީގޮތުން މެދުކަނޑާލަން އިސްލާމިކް މިނިސްޓަރީން އަންގައިފި އެވެ.

ހޮނިހިރު ދުވަހު އިސްލާމިކް މިނިސްޓްރީން ނެރެފައިވާ ސަރކިއުލަރއެއްގައި ބުނެފައިވަނީ، އައްޑޫ ސިޓީއާއި އާއި ފުވައްމުލަކު ސިޓީގައި 18 އޭޕްރީލް ވަނަ ދުވަހުގެ މަޣްރިބް ނަމާދުން ފެށިގެން 23 އޭޕްރީލް ވަނަ ދުވަހުގެ އަޞްރު ނަމާދުގެ ނިޔަލަށް ފަރުޟު ނަމާދުގެ ޖަމާއަތް މިސްކިތުގައި ނެހެދުމަށް ނިންމާފައިވާ ކަމަށެވެ.

މިއީ މާލެ ސަރަހައްދު ފިޔަވައި، މީހުން ދިރިއުޅޭ ރަށެއްގައި ފަރުޟު ނަމާދު ޖަމާއަތް މިސްކިތުގައި ކުރުން މެދުކަނޑާލަން ޖެހުނު ފުރަތަމަ ފަހަރެވެ.

އައްޑޫ ސިޓީއާއި ފުވައްމުލަކު ސިޓީއަކީ މާލެ ފިޔަވައި އެންމެގިނަ މީހުން ދިރިއުޅޭ ދެ ސިޓީ އެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެމުންދާތީ، މިހާލަތަށް ރިޔާއަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިއްމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން، މިދިއަ މާރޗު މަހުގެ 18 ވަނަ ދުވަހުގެ މެންދުރު ނަމާދުން ފެށިގެން، މާލެ، ހުޅުމާލެ، ވިލިމާލެ، އަދި ސަރުކާރުން ފޭބުން މަނާކުރާ ހުރިހާ ރިސޯޓްތަކެއްގައި ފަރުޟު ނަމާދާއި ހުކުރު ނަމާދުގެ ޖަމާއަތް މިސްކިތުގައި ނުހެދުމަށް ނިންމާފައި ވެއެވެ.

އެގޮތުން މާލެ ސަރަހައްދާއި އަރާފޭބުން މަނާ ކޮށްފައިވާ ރިސޯޓުތަކުން ޖަމާތުގައި ނަމާދު ކުރުން ވަގުތީ ގޮތުން މެދުކަނޑާލާފައި އޮތްއޮތުން މި އޭޕްރީލް މަހުގެ 30 ވަނަ ދުވަހުގެ ނިޔަލަށް އޮންނާނެ ކަމަށާއި، އަދި ލޮކްޑައުން ކޮށްފައި އޮތްނަމަ ލޮކްޑައުން މުއްދަތު ނިމެންދެން މިހާލަތު ދެމިއޮންނާނެ ކަމަށްވެސް އިސްލާމިކް މިނިސްޓްރީން ބުނެއެވެ.

މިޙާލަތުގައި މިސްކިތުގައި ހަމައެކަނީ ބަންގި ގޮވުމަށާއި، ބަންގީގެ ފަހުގައި އަރަބި ބަހުންނާއި އަދި ދިވެހިބަހުން "ހުރިހާ ބޭފުޅުން ގޭގައި ނަމާދު ކުރައްވާ!" މިފަދައިން 2 ފަހަރު ގޮވުމަށް އިމާމުންނަށް އަންގަވާކަމަށެވެ.

މިދަނޑިވަޅުގައި މިސްކިތުގެ ޖަމާޢަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ގިނަގިނައިން ދުޢާކޮށް، އިސްތިޣްފާރު ކުރުމަށް ހުރިހާ ރައްޔިތުންނަށް ނަޞޭޙަތްތެރިވުމަށް އިސްލާމިކް މިނިސްޓްރީން ވަނީ ވަޞިއްޔަތް ކުރައްވާފައެވެ.

މީގެ އިތުރުން ކަމާބެހޭ ފަރާތްތަކުން ދޭ އިރުޝާދުތަކާ އެއްގޮތަށް ޢަމަލުކުރުމަށާއި، ﷲގެ ރަޙްމަތުން މާޔޫސްނުވެ، ސަބަބު ތަކުގައި ހިފާ، ފުރިހަމައަށް ﷲއަށް ވަކީލުކޮށް އުޅުމަށްވެސް ވަނީ އިސްލާމިކް މިނިސްޓްރީން ނަސޭހަތްތެރިވެފައެވެ.

ރާއްޖޭގެ އިތުރުން ސައުދީ އަރަބިއްޔާ އާއި މިސްރުފަދަ ބޮޑެތި އިސްލާމީ ގައުމުތަކުގައިވެސް ކޮވިޑް-19 އާ ގުޅިގެން ޖަމާއަތުގައި ނަމާދު ކުރުން ވަނީ ވަގުތީ ގޮތުން ހުއްޓާލާފައެވެ.