ސްކޮޓްލެންޑްގެ ލީގުތަކާއި މެދު އަމަލުކުރާނެ ގޮތެއް ކަނޑައެޅުމަށް ސްކޮޓިޝް ޕްރޮފެޝަނަލް ފުޓްބޯލް ލީގު (އެސްޕީއެފްއެލް) އިން އިސްވެ ނަގާ ވޯޓާ މެދު ލިވަޕޫލްގެ ކުރީގެ މިޑްފީލްޑަރު އަދި ރޭންޖާސްގެ ކޯޗު ސްޓީވަން ޖެރާޑް ނުރުހުން ފާޅުކޮށްފިއެވެ.

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ސްކޮޓްލެންޑުގައިވެސް ވަނީ ފުޓްބޯޅަ މުބާރާތްތައް މެދު ކަނޑާލާފައެވެ.

ސްކޮޓިޝް ޕްރިމިއާޝިޕް (އެއްވަނަ ޑިވިޝަން) ނޫން ދަށް ޑިވިޝަނުގެ ލީގުތައް ނިންމާލަން ނަގާ ވޯޓު ފާސްވުމަށް ބޭނުންވާ އަދަދު ބުރާސްފަތި ހަމަވީ ޑަންޑީން ވޯޓު ބަދަލުކުރުމުންނެވެ. ޑަންޑީން ވަނީ އެސްޕީއެފްއެލް އިން ލީގު ކެންސަލްކުރަން ހުށަހެޅުމުން އެކަމާ ވަރަށް ބޮޑަށް ދެކޮޅު ހަދާފައެވެ. އެކަމަކު ކުއްލިއަކަށް ޑަންޑީން ނިންމުން ބަދަލުކުރުމުން މިހާރު ވަނީ ދަށް ޑިވިޝަނުގެ ލީގުތަށް ކެންސަލްކުރަން ނިންމަން ތައްޔާރުވެފަ އެވެ.

ސްކޮޓްލެންޑްގެ 42 ކްލަބުގެ ވޯޓުގެ 81 އިންސައްތަ ވަނީ ދަށް ޑިވިޝަންތަކުގެ ލީގު ނިންމާލަން ލިބިފައެވެ. މިއީ މެޖޯރިޓީ އަށް ވުރެން ވެސް ގިނަ ވޯޓުތަކެއް ކަމަށް ބަލައި، ސްކޮޓިޝް ޕްރިމިއާޝިޕް ވެސް ކެންސަލްކުރުމުގެ އިޚުތިޔާރު އެސްޕީއެފްއެލް ބޯޑަށް ލިބެ އެވެ. އެސްޕީއެފްއެލްގެ ބޯޑުން އަންނަނީ ޕްރިމިއާޝިޕް ވެސް ނިންމާލަން މަޝްވަރާކުރަމުންނެވެ.

މިކަމާއި ބެހޭ ގޮތުން ޖެރާޑް ބުނީ ކަންތައްތައް މިދަނީ ގަބޫލުކުރަން އުނދަގޫ ގޮތަކަށް ކަމަށާއި މިއީ އެސްޕީއެފްއެލް އިން ލީޑަރުންގެ ގޮތުގައި ގޮތް ނިންމަންވީ ވަގުތުކަމަށެވެ. މީގެ އިތުރުން ޖެރާޑް ބުނީ މިހާރު ކަންތައްތައް މިދަނީ ރަނގަޅަށް ނޫން ކަމަށާއި ފުޓުބޯޅަގެ ރަނގަޅު އުސޫލުން ބޭރުން ކަމަށެވެ.

ޖެރާޑުގެ ވިސްނުމަށް އޭނާގެ ކްލަބުން ވެސް ވަނީ ތާއިދުކޮށްފައެވެ. ޖެރާޑުގެ ނިންމުމަށް ތާއިދުކޮށް ރޭންޖާސްއިން ބުނީ އެސްޕީއެފްއެލްއިން ކަންތައް ކުރާގޮތް ތަހުގީގުކުރަން ޖެހޭ ކަމަށެވެ.

މިހާރު އޮތް ހިސާބުން ލީގު ނިންމާލަން އެސްޕީއެފްއެލް އިން ކަނޑައަޅައިފިނަމަ، ޕްރިމިއާޝިޕްގެ ޗެމްޕިއަންކަން ލިބޭނީ ސެލްޓިކަށެވެ. ލީގުގެ އެއްވަނައިގައި ސެލްޓިކް އޮތީ 13 ޕޮއިންޓުގެ ލީޑަކާ އެކުއެވެ. ދެވަނައިގައި އޮތީ ޖެރާޑްގެ ރޭންޖާސް އެވެ.