އެޓޫގެ ދީލަތި އެހީއެއް ކެމަރޫން ރައްޔިތުންނަށް

ކެމަރޫން ރައްޔިތުންނަށް ދީލަތި އެހީއެއް ވާން ބާސެލޯނާ އަދި ކެމަރޫން ގައުމީ ޓީމުގެ ކުރީގެ ފޯވާޑް ސަމުއެލް އެޓޫ ނިންމައިފި އެވެ.

މުޅި ދުނިޔޭގައި ހަލިވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ އަސަރު ކެމަރޫނަށްވެސް ކޮށްފައިވާއިރު، އެޓޫގެ އަމިއްލަ ފައުންޑޭޝަނުން ވަނީ ކެމަރޫންގެ އެއް ލައްކަ މީހުންނަށް އެހީ ފޯރުކޮށްދޭން ނިންމާފައެވެ. އެގޮތުން އެ ގައުމުގެ ހަތަރު ސިޓީއެއްގެ ބައި ލައްކަ މީހުންނަށް ކާބޯތަކެތީގެ އިތުރަށް ސެނިޓައިޒާ ހަދިޔާކުރަން ވަނީ ނިންމާފައެވެ. އޭގެ އިތުރުން ޓެކްސީ ޑްރައިވަރުންނަށް ހާއްސަ ކޮށްގެން ބައި ލައްކަ ފޭސް މާސްކް ހަދިޔާކުރަން ވެސް ވަނީ ނިންމާފައެވެ.

އެޓޫ ފައުންޑޭޝަނުން ނެރުނު ބަޔާނެއްގައި ބުނެފައިވަނީ މި ދަނޑިވަޅަކީ ހުރިހާ އެންމެންވެސް އެކުގައި މަސައްކަތް ކުރަންވީ ވަގުތު ކަމަށެވެ. އަދި އާންމު ރައްޔިތުން ސިއްހީ ކަންކަމަށް އިތުރަށް ފަރުވާތެރިވުމަށް މި ބަޔާނުގައި ވަނީ ގޮވާލާފައެވެ.

އެފްރިކާގެ މޮޅު ކުޅުންތެރިޔާގެ މަގާމު ހަތަރު ފަހަރު ހޯދާފައިވާ އެޓޫ، ކެމަރޫން ރައްޔިތުންނަށް ދީލަތި އެހީއެއް ވިއިރު، މީގެ ކުރިން އޭނާ ވަނީ ސޯޝަލް މީޑިއާ މެދުވެރިކޮށް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން ކަނޑައަޅާފައިވާ އުސޫލުތަކަށް ބޯލެނބުމަށް އާންމުންނަށް ނަސޭހަތްތެރިވެފައެވެ.

ކޮވިޑް-19 އާ ގުޅިގެން ކެމަރޫންގައިވެސް ފުޓްބޯޅަ ހަރަކާތްތައް ހުއްޓާލާފައިވާއިރު، އެ ގައުމުން މިހާތަނަށް 800 އަށްވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން 17 މީހަކު މިހާތަނަށް ވަނީ މަރުވެފައެވެ.