ޕްރިމިއާ ލީގު ކުޅުންތެރިންގެ ފަންޑަށް އިންގްލެންޑް ގައުމީ އަންހެން ޓީމުން އެހީވެއްޖެ

އިނގިރޭސި ޕްރިމިއާ ލީގުގެ ކުޅުންތެރިން ހާއްސަ ފަންޑަށް އެހީވާން އިންގްލެންޑް ގައުމީ އަންހެން ފުޓްބޯޅަ ޓީމުގެ ކުޅުންތެރިން ނިންމައިފި އެވެ.

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ދެކޮޅަށް އިނގިރޭސިވިލާތުގައި މަސައްކަތް ކުރާ ނެޝަނަލް ހެލްތު ސާވިސަސް އަށް އެހީވުމުގެ ގޮތުން އިނގިރޭސި ޕްރިމިއާ ލީގުގެ ކުޅުންތެރިން ވަނީ ހާއްސަ ފަންޑެއް އުފައްދާފައެވެ. "ކުޅުންތެރިން އެކުގައި" މި ނަމުގައި އުފެއްދި މި ފަންޑު މެދުވެރިކޮށް ނެޝަނަލް ހެލްތު ސާވިސަސް އަށް ފަންޑު ހޯދުމަށް ޕްރިމިއާ ލީގުގެ ކުޅުންތެރިން މަސައްކަތް ކުރާނެ އެވެ. އަދި މި ކެމްޕޭން ކުރިއަށް ގެންދަނީ ނެޝަނަލް ހެލްތު ސާވިސަސް ޗެރިޓީސް ޓުގެދާ އާ ގުޅިގެންނެވެ.

ދާދި ފަހުން އިންގްލެންޑް ގައުމީ އަންހެން ޓީމުން ވަނީ މި ފަންޑަށް އެހީވުމަށް ނިންމާފައެވެ. އިންގްލެންޑް ގައުމީ އަންހެން ޓީމުން ނެރުނު ބަޔާނެއްގައި ބުނެފައިވަނީ މި ފަންޑަށް އެހީވާން ކުޅުންތެރިން ނިންމީ ޕްރިމިއާ ލީގުގެ ކުޅުންތެރިންނާ ވާހަކަދެއްކުމަށް ފަހު ކަމަށާއި، ގައުމީ ޓީމުގެ ހުރިހާ ކުޅުންތެރިންވެސް މި ފައިންޑަށް ފައިސާ ހަދިޔާކުރަން މިހާރު ނިންމާފައިވާ ކަމަށެވެ.

އިނގިރޭސިވިލާތުން މިހާތަނަށް 90،000 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، ޕްރިމިއާ ލީގު ކުޅުންތެރިންގެ މި ފަންޑު މެދުވެރިކޮށް، ކޮވިޑް-19 އާ ދެކޮޅަށް ކުރީ ސަފުގައި މަސައްކަތް ކުރަމުން އަންނަ ފަރާތްތަކަށް އެހީވުމަށް ވަނީ ނިންމާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ޕްރިމިއާ ލީގުގެ ކްލަބުތަކުން މީގެ ކުރިން ވަނީ ނެޝަނަލް ހެލްތު ސާވިސަސް އަށް 20 މިލިއަން ޔޫރޯ ހަދިޔާ ކުރުމަށް ނިންމާފައެވެ.