300 މިލިއަން ޔޫރޯއަށް ނިއުކާސަލް ޔުނައިޓެޑް ވިއްކާލަނީ
15 އެޕްރީލު 2020 | ބުދަ 08:14ނިއުކާސަލް ގަތުމަށް ވަނީ ބިޑުކޮށްފައި
ނިއުކާސަލްގެ ވެރިޔާ މައިކަލް އޭޝްލީ
300 މިލިއަން ޔޫރޯއަށް އިނގިރޭސި ކްލަބު ނިއުކާސަލް ޔުނައިޓެޑް، އަމަންޑާ ސްޓީވްލޭ އަށް ވިއްކާލަން އުޅޭ ކަމަށް މީޑިއާ ރިޕޯޓުތައް ބުނެފިއެވެ.
މީޑިއާ ރިޕޯޓުތައް ބުނާ ގޮތުން އިނގިރޭސި ކްލަބު ނިއުކާސަލް ޔުނައިޓެޑް ގަތުމަށް އަމަންޑާ ސްޓީވްލޭ ވަނީ ބިޑުކޮށްފައެވެ. މި ބިޑުގެ އަގަކީ 300 މިލިއަން ޔޫރޯ ކަމަށް ވެސް މީޑިއާ ރިޕޯޓުތައް ބުނެއެވެ.
2017 ވަނަ އަހަރު ނިއުކާސަލްގެ ހިންގުމާއި ހަވާލުވި މައިކަލް އޭޝްލީ ވަނީ މީގެ ކުރިން އޭނާ ކްލަބު އެހެން ބަޔަކަށް ވިއްކާލާނަމަ ވިއްކާލާނީ 10 އަހަރު ފަހުން ކަމަށް ބުނެފައެވެ. އެކަމަކު ޔޫރަޕުގައި މިހާރު ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ކްލަބްގެ މާލީ ހާލަތު ދަށްވުމާއި ގުޅިގެން، ކްލަބު ވިއްކާލާނެ ކަމަށް ރިޕޯޓުތައް ބުނެއެވެ.
ނިއުކާސަލް ޔުނައިޓެޑް ވިއްކާލުމަށް މައިކަލް އޭޝްލީ ނިންމައިފައިވާ ކަމަށް މީޑިއާ ރިޕޯޓުތައް ބުނިއިރު، އޭނާ ކްލަބު ވިއްކާލުމަށް ނިންމާފައިވަނީ، ކްލަބު ހިންގާ ގޮތާއިމެދު ސަޕޯޓަރުން ހިންހަމަ ނުޖެހުމުން ކަމަށް ރިޕޯޓުތައް ބުނެއެވެ. އަދި ކްލަބު ވިއްކާލުމަށް ކްލަބުގެ ބޯޑު މެމްބަރުން ވެސް ހުށަހަޅާފައިވާ ކަމަށްވެސް ރިޕޯޓުތައް ބުނެއެވެ.
މީގެ ކުރިން މަޝްހޫރު މަޝްހޫރު ބޮކްސިން ތެޅުންތެރިޔާ ފްލޮއިޑް މޭވެދާ ވެސް ވަނީ ނިއުކާސަލް ޔުނައިޓެޑް ގަތުމަށް ޝައުގުވެރިކަން ފާޅުކޮށްފައެވެ. މޭވެދާއާ ނިއުކާސަލްއާ ގުޅުވައިގެން މީޑިއާގައި އަޑުތަކެއް ފެތުރެމުން، އޭނާ ވަނީ ނިއުކާސަލް ގަންނަން އެ ކްލަބުގެ ސަޕޯޓަރުން އެދޭނަމަ އެކަން އަންގާލަ ދޭން އެދެފައެވެ. ރިޕޯޓުތައް ބުނާ ގޮތުން މޭވަދާ ހިއްސާ އޮންނަ ބައެއް ވިޔަފާރިތަކުން މީގެ ކުރިން ވަނީ ނިއުކާސަލް ގަންނަން ނުރަސްމީކޮށް ވާހަކަތައް ކުރިއަށް ގެންގޮސްފައެވެ.
ކޮވިޑް-19 އާ ގުޅިގެން އިނގިރޭސި ޕްރިމިއާ ލީގުގެ ކުޅުން މުއްދަތެއް ނެތް ގޮތަށް ފަސްކޮށްފައިވާއިރު، ލީގު ތާވަލުގައި މިވަގުތު ނިއުކާސަލް އޮތީ ތާވަލުގެ 13 ވަނައިގައި 35 ޕޮއިންޓާއެކު އެވެ.
