ޓޮޓެންހަމްގެ ނިންމުން ބަދަލުކޮށްފި

މުވައްޒަފުންގެ މުސާރަ ކުޑަކުރުމަށާއި، ބައެއް މުވައްޒަފުން ނޯޕޭ ލީވްއަށް ފޮނުވާލަން ޓޮޓެންހަމް ހޮޓްސްޕާއިން ނިންމި ނިންމުން ބަދަލުކުރަން ނިންމައިފި އެވެ.

ދުނިޔޭގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ޓޮޓެންހަމުން މީގެ ކުރިން ވަނީ އެ ކްލަބުގެ 550 މުވައްޒަފުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި މުސާރަ ކުޑަކުރަން އެއްބަސްނުވާ މުވައްޒަފުން ނޯޕޭ ލީވްއަށް ފޮނުވާލުމަށް ވަނީ ނިންމާފައެވެ.

އިނގިރޭސިވިލާތުގައި ނޯޕޭއަށް ފޮނުވާލާ މުވައްޒަފުންނަށް ސަރުކާރުން ކަނޑައަޅާފައިވާ ސްކީމްގެ ދަށުން އެމީހެއްގެ މުސާރައިގެ 80 އިންސައްތަ ލިބެއެވެ.

ޓޮޓެންހަމްގެ މި ނިންމުމަށް އެޓީމުގެ ސަޕޯޓަރުން ފާޑު ކިޔުމާ ގުޅިގެން ހޯމަ ދުވަހު އެ ކްލަބުން ވަނީ އެ ނިންމުން ބަދަލުކުރަން ނިންމާފައެވެ. އެގޮތުން މުވައްޒަފުންގެ މުސާރަ ބަރާބަރަށް ދިނުމަށް އެ ކްލަބުން ވަނީ ނިންމާފައެވެ. އަދި މުސާރަ ކުޑަކުރާނީ ހަމައެކަނި އެ ކްލަބުގެ ބޯޑު މެމްބަރުންގެ ކަމަށްވެސް ވަނީ ބުނެފައެވެ.

ކޮވިޑް-19 ގެ ސަބަބުން ޓޮޓެންހަމަށް މާލީގޮތުން ގޮންޖެހުންތަކާ ކުރިމަތިލާން ޖެހިފައިވާއިރު، އެ ޓީމުން އަލަށް ތަރައްގީ ކުރި ފުޓްބޯޅަ ދަނޑުގެ މަސައްކަތަށް ނަގާފައިވާ އެއް ބިލިއަން ޕައުންޑުގެ ލޯނު އަދި ނުނިމެއެވެ. މި ލޯނުގައި އަދި ބާކީ ނުދައްކާ 637 މިލިއަން ޕައުންޑު އެބަހުރި ކަމަށް ރިޕޯޓުތައް ބުނެއެވެ.

ޓޮޓެންހަމުން އެ ކްލަބުގެ ނިންމުން ބަދަލުކުރިއިރު، ލީގުގެ އެއްވަނައިގައި އޮތް ލިވަޕޫލުންވެސް ވަނީ މުވައްޒަފުން ނޯޕޭއަށް ފޮނުވުމަށް ނިންމި ނިންމުން ބަދަލުކޮށްފައެވެ. މީގެ ކުރިން އިނގިރޭސި ޕްރިމިއާ ލީގުގައި ވާދަކުރަމުން އަންނަ ނިއުކާސަލް ޔުނައިޓެޑާއި، ބޯންމަތު އަދި ނޯވިޗް ސިޓީގެ ބައެއް މުވައްޒަފުން ވަނީ ނޯޕޭއަށް ފޮނުވާލާފައެވެ.