ކޮވިޑް-19 އާއި ގުޅިގެން ލޯކަލް ކައުންސިލް އިންތިޙާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޙާބު ފަސްކޮށްފިއެވެ.

ހޯމަ ދުވަހު އިލެކްޝަންސް ކޮމިޝަން (އީސީ) އިން ނެރުނު ބަޔާނެއްގައި ބުނީ، މި 2 އިންތިހާބު އޭޕްރީލް މަހުގެ 18 ވަނަ ދުވަހު ބޭއްވުމަށް ކުރިން ނިންމާފައިވީނަމަވެސް، ކޮވިޑް-19 އާއި ގުޅިގެން ރާއްޖޭގައި އިއުލާނުކޮށްފައިވާ ސިއްޙީ ކުއްލި ނުރައްކަލުގެ ޙާލަތު އޭޕްރީލް މަހުގެ 30 ވަނަ ދުވަހާއި ހަމައަށް ދެމެހެއްޓުމަށް މިނިސްޓްރީ އޮފް ހެލްތުން ނިންމާފައިވާ ކަމަށެވެ. އަދި އެކަމާ ގުޅިގެން އިންތިހާބު ބޭއްވޭނެ މާހައުލެއް ނެތް ކަމަށާއި، ޤާނޫނުގައި ބަޔާންކުރާ މުއްދަތުގައި އިންތިޙާބު ބޭއްވެން ނެތް ކަމަށް އީސީގެ ބަޔާނުގައި ބުނެފައިވެއެވެ.

އިންތިޙާބުގެ ކަންކަން ހިނގަނީ ބިރުވެރިކަމެއް ނެތް މާހައުލެއްގައި ރައްޔިތުންނަށް ވޯޓުލުމުގެ ޙައްޤު ފުރިހަމައަށް އަދާ ކުރެވޭ ގޮތަށްކަން ކަށަވަރު ކުރުމަކީ ޤާނޫނުން އީސީގެ މައްޗަށް ލާޒިމުކުރާ ކަމެއް ކަމަށްވެސް ބަޔާނުގައި ބުނެފައިވެއެވެ.

އީސީން އިތުރަށް ބުނީ، ރާއްޖޭގައި އިއުލާނުކޮށްފައިވާ ސިއްޙީ ކުއްލި ނުރައްކަލުގެ ޙާލަތުނިމި، އިންތިޙާބު ބޭއްވޭނެ މާޙައުލެއް ޤާއިމުވުމާއެކު، ނުވަތަ މިކަމުގައި އަމަލުކުރާނެ ޤާނޫނީ ހައްލެއް ލިބުމާއެކު މި އިންތިޙާބުތަކާއި ގުޅިގެން އީސީން ކަނޑައަޅާނެގޮތެއް އިއުލާނު ކުރާނެ ކަމަށެވެ.

އިލެކްޝަންސް ކޮމިޝަނުން ފުރަތަމަ ނިންމީ މިމަހުގެ 4 ވަނަ ދުވަހު އިންތިހާބު ބޭއްވުމަށެވެ. ނަމަވެސް ސިއްހީ ކުއްލި ނުރައްކަލުގެ ހާލަތު އިއުލާންކުރުމުން އިލެކްޝަންސް ކޮމިޝަނުން އިންތިހާބު މި މަހުގެ 18 ވަނަ ދުވަހަށް ފަސްކުރި އެވެ. އަދި 18 ވަނަ ދުވަހު އިންތިހާބު ބާއްވާނަމަ، ކެމްޕޭންކުރުމުގެ ހައްޤުވެސް ގެއްލޭނެތީވެ އެކަމުގައި ޤާނޫނީ ހައްލެއް ހޯދުމަށް އިލެކްޝަންސް ކޮމިޝަނުން ކޯޓަށްވެސް މައްސަލަ ހުށަހެޅި އެވެ. ނަމަވެސް މަޖިލީހުން އެކަމުގައި ޤާނޫނީ ހައްލުތަކެއް ހޯދުމުގެ މަސައްކަތް ފެށުމުން އިލެކްޝަންސް ކޮމިޝަނުން ވަނީ އިންތިހާބު ފަސްކުރުމުގެ މައްސަލަ ކޯޓުން ނަގާފަ އެވެ.

މަޖިލީހުން މިހާރުވެސް އަންނަނީ އިންތިހާބާއި ގުޅިގެން އަމަލުކުރަންޖެހޭގޮތެއް ކަނޑައެޅުމަށް ގިނަ ބިލްތަކެއްގެ މަސައްކަތް ކުރިއަށްގެންދަމުންނެވެ. އެގޮތުން ޤާނޫނެއް ވުޖޫދުކޮށްގެން އެކަމަށް ހައްލެއް ހޯދުމަށް މަސައްކަތްކުރާއި، ޤާނޫނު އަސާސީއަށް ބަދަލު ގެނައުމަށްވެސް ހުށަހެޅި އެވެ. ޤާނޫނު އަސާސީއަށް ގެންނަން ހުށަހެޅި އިސްލާހަކީ، ކައުންސިލްތަކުގައި މިހާރު ތިއްބެވި މެމްބަރުންގެ ދައުރު ދިގުވާގޮތަށް ގެންނަން ހުށަހެޅި ބަދަލު އެވެ. ނަމަވެސް މިހާލަތުގައި ޤާނޫނު އަސާސީ އިސްލާހްކުރެވިދާނެތޯ އުފެދުނު ސުވާލުތަކާއެކު ފަހުން ވަނީ އެކަމަށް ހާއްސަ ޤާނޫނެއް ރައްޔިތުންގެ މަޖިލީހަށް ހުށަހަޅާފަ އެވެ.

ސަރުކާރުގެ ފަރާތުން ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހަޅުއްވާފައިވާ މި ބިލުގައިވާގޮތުން މިހާރު ހިނގަމުންދާ ކައުންސިލްތައް އިންތިޚާބުކުރެވިފައިވަނީ 3 އަހަރުގެ ދައުރަކަށް ކަމަށް ވީނަމަވެސް، ކައުންސިލްތަކުގެ އުމުރު ޤާނޫނުއަސާސީއިން 5 އަހަރަށް ބަދަލުކޮށްފައިވާތީއާއި، ހިނގަމުންދާ ކައުންސިލްތަކުގެ އުމުރު ހަމަވާއިރު, އައު ކައުންސިލްތައް އިންތިޚާބު ނުކުރެވުމުގެ ސަބަބުން ޤާނޫނީ ހުސްކަމެއް ކުރިމަތިވާނެ ކަމަށްވެއެވެެ. މީގެ އިތުރުން ޤާނޫނުއަސާސީގެ 230 ވަނަ މާއްދާ ނިޔާކުރާގޮތުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން މެނުވީ ނުހިންގޭނޭތީ، ލާމަރުކަޒީ އުސޫލުން ހިންގާނީ ރައްޔިތުން އިންތިޚާބުކުރާ ކައުންސިލްތައް މެދުވެރިކޮށްގެންކަން ޤާނޫނުއަސާސީގެ 231 ވަނަ މާއްދާގައިވާކަމަށް ބިލުގައިވެއެވެ.

ބިލުގައިވާގޮތުން ލޯކަލް ކައުންސިލްތަކުގެ އިންތިޚާބުގެ ޤާނޫނުގެ ދަށުން ބާއްވަންޖެހޭ އިންތިޚާބު ބާއްވައި، ކައުންސިލްތަކަށް އަލަށް އިންތިޚާބުކުރެވޭ މެންބަރުން މަޤާމާ ޙަވާލުވަންދެން މި ޤާނޫނަށް ޢަމަލުކުރަން ފަށާއިރު އިންތިޚާބުކުރެވިފައިވާ އަތޮޅު ކައުންސިލްތަކާއި، ރަށު ކައުންސިލްތަކާއި ސިޓީ ކައުންސިލްތަކުގެ މެންބަރުން އެ މީހުންގެ މަޤާމުގައި ދެމިތިބޭނެ އެވެ. އަދި އެ މުއްދަތުގެ ތެރޭގައި ކައުންސިލްތަކުން ނިންމާނިންމުންތަކަކީ ޤާނޫނުއަސާސީއާއި، ޤާނޫނުގައިވާ ގޮތުގެމަތީން ފުރިހަމަބާރުވެރިކަން ލިބިގެންވާ، އަދި އެ ނިންމުންތަކަށް ކައުންސިލްތަކުން ޒިންމާވާންޖެހޭނޭ ނިންމުންތަކެއްކަމުގައި ބެލެވޭނެކަމަށް ބިލްގައިވެއެވެ.

މި ޤާނޫނަށް ޢަމަލުކުރަން ފަށާނީ މި ޤާނޫނު ތަސްދީޤުކޮށް، ދިވެހި ސަރުކާރުގެގެޒެޓުގައި ޝާއިޢުކުރާ ދުވަހުން ފެށިގެންނެވެ. ލޯކަލް ކައުންސިލް އިންތިޚާބުގެ ޤާނޫނުގެ ދަށުން ބާއްވަންޖެހޭ އިންތިޚާބުބޭއްވި އަލަށް އިންތިޚާބު ކުރެވޭ ކައުންސިލަރުން އެ މީހުންގެ މަޤާމާ ޙަވާލުވާތާރީޚުން ފެށިގެން މި ޤާނޫނު އުވޭނެކަމަށް ބިލްގައިވެއެވެ.