ކޮވިޑް-19 އާ ގުޅިގެން ވަޒީފާތަކުން ވަކިކުރާ މީހުންގެ މައްސަލަތައް ބަލަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ލޭބަރ ރިލޭޝަންސް އޮތޯރިޓީ އަށް އަންގައިފި އެވެ.

ކޮވިޑް-19 އާ ގުޅިގެން އެޗްއާރްސީއެމް އިން ކުރަމުންގެންދާ މަސައްކަތާ ގުޅޭ މައުލޫމާތު މީޑިއާ އާ ހިއްސާކުރަމުން އެ ކޮމިޝަނުން ބުނެފައިވަނީ، އަމިއްލަ ބައެއް ބޮޑެތި ކުންފުނިތަކުން މުވައްޒަފުން ވަކިކުރަމުންދާ ކަމަށާއި، މުސާރަ ނުލިބޭ ގޮތަށް ގޭގައި މަޑުކުރުމަށް އަންގަމުންދާ ކަމަށް ކޮމިޝަނަށް މައުލޫމާތު ލިބިފައިވާ ކަމަށެވެ.

މީހުން ވަޒީފާ އިން ވަކިކުރާ ކަމަށް ލިބުނު މައުލޫމާތު ތަކާއި ގުޅިގެން، އެ ކޮމިޝަނަށް ބޭނުންވާ މައުލޫމާތު އެ ކުންފުނިތަކުން ހޯދުމަށް ފަހު އެ މައްސަލަތައް ލޭބަރ ރިލޭޝަންސް އޮތޯރިޓީ ގެ ސަމާލުކަމަށް ގެނެސްފައިވާ ކަމަށް އެޗްއާރްސީއެމް އިން ވަނީ މައުލޫމާތު ދީފަ އެވެ. އަދި އެ ފަދަ މައްސަލަތައް ބެލުމަށް އެ އޮތޯރިޓީ އަށް އެ ކޮމިޝަނުން ވަނީ ދަންނަވާފަ އެވެ.

އޭގެ އިތުރުން، އެޗްއާރްސީއެމް އިން ވަނީ މި މައްސަލަތައް މިނިސްޓްރީ އޮފް ޓުއަރިޒަމް އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓް ގެ ސަމާލުކަމަށް ގެނެސްފައެވެ.

ކޮވިޑް-19 އާ ގުޅިގެން ރާއްޖޭގެ އިގްތިސާދަށް، ހާއްސަކޮށް ފަތުރުވެރިކަމުގެ ސިނާއަތަށް، ވަނީ ވަރަށް ބޮޑު ހީނަރުކަމެއް އައިސްފަ އެވެ. އެހެން ނަމަވެސް، ވަޒީފާތަކުން މުވައްޒަފުން ވަކި ނުކުރުމަށް ކަމާބެހޭ ވުޒާރާތަކުން ވަނީ އަންގާފަ އެވެ. އެގޮތުން، ޓުއަރިޒަމް މިނިސްޓްރީ އިން ވަނީ މިހެން ކަންކުރާ ރިސޯޓުތަކާ ދެކޮޅަށް ފިޔަވަޅު އަޅާނެ ކަމުގެ އިންޒާރު ދީފަ އެވެ.

މި ދަނޑިވަޅުގައި ވިޔަފާރިތަކަށް ދިމާވެފައިވާ ދަތި ތަކުން އަރައިގަތުމަށް މަގުފަހި ކޮށްދިނުމުގެ ގޮތުން ސަރުކާރުން އިއުލާންކޮށްފައިވާ ލޯނު ސްކީމްގައި ބައިވެރިވުމުގެ މައިގަނޑު އެއް ޝަރުތަކީ ވެސް މުވައްޒަފުން ވަޒީފާ އިން ވަކި ނުކުރުމެވެ. އަދި މުވައްޒަފުން ވަކިކޮށް، މުސާރަ އުނި ކުރާ ފަރާތްތަކަށް އެހީ ފޯރުކޮށް ނުދޭން ސަރުކާރުން ވަނީ ނިންމާފަ އެވެ.