ކޮވިޑް-19 އާއި ގުޅިގެން ބަހްރައިންގަ ތާށިވި ސައުދީގެ ރައްޔިތުންގެ ފުރަތަމަ ބެޗު ސައުދީއަށް ގޮސްފި

ކޮވިޑް-19 އާއި ގުޅިގެން ބަހްރައިންގައި ތާށިވި ސައުދީޢަރަބިއްޔާގެ ރައްޔިތުންގެ ތެރެއިން 196 މީހުން މިއަދު ސައުދީއަށް ގެންގޮސްފިއެވެ.

ބަހްރައިންގައި ހުންނަ ސައުދީ ޢަރަބިއްޔާގެ އެމްބަސީއާއި ޙަވާލާދީ ބޭރުގެ މީޑީއާތަކުން ރިޕޯޓުކުރާގޮތުގައި، މި މީހުން އެއްގަމު މަގުން ސައުދީ އަރަބިއްޔާއަށް އެތެރެވެފައިވަނީ ދެޤައުމުގެ ގުޅޭ މައި ދޮރާށިކަމުގައިވާ "ކިންގް ފަހްދު ކޯޒްވޭ" އިންނެވެ.

ޚަބަރުލިބިފައިވާ ގޮތުގައި ދެޤައުމުގެ ކަމާއިބެހޭ އިސް މަސްއޫލުވެރިންގެ މެދުގައި މަޝްވަރާ ކުރެވި ގޮތެއް ނިންމަވާފައިވާއިރު، ކުރިޔަށް އޮތް 4 ދުވަހުވެސް ބަހްރައިންގައި ތިބި ސައުދީގެ ރައްޔިތުން އެއްގަމު މަގުން ސައުދީއަށް އެތެރެވާނެއެވެ. ބަހްރައިންގައި ތާށިވި ސައުދީގެ ރައްޔިތުން އެކަހެރިކޮށްފައި ތިބީ ފެންވަރު ރަނގަޅު ހަތަރު ހޮޓަލެއްގައި ކަމަށް ސައުއީ ގެޒެޓުގައިވެއެވެ. ކަރަންޓީންގެ މުއްދަތު މިމީހުން ހަމަވެފައިވާތީ ސައުދީއަށް އައުމުން އިތުރަށް ކަރަންޓީންކޮށްފައެއް ނުވެއެވެ.

ސައުދީ ރަސްގެފާނު ސަލްމާން ބިން އަބްދުލް އަޒީޒު ވަނީ އާދީއްތަ ދުވަހު ޤައުމުން ބޭރުގައި ތިބި މީހުންނާމެދު ޢަމަލުކުރާނެ ގޮތުގެ ޚާއްޞަ ޤަރާރެއް ޢާންމުކުރައްވާފައެވެ. މި ޤަރާރު ތަންފީޒުކުރުމުގެ މަސައްކަތް އެޤައުމުގެ ދާޚިލީ ވުޒާރާއާއި، ޚާރިޖިއްޔާ ގުޅިގެން ދަނީ ކުރަމުންނެވެ. އެގޮތުން އަންނަ އާދީއްތަ ދުވަހުން ފެށިގެން ބޭރު ޤައުމުތަކުގައި ތިބި މީހުންނަށް، ނަންނޯޓުކުރުމުގެ ފުުރުޞަތު ބަނީ ހުޅުވާލާފައެވެ. އެގޮތުން އާދީއްތަ ދުވަހުން ފެށިގެން ފަސްދުވަހުގެ ތެރޭގައި އެމީހުން ދަތުރުކުރާ ވަގުތާއި، އެހެނިހެން ޒާތީ މަޢުލޫމާތި ޚާރިޖިއްޔާއައި ހިއްސާކުރުމަށް ވަނީ އެދިފައެވެ.