ފަންޑު ހޯދުމަށް ޕްރިމިއާ ލީގު ކުޅުންތެރިންގެ ހާއްސަ ކެމްޕޭނެއް

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ދެކޮޅަށް އިނގިރޭސިވިލާތުގައި މަސައްކަތް ކުރާ ނެޝަނަލް ހެލްތު ސާވިސަސް އަށް އެހީވުމުގެ ގޮތުން އިނގިރޭސި ޕްރިމިއާ ލީގުގެ ކުޅުންތެރިން ހާއްސަ ކެމްޕޭނެއް ފަށައިފި އެވެ.

"ކުޅުންތެރިން އެކުގައި" މި ނަމުގައި ފެށި މި ކޭމްޕޭން މެދުވެރިކޮށް ނެޝަނަލް ހެލްތު ސާވިސަސް އަށް ފަންޑު ހޯދުމަށް ޕްރިމިއާ ލީގުގެ ކުޅުންތެރިން މަސައްކަތް ކުރާނެ އެވެ. އަދި މި ކެމްޕޭން ކުރިއަށް ގެންދަނީ ނެޝަނަލް ހެލްތު ސާވިސަސް ޗެރިޓީސް ޓުގެދާ އާ ގުޅިގެންނެވެ.

އިނގިރޭސިވިލާތުން މިހާތަނަށް 60،000 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، ޕްރިމިއާ ލީގު ކުޅުންތެރިންގެ މި ކެމްޕޭން މެދުވެރިކޮށް، ކޮވިޑް-19 އާ ދެކޮޅަށް ކުރީ ސަފުގައި މަސައްކަތް ކުރަމުން އަންނަ ފަރާތްތަކަށް އެހީވުމަށް ވަނީ ނިންމާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ޕްރިމިއާ ލީގުގެ ކްލަބުތަކުން މީގެ ކުރިން ވަނީ ނެޝަނަލް ހެލްތު ސާވިސަސް އަށް 20 މިލިއަން ޔޫރޯ ހަދިޔާ ކުރުމަށް ނިންމާފައެވެ.

އަދި ކްލަބުތަކަށް ދިމާވެފައިވާ މާލީ ގޮންޖެހުންތަކުން އަރައިގަތުމަށް، ޕްރިމިއާ ލީގުގެ ކުޅުންތެރިންގެ މުސާރައިން ވަރަށް އަވަހަށް 30 އިންސައްތަ އުނިކުރާނެ ކަމަށް ރިޕޯޓުތައް ބުނެއެވެ. އެކަމަކު ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ވަނީ އެކަމަށް ދެކޮޅު ހަދާފައެވެ. އެ ޔޫނިއަނުން ބުނީ ކުޅުންތެރިންގެ މުސާރައިން 30 އިންސައްތަ އުނިކުރުމުން، ކްލަބުތަކަށް ޖުމްލަ 500 މިލިއަން ޔޫރޯ އެއްކުރެވޭ ކަމަށެވެ. އެއާއެކު އިނގިރޭސިވިލާތުގެ ސަރުކާރަށް ދައްކަން ޖެހޭ ޓެކްސް ފައިސާއިން 200 މިލިއަން ޔޫރޯ މަދުވާނެ ކަމަށްވެސް ވަނީ ބުނެފައެވެ. އަދި މިއާއެކު އެކަމުގެ ސަބަބުން ބައެއް ކްލަބުތަކުން ނާޖައިޒު ފައިދާ ނަގަން މަސައްކަތް ކުރާނެ ކަމަށްވެސް ވަނީ ބުނެފައެވެ.