ކޮވިޑް-19: ވައިރަސްއަށް ޝައްކުކުރެވިގެން އައްޑޫން ސާމްޕަލް ނެގި 3 މީހުން ނެގެޓިވް
މި 3 މީހުންގެ މައުލޫމާތެއް އެޗްޕީއޭއިން ހާމަކޮށްފައި ނުވޭ
އައްޑޫ އިކުއެޓޯރިއަލް ހޮސްޕިޓަލް
ކޮވިޑް-19 އަށް ޝައްކުކުރެވޭ އަލާމާތްތަކެއް ހުރެގެން އަޑޫ ސިޓީން ސާމްޕަލް ނެގި މީހުންގެ ޓެސްޓުގެ ނަތީޖާ ނެގެޓިވްވެފައިވާ ކަމަށް އެޗްޕީއޭއިން ހާމަކޮށްފިއެވެ.
އެޗްޕީއޭއިން ބުނީ ރައްކާތެރިކަމުގެ ގޮތުން ޢަމަލު ކުރަމުންދާ އުޞޫލުގެ ދަށުން، ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން އައްޑޫ ސިޓީން 3 ދިވެއްސެއްގެ ގައިން ނެގި ސާމްޕަލްގެ ނަތީޖާ ނެގެޓިވް ވެފައިވާ ކަމަށެވެ.
ނަމަވެސް ނެގެޓިވްވި ތިން މީހުންނަކީ ކޮންބައެއްކަމެއް އަދި އިތުރު މަޢުލޫމާތެއް ހާމަކޮށްފައެއް ނުވެއެވެ. މި ފަހުން އިންޑިއާގެ ކޮޗިންއިން އައްޑޫ ސިޓީއަށް އައި އިރުވެސް ހުންއައިސް ހުރިމީހެއްގެ މައްސަލަ ބޮޑުވިއެވެ. މި މީހާގެ ހަށިގަނޑުގައި ހުން ހުރުމުން ޑޮކްޓަރަށް ދެއްކުމަށްޓަކައި ޖެހިގެން އައިދުވަހު އޭނާ އައްޑޫ އިކުއަޓޯރިއަލް ހޮސްޕިޓަލަށް ދިއުމުން އޭނާ ބެލި ޑޮކްޓަރާއި، ދެ ނަރުހުން އައިސޮލޭޓްކޮށް ރައްކާތެރިކަމުގެ ގޮތުން ފިޔަވަޅު އެޅިއެވެ.
ރާއްޖޭގައި ކޮވިޑް-19 އަށް ޕޮޒިޓިވްވެ ފަރުވާ ހޯދަމުންދަނީ ތިން ދިވެހިންނެވެ. އެ ތިން މީހުންނަކީ ވެސް އިނގިރޭސިވިލާތުން ރާއްޖެ އައި ތިން ދިވެހިންނެވެ. ތިން މީހުން ވެސް ރާއްޖެ އައި ގޮތަށް ތިބީ ކަރަންޓީނު ފެސިލިޓީގައެވެ.
