ކޮވިޑް-19: ސާރކް އެމަޖެންސީ ފަންޑަށް ދިވެހި ރާއްޖެއިން 2 ލައްކަ ޑޮލަރު ދެނީ
2 ލައްކަ ޑޮލަރު (3،084،00 ތިން މިލިއަން އަށްޑިހަ ހަތަރު ހާސް ރުފިޔާ) ދިވެހި ރާއްޖެއިން ފަންޑަށް ދޭނެ
ސާރކް ގައުމުތަކުގެ ލީޑަރުންގެ ވީޑިއޯ ކޮންފަރެންސްގެ ތެރެއިން - ރާއްޖެއެމްވީ
ސާރކްގެ ގައުމުތަކުން ކޮވިޑް-19 އާއި ދެކޮޅަށް މަސައްކަތް ކުރުމުގެ ގޮތުން ހުޅުވަން ނިންމި އެމަޖެންސީ ފަންޑަށް ދިވެހި ސަރުކާރުން 2 ލައްކަ އެމެރިކާ ޑޮލަރު ދޭނެކަމަށް ފޮރިން މިނިސްޓަރު އަބްދުﷲ ޝާހިދު ހާމަކުރައްވައިފިއެވެ.
މިއީ ކޮވިޑް-19 އާއި ދެކޮޅަށް ސާރކްގެ ގައުމުތައް ގުޅިގެން މަސައްކަތްކުރުމަށް އިންޑިއާގެ ބޮޑުވަޒީރު ނަރެންދުރަ މޯދީ ހުށަހެޅުއްވި ހިޔާލުފުޅެކެވެ. އަދި މި ފަންޑަށް އިންޑިއާއިން 10 މިލިއަން ޑޮލަރު ޖަމާކުރައްވާނެކަމަށް މޯދީ ވަނީ ވިދާޅުވެފައެވެ.
ރާއްޖެއަކީ މި ފަންޑަށް ފައިސާ ޖަމާކުރައްވާނެކަން ހާމަކުރެއްވި ސާރކްގެ ދެވަނަ ގައުމެވެ. މިކަމާއި ގުޅިގެން ފޮރިން މިނިސްޓަރު އަބްދުﷲ ޝާހިދު ކުރެއްވެވި ޓްވީޓްގައި ވިދާޅުވީ އިންޑިއާގެ ބޮޑުވަޒީރު ނަރެންދުރަ މޯދީ އިސްނެންގެވުމަށް މަރުހަބާ ދަންނަވާ ކަމަށެވެ. އަދި މި އިސްނެންގުވުމަށް ދިވެހިރާއްޖެއިން މަރުހަބާ ދަންނަވާ ކަމަށާއި، އެ ފަންޑަށް 2 ލައްކަ ޑޮލަރު (3،084،00 ތިން މިލިއަން އަށްޑިހަ ހަތަރު ހާސް ރުފިޔާ) ޖަމާކުރައްވާނެ ކަމަށް ވިދާޅުވެފައެވެ.
ސާރކް އެމަޖެންސީ ރިލީފް ފަންޑެއް ގާއިމް ކުރެއްވުމަށް މޯދީ ހުށަހެޅުއްވީ މި މަހުގެ 15 ވަނަ ދުވަހު ސާރކްގެ ގައުމުތަކުގެ އިސްވެރިން ބޭއްވި ވީޑިއޯ ކޮންފަރެންސްގައެވެ. މޯދީ ވިދާޅުވީ ފަންޑު ފުރަތަމަ އެކުލަވާލައްވާ އިރު، އިންޑިއާ އިން 10 މިލިއަން ޑޮލަރު އެ ފަންޑަށް ޖަމާކުރައްވާނެ ކަމަށެވެ. މޯދީގެ މި ނިންމުމަށް ރައީސް އިބްރާހިމް މުހައްމަދު ސޯލިހާއި އަފްގާނިސްތާނާއި ބޫޓާނުން ވެސް ވަނީ ތާއިދުކޮށް މަރުހަބާ ދަންނަވާފައެވެ.
މި ފަންޑަކީ މެންބަރު ގައުމުތަކުން ވޮލެންޓިއަރކޮށް ކޮންޓްރިބިއުޓް ކުރާ ފަންޑަކަށް ހެދިދާނެ ކަމަށާއި، ފެށުމުގެ ގޮތުން އިންޑިއާއިން 10 މިލިއަން ޑޮލަރު ފަންޑަށް ޖަމާކުރައްވާނެ ކަމަށް މޯދީ ވިދާޅުވިއެވެ. މީގެ އިތުރުން ސަރަހައްދީ ގައުމުތަކަށް ބޭނުންވާ ސިއްހީ އަދި ތަކެތީގެ އެހީތެރިކަން ފޯރުކޮށްދެއްވާނެ ކަމަށެވެ.
