ކޮވިޑް-19: ޓުއަރިސްޓް އުޅަނދުފަހަރުތަކަށް ދެމުންގެންދާ ޚިދުމަތްތައް ވަގުތީގޮތުން މެދުކަނޑާލައިފި
އެންޓްރީ ވީސާ ދިނުން، ބިދޭސީން ސައިން އޮން ކުރުން، ބިދޭސީން ސަން އޮފް ކުރުން ވަނީ މެދުކަނޑާލާފައި
ރާއްޖޭގައި ބަނދަރުކޮށްފައިވާ ކުރޫޒްލައިނާއެއް
ރާއްޖެއަށް އަންނަ ކަނޑު އުޅަނދު ފަހަރަށް ސައިން އޮން އަދި ސައިން އޮފްގެ ޚިދުމަތް ދިނުން ވަގުތީގޮތުން މެދުކަނޑާލައިފިއެވެ.
އިމިގްރޭޝަނުން ނެރުނު ނޫސްބަޔާނެއްގައި ބުނެފައިވަނީ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި، 19 މާރޗް 2020 ވަނަ ދުވަހުގެ ރޭގަނޑު 12:00 އިން ފެށިގެން ވަކިގޮތެއް އަންގަންދެން، ޔޮޓާއި ސަފާރީ ފަދަ އުޅަނދުތައް އެހެން ޤައުމަކުން ރާއްޖެ އައުމާއި ރާއްޖޭގެ އެއްވެސް ރަށެއްގައި ބަނދަރުކުރުން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މަނާކުރުމާއި ގުޅިންގެން، ސީޕޯރޓް އިމިގްރޭޝަނުން ދެމުންގެންދާ ޚިދުމަތްތަކަށް ބަދަލު ގެނެވިފައިވާ ކަމަށެވެ.
ޓުއަރިސްޓް އުޅަނދު ފަހަރުތަކަށް ދެމުންގެންދާ ޚިދުމަތްތަކުގެ ތެރެއިން ވަގުތީގޮތުން މެދުކަނޑާލާފައިވަނީ އެންޓްރީ ވީސާ ދިނުން، ބިދޭސީން ސައިން އޮން ކުރުން، ބިދޭސީން ސަން އޮފް ކުރުމެވެ. އެގޮތުން 19 މާރޗް 2020 ވަނަ ދުވަހުގެ ރޭ 12:00 ކުރިން ރާއްޖޭގައި ބަނދަރުކޮށްފައިވާ އުޅަނދުތައް ފިޔަވައި މި އިޢުލާނާއި ގުޅިގެން ރާއްޖެ އެތެރެވާ ކަނޑުއުޅަނދުފަހަރުތަކުން، 20 މާރިޗު 2020 ވަނަ ދުވަހުން ފެށިގެން، ކްރޫ ޗޭންޖް (ސައިން އޮން އަދި ސައިން އޮފް) ގެ ޚިދުމަތް ދިނުން ވަގުތީގޮތުން މެދުކަނޑާލާފައިވެއެވެ.
އަދި ދިވެއްސަކު އުޅަނދަކުން ސައިން އޮން އަދި ސައިން އޮފް ކުރެވޭނީ އިންޓަރނޭޝަނަލް ބޯޑަރ ހެލްތުން ހުއްދަ ލިބިގެން ކަމަށް ވެސް އިމިގްރޭޝަނުން ބުނެއެވެ.
