މުސާރަ ލިބޭގޮތައް ޔުނިވަރސަލްގެ މުވައްޒަފުންނަށް 3 މަހުގެ ޗުއްޓީއެއް ދީފި
19 މާރިޗު 2020 | ބުރާސްފަތި 18:30މިހާރު އޮތް ހާލަތު ކޮންމެ މަހަކު އެއްފަހަރު ބަލާ ހާލަތަށް ރިއާޔަތްކުރަމުންދާނެ ކަމަށް އެކުންފުނިން ބުނެފައިވޭ
ޔުނިވާސަލްގެ ވެރިޔާ، އެމްޔޫ މަނިކު
މުސާރައާއި ރޯދަ އިނާޔަތް އަދި މިމަހުގެ ސަރވިސް ޗާޖް ލިބޭ ގޮތަށް ޔުނިވަރސަލްގެ ރިސޯޓް މުވައްޒަފުންނަށް 3 މަހުގެ ޕޭ ލީވް އެކުންފުނިން ދޭން ނިންމައިފިއެވެ.
ޔުނިވަރސަލްއިން ނެރުނު ނޫސްބަޔާނުގައި ބުނެފައިވަނި އެއްވެސް އުނިކުރުމެއް ނެތި ހުރިހާ މުވައްޒިފުންނަށް ޤާނޫނުގައި ވާގޮތުގެ މަތިން މުސާރަ ދޭނެކަމަށެވެ.
އެ ކުންފުނިން ނެރުނު ނޫސްބަޔާނުގައި ބުނެފައިވަނީ ކޮވިޑް-19 އާއި ގުޅިގެން ދުނިޔޭގެ އިޤުތިޞާދަށް ދިމާވެފައިވާ ހީނަރުކަން އެންމެބޮޑު ތަހައްމަލުކުރަންޖެހޭ ޤައުމުތަކުގެ ތެރޭގައި ދިވެހިރާއްޖެ ހިމެނުނުކަމީ އެކުންފުނިން ހިތާމަކުރާކަމަށެވެ. އަދި މިކަމާއި ގުޅިގެން ދުނިޔޭގެ ދަތުރުފަތުރު ހުއްޓި އެންމެ ބޮޑު އަސަރެއްކުރަމުންދަނީ ފަރުތަވެރިކަމުގެ ސިނާޢަތަށް ކަމަށެވެ.
އެގޮތުން، އެކުންފުނިން އަބަދުވެސް ޤަބޫލުކުރާގޮތުގައި ކުންފުނީގެ އެންމެ ބޮޑު ރައުލްސުލްމާލަކީ ކުންފުނީގައި މަސައްކަތް ކުރަމުންގެންދާ 3200 އަށްވުރެ ގިނަ މުވައްޒިފުން ކަމަށާއި، މިފަދަ ކޮންމެ ކާރިޘާއެއްގައި ކުންފުނިން ނިންމި ކޮންމެ ނިއްމުމެއް ނިންމާފައިވާނީ ދިވެހިރާއްޖޭގެ އިޤްތިސާދަށާއި، ކުންފުނީގެ ދެމިއޮތުމަށާއި، މުވައްޒިފުންގެ ވަޒީފާ ހިމާޔަތްކުރުމަށް އިސްކަންދީގެން ކަމަށެވެ.
އަދި މިވަގުތު ދުނިޔޭގެ ދަތުރު ފަތުރުތަށް ހުއްޓިފައިވުމާއި، ކުރިއަށް އޮތްދުވަސްތަކަށް އެއްވެސް ބުކިންގ ތަކެއް ނެތުމާއެކު، އޭޕްރިލް މަހުން ފެށިގެން ކުރިޔަށް އޮތް ތިންމަސްދުވަހަށް، ކުންފުނީގެ ހުރިހާ ރިސޯޓުތަކުގެ ހިންގުން ވަގުތީގޮތުން މެދުކަނޑާލުމަށް ކުންފުނީގެ ބޯޑުންވަނީ ނިއްމާފައިވާ ކަމަށެވެ.
އަދި މުވައްޒިފުންނަށް ޚާއްސަ ޕެކޭޖަކާއެކު، މުސާރަ ލިބޭގޮތަށް ތިންމަސްދުވަހުގެ ޗުއްޓީއެއް ދިނުމަށް ނިންމާ ކޮންމެ މަހަކު އެއްފަހަރު ނިންމުން މުޠާލިއާކޮށް، ޙާލަތަށް އަންނަ ބަދަލުތައް ދެނެގަނެ، ވީ އެންމެ އަވަހަކަށް، ކުރީގެ ޙާލަތަށް ރުޖޫއަވުމަކީ، އެ ކުންފުނީގެ އުންމީދު ކަމަށެވެ.
އަދި ކުރިޔަށް އޮތް ރޯދަމަހުގެ އިނާޔަތާއި މިހިނގާ މާރޗު މަހުގެ މުސާރައާއި ސަރވިސް ޗާޖް އެއްވެސް އުނިކުރުމެއްނެތި ހުރިހާ މުވައްޒިފުންނަށް ޤާނޫނުގައި ވާގޮތުގެ މަތިން ދެވޭނެ ކަމަށް ބުނެފައިވެއެވެ.
އަދި ދިވެހިރާއްޖޭގެ އިޤުތިޞާދު މައިގަޑުގޮތެއްގައި ބިނާވެފައިވަނީ ފަތުރުވެރިކަމުގެ ސިނާޢަތަށް ކަމަށްވެފައި، މިކަމުގެ ނޭދެވޭ އަސަރު އެންމެ ބޮޑަށް ކުރާނެ ފަރާތްތަކަކީ ފަތުރުވެރިކަމަށް އިންވެސްޓްކޮށްފައިވާ ފަރާތްތަކާއި އެފަރާތްތަކުގެ މުވައްޒިފުންނަށް ކަމަށް ބުނެފައިވެއެވެ.
ޔުނިވަރސަލްއިން ބުނީ ދުނިޔެއަށް ދިމާވަމުންމިދާ އިޤްތިޞާދީ ހީނަރުކަމުގެ އަސަރު އެންމެ ބޮޑަށް ކުރާ އެއް ދިވެހި ކުންފުންޏަކަށް އެކުންފުނި ވެފައިވާ ކަމަށާއި، ކަންއެހެން އޮތްނަމަވެސް އެ ކުންފުނިން މަސައްކަތްކުރަމުން ގެންދަނީ، ކުންފުނީގެ އެއްވެސް މުވައްޒިފަކު ވަކިނުކޮށް އަދި ހިންގުންވެސް މުޅިން ހުއްޓާނުލާ ކުރިޔަށް ގެންދެވޭނެ ގޮތްތަކެއްހޯދުމަށް ކަމަށެވެ.
