ކޮވިޑް-19: ވައިރަސް ޖެހިގެން އިޓަލީއިން މަރުވީ މީހުންގެ އަދަދު ޗައިނާއަށް ވުރެ އިތުރުވެއްޖެ!

ކޮވިޑް-19 ޖެހިގެން އިޓަލީވިލާތުން މަރުވީ މީހުންގެ އަދަދު 3،405 އަށް އަރައިފިއެވެ.

މިއީ މި ވައިރަސް ފުރަތަމަ ފެނުނު ޗައިނާއިން މަރުވެގެން ރެކޯޑް ކުރި 3،245 އަށް ވުރެ، އިތުރު އަދަދެކެވެ. ފާއިތުވެދިޔަ 24 ގަޑިއިރުގެ ތެރޭގައި އެކަނިވެސް އިޓަލީވިލާތުން 427 މީހަކު ވަނީ މަރުވެފައެވެ.

އިޓަލީވިލާތުން ޖުމްލަ 41،035 ކޭސްއެއް ވަނީ ރެކޯޑްކޮށްފައެވެ. އަދި އާބާދީގެ ކޮންމެ އެއް މިލިއަން މީހުންގެ ތެރެއިން 679 މީހުންނަށް ވައިރަސް ވަނީ ޖެހިފައެވެ. މިއީ މުޅި ދުނިޔެއަށް ބަލާއިރު ރެކޯޑް އަދަދެކެވެ.

މާހިރުން ގަބޫލުކުރާ ގޮތުގައި، އިޓަލީވިލާތުން ކޮވިޑް-19 އަށް ޕޮޒިޓިވްވެފައިވާ މީހުންގެ އަދަދު މިހާރު ހުރި އަދަދުތަކަށް ވުރެ ވެސް ގިނަވާނެއެވެ. މި ވަގުތު އިޓަލީވިލާތުގައި ޓެސްޓް ކުރެވެމުން ދަނީ ހަމައެކަނި ވައިރަސްގެ އަލާމާތްތައް ފެނިގެން ހޮސްޕިޓަލަށް އަންނަ ފަރާތްތައް އެކަންޏެވެ.

މަރުވެފައިވާ މީހުންގެ އަދަދުތައް ދުވަހުން ދުވަހަށް އިތުރުވަމުން ދިއުމާއި ގުޅިގެން، އިޓަލީ ސަރުކާރުން ވަނީ މަރުވެފައިވާ މީހުން ތަންތަނަށް އުފުލުމުގެ އިންތިޒާމް އަސްކަރިއްޔާއާ ހަވާލުކޮށްފައެވެ.

އިޓަލީވިލާތުގެ ސިއްހީ އިދާރާތަކާ ހަވާލާދީ މީޑިއާތަކުން ރިޕޯޓްކޮށްފައިވާ ގޮތުގައި، ވައިރަސް ޖެހިގެން މަރުވާ މީހުންގެ އަދަދު ގިނައީ، އާބާދީގެ ނިސްބަތުން އުމުރުން ދުވަސްވީ މީހުން ގިނަވުމުންނެވެ. އިޓަލީވިލާތަކި އުމުރުން ދުވަސްވީ މީހުންގެ އާބާދީ ދެވަނައަށް އެންމެ ބޮޑު ގައުމެވެ. މަރުވީ މީހުންގެ ތެރެއިން 87 އިންސައްތައަކީ އުމުރުން 70 އަހަރުން މަތީގެ މީހުންނެވެ.

އުމުރުން ދުވަސްވީ މީހުންގެ އާބާދީ އިތުރުވުމުގެ އިތުރުން، އިޓަލީ ސިއްހީ ނިޒާމް މިފަދަ ކަމަކަށް ތައްޔާރުވެފައި ނުވާކަމަށް ވެސް މާހިރުން އަންނަނީ ބުނަމުންނެވެ. އިޓަލީވިލާތުގެ ހޮސްޕިޓާތަކުގެ އައިސީޔޫތައް ފުރި، އެ ގައުމުން ވަނީ ބޭނުންވާ ވެންޓިލޭޓަރުތަކާއި އެހެނިހެން ސިއްހީ އާލާތްތައް ހޯދުމަށް އެހެން ގައުމުތަކުގެ އެހީއަށް އެދިފައެވެ.

އޭގެ އިތުރުން، އެ ގައުމުގައި އިއުލާންކޮށްފައިވާ ލޮކްޑައުންއަށް މީހުން އިޖާބަނުދޭ ވާހަކަތަކެއް މީޑިއާގައި ވަނީ ފެތުރިފައެވެ. ޗައިނާގެ ރެޑް ކްރޮސްގެ ފަރާތަކާ ހަވާލާދީ ސްކައި ނިއުސްގައި ޝާއިއުކޮށްފައިވާ ހަބަރެއްގައި ވަނީ، އަދިވެސް ޕަބްލިކް ޓްރާންސްޕޯޓާއި މީހުން ކެފޭތަކުގައި މީހުން ކާން ތިބޭ މަންޒަރު މިލާނުން ފެނިފައި، ހައިރާންވީ ކަމަށް ބުނެފައެވެ.

އޭނާއަކީ ވައިރަސް ކޮންޓްރޯލް ކުރުމަށް އިޓަލީވިލާތަށް އެހީތެރިވެދިނުމަށް ޗައިނާއިން އިން ދިޔަ ވަފުދުގެ މެމްބަރެކެވެ. އަދި ވޫހާންގައި ވެސް ވައިރަސް ފެތުރުން ކޮންޓްރޯލް ލޮކްޑައުން ފުރިހަމައަށް ތަންފީޒުކުރުމުން ކަމަށް އޭނާ ބުނެފައިވެއެވެ.