ކޮވިޑް-19 އާ ގުޅިގެން ކޯޓުތަކާއި އިދާރާތައް ބަންދު ދުވަސްތަކުގައި ކޯޓަށް ދައްކަންޖެހޭ ފައިސާ ދެއްކޭނެ ގޮތެއް ކަނޑައަޅައިފިއެވެ.

ޖުޑިޝަރީން ކޮށްފައިވާ އިއުލާނެއްގައި ބުނެފައިވަނީ ކޮވިޑް-19 ފެތުރުން ހުއްޓުވުމަށްޓަކައި އަޅާ ޚާއްޞަ ފިޔަވަޅުގެ ތެރެއިން ސަރުކާރު ބަންދުކޮށްފައި ހުންނަ ދުވަސްވަރު ޝަރުޢީދާއިރާއިން ޢާންމު ރައްޔިތުންނަށް ފޯރުކޮށްދޭ ޚިދުމަތްތައް މެދުނުކެނޑޭނެ އިންތިޒާމް ކަށަވަރު ކުރެއްވުމަށްޓަކައި އެ މުއްދަތުގައި ޝަރުޢީ ޙުކުމަކާ ގުޅިގެން ނުވަތަ ކޯޓުން ދޭ ޚިދުމަތަކާ ގުޅިގެން ކޯޓަށް ދައްކަންޖެހޭ އެއްވެސް ފައިސާއެއް ދެއްކުމަށް ބޭނުންވާނަމަ، ތިން ގޮތަކަށް އެފައިސާ ދެއްކޭނޭ އިންތިޒާމް ބުރާސްފަތި ދުވަސް (މާދަމާ) އިން ދުވަހުން ފެށިގެން ހަމަޖެހިފައިވާ ކަމަށެވެ.

އެގޮތުން ފައިސާ ދައްކަންޖެހޭ ފަރާތުގެ ވައިބަރ ނުވަތަ ވަޓްސްއެޕް ނުވަތަ އީމެއިލް މެދުވެރިކޮށް ޑީޖޭއޭއިން ފޮނުވާ ލިންކުން ހުޅުވޭ ޕޯޓަލް މެދުވެރިކޮށް ފައިސާ ދެއްކުމާއި، ޑީޖޭއޭގެ ވެބްސައިޓަށްވަދެ ވެބްސައިޓްގައި އިންނަ ސްޓެޓިކް ކިއުއާރު ކޯޑު ސްކޭން ކުރުމަށްފަހު ފައިސާ ދެއްކުން އަދި ފައިސާ ދައްކަން ޖެހޭ ފަރާތުން، ޖުޑިޝަލްގެ އެޑްމިން ޑިޕާޓްމަންޓްގެ އެކައުންޓް ނަންބަރު 001 431506 7711 އަށް ފައިސާ ޓްރާންސްފަރ ކުރެވިދާނެ ކަމަށެވެ.

މީގެ އިތުރުން ދިވެހިރާއްޖެއަށް އިޢުލާނުކޮށްފައިވާ ޢާންމު ޞިއްޙަތުގެ ކުއްލި ނުރައްކަލުގެ ޙާލަތު ނިމުމަކަށް އަންނަންދެން، ކްރިމިނަލް ކޯޓަށް ހުށަހަޅާ، ވަކާލާތުކުރުމަށް އެދޭ ފޯމުތަކާއި، މިނޫންވެސް ޝަރީޢަތާއި ގުޅުންހުރި އެކިއެކި ލިޔުންތައް، [email protected] އަށް ފޮނުއްވުމަށް ވެސް ޖުޑިޝަރީން ވަނީ އެދިފައެވެ.