ތެލަށް އޮތް ޑިމާންޑު ކުޑަވެ، ތެޔޮ ފީފާއެއްގެ އަގު 30 ޑޮލަރަށް!

ކޯވިޑް-19 އާ ގުޅިގެން ދުނިޔޭގެ ބާޒާރުގައި ތެލަށް އޮތް ޑިމާންޑު ކުޑަވެ، ސާފުނުކުރާ ތެޔޮ ފީފާއެއްގެ އަގު 30 ޑޮލަރަށް ވެއްޓިއްޖެއެވެ.

ތެލުގެ އަގު ދައްވުމާއި ގުޅިގެން، ދުނިޔޭގައި މި ވަގުތު ތެޔޮ އުފައްދާ އެމެރިކާގެ ގިނަ ކުންފުނިތަކުން ވަނީ ތެޔޮ ނެގުމަށް ޑްރިލްކުރުން ހުއްޓާލަން ނިންމާފައެވެ. މިއީ 2016 ވަނަ އަހަރަށް ފަހު، ތެލުގެ އަގު މިހާ ދަށަށް ދިޔަ ފުރަތަމަ ފަހަރެވެ.

ދުނިޔޭގެ ބާޒާރުގައި ތެލުގެ ޑިމާންޑް ދަށްވާން މެދުވެރިވީ ސަބަބުތަކުގެ ތެރޭގައި، ޗައިނާގެ ގިނަ ކާރުހާނާތަކެއް ބަންދުކުރަން ޖެހުމާއި، މަތިންދާބޯޓުތަކާއި ކްރޫޒްލައިނަރތަކުގެ ދަތުރުތައް ހުއްޓާލަން ޖެހުން ހިމެނެއެވެ. ޗައިނާއަކި ދުނިޔޭގައި ދެވަނައަށް އެންމެ ގިނައިން ތެޔޮ ބޭނުންކުރާ ގައުމެވެ. ޗައިނާއިން ދުވާލެއްގެ މައްޗަށް 13.5 މިލިއަން ފީފާގެ ތެޔޮ އަންދައެވެ.

އޭގެ އިތުރުން، ސައުދީއާއި ރަޝިއާއާ ދެމެދު މިހާރު ކުރިއަށްދާ އަގުގެ ހަނގުރާމައިގެ ނޭދެވޭ އަސަރު ވެސް ތެލުގެ ބާޒާރަށް އަންނަނީ ކުރަމުންނެވެ. ދުނިޔޭގެ އިގްތިސާދު ރިސެޝަންއަށް ދާ ދަނޑިވަޅެއްގައި ސައުދީ އަދި ރަޝިއާއިން ވަނީ ސަޕްލައި އިތުރުކޮށް، މާކެޓް ފްލަޑް ކުރުމަށް ވިސްނަމުންނެވެ.

ސައުދީން ވަނީ އެ ގައުމުން ދުވާލެއްގެ މައްޗަށް ސަޕްލައިކުރާ ތެޔޮ ފީފާގެ އަދަދު 2.6 މިލިއަން ފީފާ އިތުރުކުރަން ނިންމާފައިވާ ކަން ނިމިދިޔަ ހަފުތާގެ ތެރޭގައި އިއުލާންކޮށްފައެވެ. ރަޝިއާއިން ވަނީ ދުވާލެއްގެ މައްޗަށް އިތުރަށް ތިން ލައްކައާއި ފަސް ލައްކައާ ދެމެދުގެ އަދަދަކަށް ތެޔޮ ފީފާ އުފައްދާ ރޭޓް އިތުރުކުރަން ނިންމާފައެވެ.

މާހިރުން ބުނާގޮތުން ނަމަ، މިކަމާއި ގުޅިގެން އަހަރުގެ ފުރަތަމަ ހަ މަސް ދުވަހުގެ ތެރޭގައި ޑިމާންޑަށް ވުރެ އިތުރަށް ބާޒާރަށް ނެރިފައިވާ ތެޔޮ ފީފާގެ އަދަދު 800 މިލިއަނާއި 1.3 ބިލިއަން ޑޮލަރުގެ އަދަދަކަށް އިތުރުވާނެ ކަމަށް ވަނީ ބެލެވިފައެވެ. އަދި މިއީ މީގެ ކުރިން ދުވަހަކު ވެސް ދިމާވެފައި ނުވާ ހާލަތެއް ކަމަށް އެ ފަރާތްތަކުން ބުނެއެވެ.