ސާރކް ގައުމުތަކުން ކޮވިޑް-19 އާ ދެކޮޅަށް ކުރާ މަސައްކަތަށް ފަންޑެން ހުޅުވުމަށް މަޝްވަރާކޮށްފި
އިންޑިއާއިން ވަނީ ފަންޑަށް 10 މިލިއަން ޑޮލަރު ޖަމާކުރައްވަނެކަމަށް ވިދާޅުވެފައި
ސާރކް ގައުމުތަކުގެ ލީޑަރުންގެ ވީޑިއޯ ކޮންފަރެންސްގެ ތެރެއިން
ސާރކްގެ ގައުމުތަކުން ކޮވިޑް-19 އާއި ދެކޮޅަށް މަސައްކަތްކުރުމުގެގޮތުން އެމަޖެންސީ ފަންޑެއް ހުޅުވުމަށް އިންޑިއާގެ ބޮޑުވަޒީރު ނަރެންދުރަ މޯދީ ހުށަހަޅުއްވައިފިއެވެ.
މޯދީ މިކަން ހުށަހެޅުއްވީ އެމަނިކުފާނު އިސްވެ ހުންނަވައިގެން ސާރކްގެ ގައުމުތަކުގެ ލީޑަރުންނާއެކު އާދީއްތަ ދުވަހުގެ ހަވީރު ބޭއްވެވި ފުރަތަމަ ވީޑިއޯ ކޮންފަރެންސްގައެވެ. މޯދީ ވިދާޅުވީ ފަންޑު ފުރަތަމަ އެކުލަވާލައްވާ އިރު، އިންޑިއާ އިން 10 މިލިއަން ޑޮލަރު އެ ފަންޑަށް ޖަމާކުރައްވާނެ ކަމަށެވެ.
މޯދީގެ މި ނިންމުމަށް ރައީސް އިބްރާހިމް މުހައްމަދު ސޯލިހާއި އަފްގާނިސްތާނާއި ބޫޓާނުން ވެސް ވަނީ ތާއިދުކޮށް މަރުހަބާ ދަންނަވާފައެވެ.
މޯދީ ވިދާޅުވީ މި ފަންޑަކީ މެންބަރު ގައުމުތަކުން ވޮލެންޓިއަރކޮށް ކޮންޓްރިބިއުޓް ކުރާ ފަންޑަކަށް ހެދިދާނެ ކަމަށާއި، ފެށުމުގެ ގޮތުން އިންޑިއާއިން 10 މިލިއަން ޑޮލަރު ފަންޑަށް ޖަމާކުރައްވާނެ ކަމަށެވެ. މީގެ އިތުރުން ސަރަހައްދީ ގައުމުތަކަށް ބޭނުންވާ ސިއްހީ އަދި ތަކެތީގެ އެހީތެރިކަން ފޯރުކޮށްދެއްވާނެ ކަމަށެވެ.
މޯދީ ވިދާޅުވީ ސާރކުގެ ގައުމުތަކުން ބޭނުންވާ ކަންކަމުގެ ލިސްޓެއް އެކުލަވާލައްވާފައިވާ ކަމަށާއި، އަވަށްޓެރި ގައުމުތަކަށް ބޭނުންވާ ކަންކަން ވީއެންމެ ބޮޑަކަށް ކޮށްދެއްވާނެ ކަމަށެވެ.
މި ވީޑިއޯ ކޮންފަރެންސްގައި ވާހަކަފުޅުދައްކަވަމުން އަފްގާނިސްތާނުގެ ރައީސް އަޝްރަފް ޣަނީ ވިދާޅުވީ އިންޑިއާއިން މިކަމުގައި އިސް ދައުރެއް އަދާކުރެއްވިދާނެ ކަމަށެވެ. އަދި އިންޑިއާއަކީ ޝަންހާއި ކޯޕަރޭޝަން އޮގަނައިޒޭޝަން (އެސްސީއޯ) އަދި ސާރކުގެ މެންބަރު ގައުމަކަށް ވުމުން އިންޑިއާއިން މިކަމުގައި އަފްގާންގެ އިތުރުން އެހެންގައުމުތަކަށް ވެސް އެހީތެރިވެވިދާނެ ކަމަށެވެ.
މި ކޮންފަރެންސްގައި ވާހަކަދައްކަވަމުން ސްރީލަންކާގެ ރައީސް ގޮތަބަޔާ ރާޖަޕަކްސާ ވިދާޅުވީ މި ކަމުގައި ދެކުނު އޭޝިއާގެ ގައުމުތަކުގެ ހިޔާލާއި އަމަލުކުރަންވީ ގޮތުގެ އިރުޝާދުތައް ވަރަށް މުހިންމު ކަމަށެވެ. އަދި މިކަމުގައި އަރައިގަންނަ އިރު ސާރކް ގައުމުތަކުން އިގްތިސާދީ އަނދަވަޅަކުން އަރައިގަތުމަށް ކުރަންޖެހޭ ކަންކަން ދުރާލާ ރާވަންޖެހޭ ކަމަށެވެ.
ބޫޓާންގެ ބޮޑުވަޒީރު ލޮޓޭ ޝެރިންގެ ވިދާޅުވީ ސާރކް މެންބަރު ގައުމުތަކުން ވަސީލަތްތައް ބަދަލުކުރެއްވުން މި ދަނޑިވަޅުގައި މުހިންމު ކަމަށެވެ. މީގެ އިތުރުން މި ވައިރަސްގެ ސަބަބުން ދިމާވެދާނެ ކަންކަމަށް ދުރާލާ ވިސްނުމަށް ވެސް އެމަނިކުފާނު ވަނީ ގޮވާލައްވާފައެވެ.
ބަންގުލަދޭޝްގެ ބޮޑުވަޒީރު ޝެއިހް ހަސީނާ ވިދާޅުވީ ސާރކްގެ ގައުމުތަކުން ކޮވިޑް-19 އާއި ދެކޮޅަށް ކުރައްވާ މަސައްކަތް ކާމިޔާބުވުމަކީ އެކަމަނާވެސް އެދިވަޑައިގަންނަވާ ގޮތް ކަމަށެވެ. އަދި ވަކިވަކި މައްސަލަތަކާއި ގުޅިގެން ވީޑިއޯ ކޮންފަރެންސް މެދުވެރިކޮށް މަޝްވަރާ ކުރެއްވުމުގެ މުހިންމުކަމުގެ މައްޗަށް ވެސް އެކަމަނާވަނީ އަލިއަޅުއްވާލައްވާފައެވެ.
ނޭޕާލްގެ ބޮޑުވަޒީރު ކޭޕީ އޮލީ ވިދާޅުވީ ކޮރޯނާވައިރަސްއާ ދެކޮޅަށް ކުރާ މަސައްކަތުގައި ސާރކުގެ ގައުމުތަކުން ކަންކަން ކުރިއަށްގެންދާނެގޮތުގައި މެކޭނިޒަމްއެއް އުފައްދަން ޖެހޭ ކަމަށެވެ.
މި ކޮންފަރެންސްގައި ވާހަކަދައްކަވަމުން ޕާކިސްތާންގެ ހެލްތް މިނިސްޓަރުގެ ހާއްސަ އެސިސްޓެންޓް ޒަފަރު މިރްޒާ ވިދާޅުވީ އެއްވެސް ގައުމުކުން މިކަމަށް ދީލާލައިގެން ނުތިއްބަވާނެ ކަމަށާއި، ހުރިހާ ގައުމުތަކުން ވެސް ހިއްސާ ކުރައްވަނީ އެއްކަހަލަ ކަންބޮޑުވުންތަކެއް ކަމަށެވެ.
އިންޑިއާގެ ބޮޑުވަޒީރު މޯދީ ވިދާޅުވީ ކުރިއަށް ވިސްނައި ސާކު ގައުމުތަކުން ގުޅިގެން އާންމު ރިސާޗް ޕްލެޓްފޯމެއް ގާއިމްކޮށް، އެޕިޑެމިކް ބަލިތައް ސާރކް ރީޖަންގައި ކޮންޓްރޯލު ކުރުމާ ގުޅޭ ރިސާޗުތައް ކުރިއަށް ގެންދިއުން މުހިންމު ކަމަށެވެ. އަދި އެކަމަށް އިންޑިއާގެ މެޑިކަލް ރިސާޗު ކައުންސިލްގެ އެއްބާރުލުމާއި އެހީ ދެއްވާނެ ކަމަށް މޯދީ ވިދާޅުވިއެވެ.
