ރިސޯޓު ލީގު: ދ. ޒޯނުގެ ޗެމްޕިއަންކަން ކަނޑިންމައަށް

ރިސޯޓު ލީގު 2020 ގެ ދ. ޒޯނުގެ ޗެމްޕިއަންކަން ކަނޑިންމަ މޯލްޑިވްސް ހޯދައިފި އެވެ.

މިއަހަރުގެ ދ. ޒޯނުގެ ކުޅުން ކަނޑިންމައިގައި ކުރިއަށްދިޔައިރު، މި ޒޯނުގެ ޗެމްޕިއަންކަން ކަނޑިންމަ ހޯދީ އާދިއްތަ ދުވަހު ހަވީރު ކުޅުނު ފައިނަލް މެޗުގައި އެންމެ ފަހުގެ ޗެމްޕިއަން ނިޔާމަ ޕްރައިވެޓް އައިލެންޑްސް މޯލްޑިވްސް އަތުން 2-0 އިން މޮޅުވެގެންނެވެ.

މިއަހަރުގެ ޗެމްޕިއަންކަން ކަނޑިންމަ ހޯދިއިރު، އެ ރިސޯޓުން ވަނީ 2018 ވަނަ އަހަރުވެސް މި ޒޯނުގެ ޗެމްޕިއަންކަން ހޯދާފައެވެ.

އާދީއްތަ ދުވަހު ހަވީރު ކުޅުނު ފައިނަލް މެޗުގައި ކަނޑިންމައަށް ދެ ލަނޑުވެސް ޖަހައިދިނީ މި މުބާރާތުގައި މޮޅު ކުޅުމެއް ދެއްކި އާފާގު ހަމީދެވެ. މި ދެ ލަނޑާއެކު އޭނާ ވަނީ މުޅި މުބާރާތުގައި ޖުމްލަ 9 ލަނޑު ކާމިޔާބުކޮށް، އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައެވެ.

މި ޒޯނުގެ އެންމެ މޮޅު ގޯލްކީޕަރަކީ ކަނޑިންމަގެ ރީހާން ނިޒާރެވެ. މުޅި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ ނިޔާމަގެ އާލިމް އަލީ އާއި ސައުދުﷲ ހުސެއިން އާއި ކަނޑިންމަގެ އަހުމަދު ނިޒާމާއި ސައުދުﷲ ހުސެއިންގެ އިތުރުން އާފާގެވެ. މީގެ ތެރެއިން އާފަގަކީ މުޅި މުބާރާތުގެ އެންމެ މޮޅު ކުޅުންތެރިޔާ އެވެ.

މިއަހަރުގެ ދ. ޒޯނުގެ ކުޅުން ނިމުނުއިރު، މިއަހަރު މި ޒޯނުގައި 6 ރިސޯޓެއް ވަނީ ވާދަކޮށްފައެވެ. އެއީ ކަނޑިންމަ އާއި ނިޔާމަގެ އިތުރުން ސަން އަކުއާ ވިލު ރީފާއި، ސަން އަކުއާ އިރު ވެއްޔާއި، ސެއިންޓް ރީޖަސް އަދި އަންގްސާނާ ވެލާވަރެވެ.

ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދަނީ ފަސް ޒޯނަކަށް ބަހާލައިގެން ނެވެ. އެއީ ދ. ޒޯނުގެ އިތުރުން ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނެވެ.

އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ.