އިޓަލީގެ ފުޓްބޯޅައިގެ ހަރަކާތްތައް ހުއްޓާލަނީ

އިޓަލީގައި ހަލުވިކަމާއެކު މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އެ ގައުމުގައި ފުޓުބޯޅައިގެ ހަރަކާތްތައް ހުއްޓާލުމަށް އެ ގައުމުގެ ފުޓުބޯޅަ ކުޅުންތެރިންގެ ޖަމިއްޔާގެ ރައީސް ޑަމިއާނޯ ޓޮމާސީ ގޮވާލައިފިއެވެ.

އިޓަލީގައި މިބަލި ޖެހިގެން 5000 އަށް ވުރެ ގިނަ މީހުންނަށް ފަރުވާދެމުންދާއިރު، މި ބައްޔާ ގުޅިގެން އިޓަލީން ވަނީ 200 އަށް ވުރެ ގިނަ މީހުން މަރުވެފައެވެ. އެހެންވެ އިޓަލީ ސަރުކާރުން ވަނީ އެ ގައުމުގެ ކުޅިވަރު ހަރަކާތްތައް އަންނަ މަހުގެ 3 ވަނަ ދުވަހާއި ހަމައަށް ކުރިޔަށް ގެންދެވޭނީ ސަޕޯޓަރުން ނުވައްދާ ކަމަށް އަންގާފައެވެ.

އެހެންކަމުން، މިހާރު މެދު ކަނޑާލާފައިވާ އިޓާލިއަން ލީގުގެ މެޗުތައް ސަޕޯޓަރުން ނުވައްދާ އާދީއްތަ ދުވަހުން ފެށިގެން ކުރިޔަށްދާނެއެވެ. ނަމަވެސް އިޓަލީގެ އުތުރު ލޮމްބާޑީ އާއި، ލޮމްބާޑީ ކައިރި 14 ޕްރޮވިންސެއް ކަރަންޓީނު ކުރަން އިޓަލީގެ ސަރުކާރުން މިހާރު ވަނީ ނިންމައިފައެވެ. އެހެން ކަމުން އިޓާލިއަން ލީގުގެ މެޗުތަކަށް ވާނެ ގޮތެއް ބުނަން ނޭގެ އެވެ. ލޮމްބާޑީ އަކީ އިޓާލިއަން ލީގުގެ އިންޓަ މިލާން، އޭސީ މިލާން، އެޓްލާންޓާ އަދި ބްރެޝިއާ ނިސްބަތްވާ ސަރަހައްދެވެ.

އިޓަލީގެ ފުޓުބޯޅަ ކުޅުންތެރިންގެ ޖަމްޢިއްޔާގެ ރައީސް ޓޮމާސީ ބުނީ އެންމެ އިސްވާން ޖެހޭނީ ކުޅުންތެރިންގެ ސިއްހަތު ކަމަށާއި، އިޓާލިއަން ލީގުގެ މެޗުތައް މިހާރުން މިހާރަށް ހުއްޓާލާން ޖެހޭ ކަމަށެވެ. ޓޮމާސީގެ ވާހަކަތަކައް އިޓަލީގެ ފޯވަރޑް މާރިއޯ ބަލޮޓެލީ ވަނީ ތަޢުރީފުކޮށްފައެވެ. ބަލޮޓެލީ ބުނީ މިއީ އެންމެން ހޭލަންވީ ވަގުތު ކަމަށާއި، ސަޕޯޓަރުން ނުވައްދާ މެޗުތައް ކުޅުނު ނަމަވެސް ބަހުންނާއި، ރޭލުންނާއި މަތިންދާބޯޓުން ވެސް ދަތުރު ކުރަން ޖެހޭނެ ކަމަށާއި، އަދި ހޮޓާތަކުގައި ނިދަންވެސް ޖެހޭނެ ކަމަށެވެ. ބަލޮޓެލީ އިތުރަށް ބުނީ ސިއްހަތަކީ ޖޯކެއް ނޫން ކަމަށާއި ސިއްހަތާއި އަޅާ ބަލާއިރު ފައިސާ އަކީ އަގެއް ހުރި އެއްޗެއް ނޫން ކަމަށްވެސް ބަލޮޓެލީ ބުންޏެވެ.

ޗައިނާއިން ޑިސެންބަރު މަހު ފެނުނު ކޮރޯނާވައިރަސް މިހާރު ވަނީ ދުނިޔޭގެ އެކި ކަންކޮޅުތަކައް ފެތުރިފައެވެ. އެގޮތުން ޔޫރަޕުން މި ބަލި އެންމެ ހަލުވިކަމާއެކު ފެތުރެމުން އަންނަ ގައުމަކީ އިޓަލީ އެވެ. އިޓަލީން މިހާތަނައް ކޮރޯނާ ވައިރަސްގެ 5000 އަށް ވުރެ ގިނަ ކޭސް ފެނިފައިވާއިރު މި ބަލި ޖެހިގެން މަރުވި މީހުންގެ އަދަދު 200 އަށްވުރެ ގިނަ ކަމަށް އިޓަލީން ހާމަކުރެއެވެ.